សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យជាឃាតកពាក់ព័ន្ធនឹងករណីរឹតកសម្លាប់បុរសម្នាក់ជាភេទទី៣ ត្រូវបានកម្លាំងសមត្ថកិច្ចនាយកដ្ឋាននគរបាលក្រសួងមហាផ្ទៃ សហការជាមួយកម្លាំងនគរបាលនៃស្នងការដ្ឋាននគរបាលរាជធានីភ្នំពេញ និងស្នងការដ្ឋាននគបាលខេត្តព្រះវិហារ ក្រោមការសម្របសម្រួលពីស្ថាប័នអយ្យការអមសាលាដំបូងផងនោះបានធ្វើការឃាត់ខ្លួនបានហើយៗក៏បានកសាងសំណុំរឿងបញ្ជូនទៅតុលាការដើម្បីឃុំខ្លួនជាបណ្តោះអាសន្នរង់ចាំទទួលទោសតាមច្បាប់ជាធរមាន ។
ជនសង្ស័យមានឈ្មោះ ភូ សៀងឡាង ភេទប្រុស អាយុ២៧ឆ្នាំ មុខរបរមុនចាប់ខ្លួនគឺជាអ្នកបកប្រែភាសាចិន រស់នៅសង្កាត់លេខ៤ ក្រុង/ខេត្តព្រះសីហនុ ដែលមានស្រុកកំណើតនៅខេត្តកំពត។
ចំណែកជនរងគ្រោះក្នុងអំពើឃាតកម្មនេះមានឈ្មោះ ខុម វ៉ាន់ឌី (ភេទទី៣) ស្នាក់នៅបន្ទប់ជួល តាមផ្លូវបេតុងក្នុងភូមិដំណាក់ធំ២ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ។
ក្រោយចាប់ខ្លួន ជនសង្ស័យបានសារភាពថា កាលពីថ្ងៃទី២១ ខែមេសា ឆ្នាំ២០២២ ខ្លួនពិតជាបានធ្វើសកម្មភាពសម្លាប់ជនរងគ្រោះឈ្មោះ ខុម វ៉ាន់ឌី (ភេទទី៣)ប្រាកដមែន ដោយសារតែខ្លួនខឹងនឹងជនរងគ្រោះមានទំនាក់ទំនងស្នេហាជាមួយប្រុសផ្សេង ដែលជាហេតុធ្វើឱ្យខ្លួនផ្ទុះការប្រចណ្ឌ ហើយក៏បានយកខ្សែភ្លើងធ្វើសកម្មភាពរឹតកសម្លាប់ ជនរងគ្រោះនៅក្នុងបន្ទប់ជួលនោះតែម្តងទៅ ។ លុះពេលសម្លាប់ជនរងគ្រោះរួចហើយ រូបខ្លួនបានគេចខ្លួនទៅស្រុកកំណើតនៅឯខេត្តកំពត រួចបន្តគេចខ្លួនទៅខេត្តព្រះវិហាររហូតដល់សមត្ថកិច្ចតាមចាប់ខ្លួនបានតែម្តង ។
សូមរម្លឹកថា កាលពីថ្ងៃទី២៤ ខែមេសា ឆ្នាំ២០២២ មានការភ្ញាក់ផ្ញើលមួយដោយប្រជាពលរដ្ឋបានប្រទះឃើញមនុស្សម្នាក់ដេកស្លាប់នៅក្នុងបន្ទប់ជួលម្តុំផ្សារដីថ្មី ស្ថិតក្នុងសង្កាត់ស្ទឹងមានជ័យទី៣ ខណ្ឌ មានជ័យ រាជធានីភ្នំពេញ ។ បន្ទាប់ពីមានការភ្ញាក់ផ្អើលមក កម្លាំងសមត្ថកិច្ចនគរបាលមូលដ្ឋានបានចុះទៅដល់ និងបានទាក់ទងទៅនគរបាលជំនាញគ្រប់ផ្នែកទាំងក្រុងនិងក្រសួង ចុះពិនិត្យសាកសពនៅកន្លែងកើតហេតុ រួចបានធ្វើការសន្និដ្ឋានជំហានដំបូងថា ជាអំពើឃាតកម្ម ដោយជនជាឃាតកបានប្រើប្រាស់ខ្សែភ្លើងរឹតកសម្លាប់ជនរងគ្រោះ ។ ពេលវេលាមិនបានមួយសប្តាហ៍ផងទេ ការស៊ើបអង្កេត ស្រាវជ្រាវ គឺកម្លាំងសមត្ថកិច្ចជំនាញកំណត់មុខសញ្ញាឃាតកដែលជាប់ពាក់ពន្ធនឹងអំពើឃាតកម្មនោះបាន ហើយមកដល់ថ្ងៃទី២៨ ខែមេសា ឆ្នាំ២០២២ កម្លាំងសមត្តកិច្ចនគរបាលព្រហ្មទណ្ឌក្រសួង សហការចុះចាប់ខ្លួនជនសង្ស័យបាននៅឯខេត្តព្រះវិហារ ៕
ដោយ ៖ រ៉ារ៉ា
