សារព័ត៌មាន នគរវត្ត តែងតែនាំមុខគេជានិច្ច
រជ្ជកាលរបស់ក្រុមតោខៀវ Chelsea ក្នុងនាមជាម្ចាស់ជើងឯកទ្វីបអឺរ៉ុបបានឈានដល់ទីបញ្ចប់ដ៏សោកសៅ បើទោះបីជាបានយកឈ្នះក្រុម Real Madrid ៣ទល់២ ក្នុងជើងទី២ នៅឯកីឡដ្ឋាន Bernabeu ក៏ដោយ។
នៅក្នុងការប្រកួតពានរង្វាន់ Champions League កាលពីរាត្រីថ្ងៃទី១២ឈានចូលថ្ងៃទី១៣ នេះ កីឡាករ Mason Mount រកបាន១គ្រាប់នាំមុខឲ្យ Chelsea ព្រមទាំងការតែតបាល់បញ្ចូលទីដ៏ល្អរបស់ Antonio Rudiger និង១គ្រាប់របស់ខ្សែប្រយុទ្ធ Timo Werner បានធ្វើឱ្យ Chelsea នាំមុខ៣ទល់០។
ប៉ុន្តែកីឡាករបម្រុង Rodrygo របស់ Real Madrid រកបាន១គ្រាប់សងវិញបន្ទាប់ពីការបញ្ជូនបាល់ដ៏ល្អរបស់ខ្សែបម្រើ Luka Modric បានបង្ខំឱ្យអាជ្ញាកណ្តាលប្រកួតម៉ោងបន្ថែម។ នៅនាទីទី៩៦គ្រាប់បាល់១គ្រាប់ដែលជាគ្រាប់ជ័យជម្នះក្នុងការសរុបចំនួនគ្រាប់បាល់ទាំង២ជើង គឺជាការស៊ុតបញ្ចូលទីរបស់ខ្សែប្រយុទ្ធឆ្នើម Karim Benzema ដែលជាវីរបុរសហែតទ្រីកក្នុងជើងទី១ នៅកីឡដ្ឋាន Stamford Bridge បានជួយឲ្យ Real Madrid យកឈ្នះក្រុម Chelsea សរុបទាំង២ជើង៥ទល់៤ បើទោះបីការប្រកួតជើងទី២នេះ ចាញ់ Chelsea ៣ទល់២ក៏ដោយ។
នៅទីបំផុតក្រុមតោខៀវ Chelsea ដែលលេងបានយ៉ាងអស្ចារ្យ ក្នុងការប្រកួតនេះ នៅតែមិនអាចស្វែងរកជ័យជម្នះទៅវគ្គពាក់កណ្តាលផ្តាច់ព្រ័ត្រដដែល ដោយបានបរាជ័យ និងធ្លាក់ត្រឹមវគ្គ៨ក្រុមចុងក្រោយនៃក្របខ័ណ្ឌ Champions League រដូវកាលនេះ។ កីឡាករជាច្រើនរបស់ក្រុម Chelsea បានបញ្ចេញអារម្មណ៍ស្រងូតស្រងាត់នៅចុងបញ្ចប់នៃ១២០នាទី ដោយមិនអាចទម្លាក់ Real Madrid ដែលគ្រងជើងឯក១៣សម័យ។
Chelsea មិនមានពេលយូរក្នុងការងើបពីការចាកចេញពីទ្វីបអឺរ៉ុបឡើយ ខណៈដែលពួកគេត្រៀមប្រឈមមុខនឹងក្រុម Crystal Palace ក្នុងការប្រកួតវគ្គពាក់កណ្តាលផ្តាច់ព្រ័ត្រ FA Cup នៅថ្ងៃអាទិត្យនេះដែលជាការប្រកួតដែលផ្តល់ឱ្យពួកគេនូវឱកាសចុងក្រោយក្នុងការលើកពានក្នុងស្រុកដ៏ធំមួយ។
ទោះបីជាទទួលបានភាពជោគជ័យក្នុងការប្រកួត FIFA Club World Cup និង Uefa Super Cup ក៏ដោយ ក៏ក្រុម Chelsea បានចាញ់ការស៊ុតបាល់ប៉េណាល់ទីកាត់សេចក្តីក្រោមស្នាដៃក្រុម Liverpool ក្នុងវគ្គផ្តាច់ព្រ័ត្រ League Cup ហើយមាន១២ពិន្ទុតាមពីក្រោយក្រុមកំពូលតារាង Manchester City ក្នុងក្របខ័ណ្ឌ Premier League ដោយនៅសល់តែ៨ប្រកួតប៉ុណ្ណោះចប់រដូវកាល។
ដោយឡែកក្រុមយក្សមកពីអាល្លឺម៉ង់ Bayern Munich បានចាញ់ក្រោមថ្វីជើង ក្រុមឡើងជើងមកពីអេស្ប៉ាញដែរគឺ Villarreal បើទោះបីជាការប្រកួតជើងទី២នេះលទ្ធផលស្មើគ្នា១ទល់១ក៏ដោយ ដោយកាលពីប្រកួតជើងទី១ Villarreal បានយកឈ្នះ Bayern Munich ១ទល់០។
ការប្រកួតរវាងក្រុមទាំង២ក្នុងតង់ទី១ គឺទទួលបានលទ្ធផលស្មើគ្នា០ទល់០ ដោយមិនមានគ្រាប់បាល់បញ្ចូលទីរៀងៗខ្លួន។ ចូលដល់នាទីទី៥២ ខ្សែប្រយុទ្ធឆ្នើមរបស់ Bayern កីឡាករ Robert Lewandowski រកបាន១គ្រាប់នាំមុខ ប៉ុន្តែនៅនាទីទី៨៨ជិតចប់ការប្រកួតទៅហើយកីឡាករ Samuel Chukwueze បានរកគ្រាប់បាល់ឈ្នះ ក្នុងការប្រកួតនេះ ធ្វើឲ្យ Villarreal ឈានដល់វគ្គពាក់កណ្តាលផ្តាច់ព្រ័ត្រ Champions League ជាលើកដំបូងក្នុងរយៈពេល១៦ឆ្នាំរបស់ក្លិប។
ក្រុមរបស់លោក Unai Emery បានគ្រប់គ្រងការឈ្នះ ១ទល់០ ក្នុងជើងទី១ ក្នុងទឹកដីប្រទេសអេស្ប៉ាញ ប៉ុន្តែក្រុម Bayern ហាក់ដូចជាគ្រប់គ្រងបាននៅពេលដែល Robert Lewandowski រកបាន១គ្រាប់នាំមុខ និងការគ្រប់គ្រងបាល់បានច្រើនលើសលុបនៅកីឡដ្ឋាន Allianz Arena ហើយធ្វើឲ្យ Villarreal ផ្តួល Bayern ជោគជ័យសរុបទាំង២ជើងឈ្នះ២ទល់១ ដែលទទួលបានជ័យជម្នះជាប្រវត្តិសាស្ត្រប្រឆាំងនឹងម្ចាស់ជើងឯកអឺរ៉ុប៦សម័យកាលមួយនេះ។
សម្រាប់ការប្រកួតក្នុងវគ្គពាក់កណ្តាលផ្តាច់ព្រ័ត្រក្របខ័ណ្ឌ Champions League រដូវកាលនេះគឺក្រុម Real Madrid នឹងត្រូវប៉ះក្រុម Manchester City ឬ Atletico Madrid ដែលក្រុមទាំង២ត្រូវប្រកួតគ្នានៅរាត្រីថ្ងៃទី១៣ មេសានេះ។ ចំណែកក្រុម Villarreal នឹងត្រូវប្រឈមមុខក្រុម Liverpoolឬ Benfica ដែលការប្រកួតវគ្គពាក់កណ្តាលផ្តាច់ព្រ័ត្រនឹងប្រព្រឹត្តទៅនៅថ្ងៃទី២៨ ខែមេសាខាងមុខសម្រាប់ជើងទី១ ៕
ដោយ៖ ភារៈ(រូបភាព ៖ BBC Sport/Reuters)
