ម៉ូតូពីរគ្រឿងបុកគ្នាពេញទំហឹងបណ្តាលឱ្យក្មេងស្រីម្នាក់ស្លាប់និងយុវជនម្នាក់រងរបួសធ្ងន់

ខេត្តកំពង់ស្ពឺ ៖ ក្មេងស្រីម្នាក់បានស្លាប់ភ្លាមៗនៅនឹងកន្លែងចំណែកយុវជនម្នាក់រងរបួសធ្ងន់ខណៈជួបគ្រោះថ្នាក់ចរាចរណ៍ម៉ូតូពីរគ្រឿងបុកគ្នា។

ហេតុការណ៍នេះកើតឡើងកាលពីវេលាម៉ោង៤និង១៥នាទីល្ងាចថ្ងៃទី២៧ខែមេសាឆ្នាំ២០២២នៅតាមបណ្តោយផ្លូវជាតិលេខ៤ចន្លោះគីឡូម៉ែត្រលេខ៣៦-៣៧ត្រង់ចំណុចភូមិព្រៃផ្តៅឃុំត្រពាំងគង ស្រុកសំរោងទង ខេត្តកំពង់ស្ពឺ។

នគរបាលមូលដ្ឋានបានឲ្យដឹងថាក្មេងស្រីរងគ្រោះមានឈ្មោះឡេង រចនា អាយុ១៤ឆ្នាំរស់នៅភូមិស្ទឹង ឃុំត្រពាំងគងស្រុកសំរោងទងជិះម៉ូតូមួយគ្រឿងម៉ាកហុងដាសេ១២៥ពណ៌ខ្មៅពាក់ស្លាកលេខកំពង់ស្ពឺ ១ H ៥៤៨៨ ម្នាក់ឯង។

បើកបរពីទិសខាងកើតទៅទិសខាងលិចមកដល់ចំណុចកើតហេតុខាងលើក៏បុកជាមួយម៉ូតូមួយគ្រឿងទៀតម៉ាកហុងដាសេ១២៥ ពណ៌ខ្មៅ ពាក់ស្លាកលេខស្វាយរៀង ១Q-៥៧៧៣។

អ្នកបើកបរឈ្មោះ ស៊ឹម ភ័ក្រ្ដា  ភេទប្រុស អាយុ១៨ឆ្នាំ ស្នាក់នៅភូមិព្រៃផ្ដៅ ឃុំត្រពាំងគង ស្រុកសំរោងទងបណ្តាលឲ្យក្មេងស្រីរងគ្រោះស្លាប់ភ្លាមៗនៅនឹងកន្លែងតែម្តង។

ប្រភពបានបន្តទៀតថាក្រោយកើតហេតុមន្ត្រីនគរបាលជំនាញបានហៅរថយន្តដឹកជនរងគ្រោះយកទៅសង្គ្រោះនៅឯមន្ទីរពេទ្យបង្អែកខេត្តកំពង់ស្ពឺ។

សពក្មេងស្រីបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។

ចំពោះវត្ថុតាងទាំងពីរគ្រឿង រក្សាទុកនៅប៉ុស្តិ៍នគរបាលរដ្ឋបាលត្រពាំងគងរង់ចាំដោះស្រាយនៅពេលក្រោយ៕

ដោយ៖ចន្ទ លីហ្សា