សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ លោកឧត្តមសេនីយ៍ឯក ឆាយ គឹមខឿនអ្នកនាំពាក្យអគ្គស្នងការដ្ឋាននគរបាលជាតិ បានបញ្ជាក់នៅល្ងាចថ្ងៃនេះថា, យានយន្ត ៥២១គ្រឿងទៀត ត្រូវបានត្រួតពិនិត្យ និងផាកពិន័យ នាថ្ងៃទី០១ ខែឧសភា ឆ្នាំ២០២២ ។ លោកឧត្តមសេនីយ៍ឯក អ្នកនាំពាក្យ, គិតដល់ថ្ងៃទី០១ ខែឧសភា ក្នុងឆ្នាំ២០២២នេះ នគរបាលចរាចរណ៍ទូទាំងប្រទេសបានត្រួតពិនិត្យ និងផាកពិន័យយានយន្តសរុបចំនួន ៧២,១០៩គ្រឿង ក្នុងនោះមានម៉ូតូ ៥៥,៧២៦គ្រឿង និងរថយន្តគ្រប់ប្រភេទ ១៦,៣៨៣គ្រឿង។
បទល្មើសដែលត្រូវបានកត់សម្គាល់សម្រាប់ម៉ូតូ គឺភាគច្រើនអត់មួក អត់ស្លាកលេខ ល្មើសសញ្ញា បត់ជែង និងនិយាយទូរស័ព្ទជាដើម។ ដោយឡែករថយន្តល្បឿន អត់ប័ណ្ណបើកបរ ល្មើសសញ្ញា ខ្សែក្រវ៉ាត់ លើសចំណុះ និងនិយាយទូរស័ព្ទជាដើម។
សូមបញ្ជាក់ថា, បើយោងតាមលោកឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិ បញ្ជាក់ប្រាប់សារព័ត៌មានថា, យ៉ាងហោចណាស់ មានយានយន្តសរុបចំនួន ៥២១គ្រឿងទៀត ត្រូវបាននគរបាលទូទាំងប្រទេសត្រួតពិនិត្យ និងផាកពិន័យ នៅថ្ងៃទី០១ ខែឧសភា ឆ្នាំ២០២២នេះ ក្នុងនោះមានម៉ូតូ ៤៨៤គ្រឿង និងរថយន្ត ៣៧គ្រឿង។
សូមបញ្ជាក់ផងដែរថា សម្រាប់ថ្ងៃទី០១ ខែឧសភា ឆ្នាំ២០២២នេះ គ្រោះថ្នាក់ចរាចរណ៍នៅទូទាំងប្រទេសកម្ពុជាក៏បានកើតឡើងចំនួន ០៨លើក ក្នុងនោះស្លាប់ចំនួន ០២នាក់ របួស ០៧នាក់ (របួសធ្ងន់ ០៧នាក់)។ រយៈពេល១២១ថ្ងៃនេះ មានករណីគ្រោះថ្នាក់ចរាចរណ៍ចំនួន ១,១៧៣លើក បណ្ដាលឱ្យមនុស្សស្លាប់ ៦៨៤នាក់ របួស ១,៦៧៣នាក់ (របួសធ្ងន់ ១,០៥៨នាក់)។
លោកឧត្តមសេនីយ៍ឯក ឆាយ គឹមខឿន បានបន្តថា ការអនុវត្តតាមអនុក្រឹត្យលេខ៣៩ ក្នុងការផាកពិន័យយានយន្តល្មើសបានដំណើរការទៅយ៉ាងល្អប្រសើរ។ លោកបានថ្លែងអំណរគុណ និងកោតសរសើរដល់ជនរួមជាតិជាអ្នកប្រើប្រាស់ផ្លូវទាំងអស់ ដែលបានចូលរួមគោរពច្បាប់ចរាចរណ៍យ៉ាងល្អប្រសើររយៈពេលកន្លងមកនេះ ជាពិសេសកោតសរសើរ និងអរគុណដល់នគរបាលចរាចរណ៍ដែលបានលះបង់ និងខិតខំប្រឹងប្រែងជំរុញការរឹតបន្តឹងចរាចរណ៍ប្រកបដោយស្មារតី ទទួលខុសត្រូវខ្ពស់បំផុត ៕
ដោយ ៖ សិលា
