សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តស្ទូចដឹកសសរបុកគ្រឹះបេីកលឿនទៅកៀររថយន្តឡិចស៊ីសRX300 រងការខូចខាតហេីយបន្តទៅបុករថយន្តកាមរីដែលកំពុងបើកឆ្លងផ្លូវគាបអូសជាង១០ម៉ែត្រទៅផ្ទប់នឹងខឿនថ្មចិញ្ចើមផ្លូវទៅមុខលែងរួចរងការខូចខាតយ៉ាងដំណំ តែសំណាងល្អមិនបណ្តាលឱ្យមានមនុស្សណាម្នាក់រងរបួសនោះឡើយ។
ហេតុការណ៍នោះបានកើតឡើងកាលពីវេលាម៉ោង៤និង០០នាទីរសៀលថ្ងៃទី២៥ខែមេសាឆ្នាំ២០២២ស្ថិតនៅតាមបណ្តោយផ្លូវជាតិលេខ៤ត្រង់ចំណុចមុខសាលាសង្កាត់ចោមចៅទី៣ ភូមិព្រៃព្រីងជើង២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មាននៅកន្លែងកើតហេតុបានឱ្យដឹងថា នៅមុនពេលកើតហេតុគេឃើញរថយន្តម៉ាកកាមរីពណ៌ទឹកប្រាក់ពាក់ស្លាកលេខភ្នំពេញ2O-5788តាមបណ្តោយផ្លូវបេតុងក្នុងទិសដៅពីជើងទៅត្បូងសំដៅទីឆ្លូវជាតិលេខ៤ ខណៈពេលឆ្លងផ្លូវបានពាក់កណ្តាលស្របពេលនោះក៏មានរថយន្តស្ទូចដឹកសសរបុកគ្រឹះម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ3C-7061ធ្វើដំណើរតាមបណ្តោយផ្លូវជាតិលេខ៤ក្នុងទិសដៅពីកើតទៅលិចស្របជាមួយគ្នានោះរថយន្តម៉ាកឡិចស៊ីសRX300ពណ៌ស ពាក់ស្លាកលេខភ្នំពេញ2V-8204បើកនៅខាងមុខ ហើយរថយន្តដឹកសសរបុកគ្រឹះក៏បានបើកកៀររថយន្តឡិចស៊ីសបណ្តាលឱ្យរងការខូចខាតផ្នែកចំហៀងខាងឆ្វេង។ ភ្លាមនោះរថយន្តមិនទាន់អស់ល្បឿនក៏ជ្រុលទៅបុករថយន្តម៉ាកកាមរីចំពីចំហៀងផ្នែកខាងឆ្វេងអូសជាង១០ម៉ែត្រទៅមុខផ្ទប់នឹងខឿនថ្មចិញ្ចើមផ្លូវទៅមុខលែងរួចរងការខូចខាតរថយន្តទាំង២គ្រឿងយ៉ាងដំណំ តែសំណាងល្អមិនបណ្តាលឱ្យមនុស្សណាម្នាក់រងរបួសនោះឡើយ។
ក្រោយកើតហេតុរថយន្តម៉ាកឡិចស៊ីសRX300បានបើកទៅបាត់មិនទាមទារសំណងនោះទេ ចំណែករថយន្តបង្កនិងរថយន្តកាមរីត្រូវបានសមត្ថកិច្ចជំនាញនៃអធិការដ្ឋានពោធិ៍សែនជ័យមកវាសវែងយករថយន្តទាំងពីរគ្រឿងទៅរក្សារទុកដើម្បីរងចាំដោះស្រាយគ្នាតាមផ្លូវច្បាប់៕
ដោយ៖សុខាសែនជ័យ
