សារព័ត៌មាន នគរវត្ត តែងតែនាំមុខគេជានិច្ច
ក្លិបយក្សមួយនៅលីគកំពូលអង់គ្លេស មេឃខៀវ Manchester City បានទទួលការអនុញ្ញាតដោយ Premier League ឱ្យជនភៀសខ្លួនអ៊ុយក្រែនកីឡាករ Andrii Kravchuk ហ្វឹកហាត់ជាមួយក្លិប។ ការទទួលយកនេះធ្វើឡើងបន្ទាប់ពីមានការអន្តរាគមន៍ដោយខ្សែការពារ Man City និងអ៊ុយក្រែន Oleksandr Zinchenko។
កីឡាករ Kravchuk ស្ថិតនៅក្នុងជំរុំហ្វឹកហាត់ក្នុងប្រទេសទួរគីជាមួយក្លិបរុស្ស៊ី Torpedo Moscow ពេលការលុកលុយរបស់រុស្ស៊ីលើអ៊ុយក្រែនបានចាប់ផ្តើម។ ខ្សែបម្រើវ័យ២៣ឆ្នាំរូបនេះបានផុតកំណត់កិច្ចសន្យារបស់គាត់ព ហើយបានភៀសខ្លួនទៅទីក្រុង Manchester ជាកន្លែងដែលគាត់នឹងហ្វឹកហាត់ជាមួយក្រុមអាយុក្រោម២៣ឆ្នាំរបស់ក្លិប Man City សម្រាប់នៅសល់នៃរដូវកាលនេះ។
កីឡាករ Kravchuk បាននិយាយអំពីការលេងឲ្យក្លិបរុស្ស៊ីថា “ខ្ញុំពិតជាមានអារម្មណ៍មិនស្រួល។ ខ្ញុំកំពុងលេងនៅក្នុងប្រទេសដែលឈ្លានពានទឹកដីកំណើតរបស់ខ្ញុំ។ ការចាកចេញពីក្លិបគឺជាការសម្រេចចិត្តតែមួយគត់ហើយប្រជាជននៅអ៊ុយក្រែននឹងមិនយល់ពីខ្ញុំទេ ប្រសិនបើខ្ញុំបន្តលេងនៅទីនោះ”។
គ្រួសាររបស់ Kravchuk នៅតែស្ថិតក្នុងទីក្រុង Kyiv ជាកន្លែងដែលបងប្រុសរបស់គាត់ឈ្មោះ Aleks កំពុងប្រយុទ្ធនៅក្នុងកងកម្លាំងប្រដាប់អាវុធរបស់ប្រទេសគាត់។
កីឡាករ Kravchuk បានពន្យល់ថា “ខ្ញុំប្រាប់គាត់ជារៀងរាល់ថ្ងៃថាខ្ញុំមានមោទនភាពចំពោះគាត់ប៉ុណ្ណា ដែលមិនត្រឹមតែការពារគ្រួសាររបស់យើងប៉ុណ្ណោះទេ ប៉ុន្តែប្រទេសទាំងមូល និងប្រជាជនអ៊ុយក្រែន។ ខ្ញុំពិតជាព្រួយបារម្ភណាស់ ខ្ញុំនៅជាប់ជាមួយទូរស័ព្ទរបស់ខ្ញុំ ហើយតែងតែទទួលបានសារជាមួយនឹងការជូនដំណឹងអំពីការបំផ្ទុះគ្រាប់បែក។ រាល់ពេលដែលការជូនដំណឹងទាំងនោះមកខ្ញុំមានការថប់បារម្ភ គំនិតតែមួយគត់របស់អ្នកគឺគ្រួសាររបស់ខ្ញុំអាចស្លាប់”។
Kravchuk បានបន្ថែមថា “ខ្ញុំពិតជាមានអំណរគុណចំពោះ Manchester City ដែលបានអនុញ្ញាតឱ្យខ្ញុំហ្វឹកហាត់នៅក្លិបនេះ និងមិត្តរួមជាតិរបស់ខ្ញុំZinchenko សម្រាប់ជំនួយក្នុងការស្វែងរកដំណោះស្រាយ។ ប៉ុន្មានសប្តាហ៍ និងខែកន្លងមកមានការលំបាកខ្លាំងណាស់ ប៉ុន្តែការត្រលប់មកលើទីលានវិញមានន័យខ្លាំងណាស់សម្រាប់ខ្ញុំ។ ខ្ញុំដឹងថាបាល់ទាត់មានន័យយ៉ាងណាចំពោះគាត់ និងរបៀបដែលវាអាចជួយយើងក្នុងគ្រាលំបាកទាំងនេះ” ។
កាលពីដើមខែនេះ ក្របខ័ណ្ឌ Premier League បានរារាំងការដេញថ្លៃរបស់ក្លិប Burnley សម្រាប់កីឡាករ Victor Moses ពីក្លិប SpartakMoscow បើទោះបីជា FIFA ធ្វើវិសោធនកម្មច្បាប់របស់ពួកគេដើម្បីអនុញ្ញាតឱ្យកីឡាករបរទេសនៅក្នុងក្របខ័ណ្ឌ Premier League របស់រុស្ស៊ីចុះហត្ថលេខាសម្រាប់ក្លិបនៅក្នុងប្រទេសផ្សេងទៀតនៅខាងក្រៅទីផ្សារដោះដូរកីឡាករក៏ដោយ។ ប៉ុន្តែដោយសារ Kravchuk ទើបតែហ្វឹកហាត់ ពួកគេបានយល់ព្រមឱ្យគាត់ចូលរួមជាមួយ Man City ដូច្នេះគាត់អាចរក្សាកាយសម្បទារបស់គាត់ និងបន្តការអភិវឌ្ឍន៍សមត្ថភាពរបស់គាត់នៅអង់គ្លេស ៕
ដោយ៖ ភារៈ(រូបភាព ៖ BBC Sport)
