សារព័ត៌មាន នគរវត្ត តែងតែនាំមុខគេជានិច្ច
ខេត្តរតនគិរី ៖ ករណីក្របីឡើងកជល់ម៉ូតូបានកើតឡើង នៅវេលាម៉ោង៨និង៤០នាទីព្រឹក ថ្ងៃទី១៨ ខែមេសា ឆ្នាំ ២០២២ តាមផ្លូវជាតិលេខ៧៨ ក្បែររង្វង់មូលក្រុងបានលុង ស្ថិតនៅក្នុងភូមិជ័យជំនះ សង្កាត់ឡាបានសៀក ក្រុងបានលុង។
ក្របីឡើងក១ក្បាល បានរត់ដេញបុក,ជល់និងវ័ធប្រជាពលរដ្ឋ ដែលកំពុងធ្វើដំណើរនៅលើដងផ្លូវជាតិ ធ្វើឲ្យក្មេងប្រុស-ស្រីពីរនាក់បានរងរបួសធ្ងន់និងស្រាល ហើយក្មេងជំទង់ស្រីម្នាក់បានសន្លប់នៅនឹងកន្លែង ដោយសារសត្វក្របីឡើងក បានរត់មកដេញជល់ម៉ូតូកំពុងតែធ្វើចរាចរណ៍លើផ្លូវ។
លោក ហួត បូរី អធិការក្រុងបានលុង បានឲ្យដឹងតាមទូរស័ព្ទនៅរសៀលថ្ងៃទី១៨ ខែមេសានេះ ថា ដោយសារក្របីឡើងកចំនួន២ក្បាល បានរួចចេញពីក្នុងក្រោល ដោយសារម្ចាស់ដាក់យូពេក វាបានក្រពុលមុខដេញជល់គេឯងទៅ ប៉ុន្តែឥឡូវកម្លាំងរបស់លោក ចាប់បាន២ក្បាលមកវិញហើយ។
លោកបន្តថា ក្មេងប្រុស-ស្រីទាំង៣នាក់នោះមិនអីទេ ប៉ុន្តែលោកបានណែនាំឲ្យម្ចាស់ក្របីទៅមើលក្មេងសម្រាកព្យាបាលនៅមន្ទីរពេទ្យបង្អែកខេត្តហើយ។ លោកបានបញ្ជាក់ទៀតថា សូមឲ្យម្ចាស់គោនិងក្របី ត្រូវមានខ្សែចំណង កុំលែងឲ្យដើរពេញផ្លូវធ្វើឲ្យគ្រោះថ្នាក់ដល់អ្នកធ្វើដំណើរជាយថាហេតុផ្សេងៗ៕
ដោយ៖ សូរិយា
