🔴Breaking News ៖ បែកធ្លាយទៀតហើយ ! អំពើពុករលួយរបស់មន្ត្រីមួយចំនួននៅក្នុងអង្គភាព គណៈកម្មាធិការប្រយុទ្ធប្រឆាំងផលិតផលក្លែងក្លាយ គាបអាជីវករចិនទារ៣មុឺនដុល្លារ !

ភ្នំពេញ ៖ ថ្នាក់ដឹកនាំក្រសួងមហាផ្ទៃ និងអង្គភាពប្រឆាំងអំពើពុករលួយអាចនឹងបើកការស៊ើបអង្កេត ស្រាវជ្រាវរកនូវកំហុសអំពើពុករលួយ ភាពមិនប្រក្រតី របស់មន្ត្រីនគរបាលយុត្តិធម៌របស់អង្គភាពគណៈកម្មាធិការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់ មានហានិភ័យខ្ពស់ដល់សុខភាព និងសុវត្ថិភាពសង្គម ខណៈដែលអង្គភាពនេះក្លាយទៅជាការប្រើជំនាញគាបទារលុយពីអ្នករកសុី ប្រព្រឹត្តដោយមន្ត្រីមួយចំនួនខ្លះ ដែលប្រើតួនាទី ភារកិច្ចគាបយកលុយ យ៉ាងសាហាវបំផុត ។

    សូមរម្លឹកថា រឿងលោកស័ក្តិ៥ ហ៊ុយ សុងហាក់ មិនទាន់បើកការស៊ើបអង្កេត ស្រាវជ្រាវរកឱ្យឃើញរឿងអំពើពុករលួយគាបយកលុយចិនផង ដល់ឥឡូវបែកធ្លាយទៀតហើយ! និងគួរឱ្យអាសូរដល់អាជីវករជនជាតិចិនដែលខំមករកស៊ីនៅកម្ពុជា ត្រូវបានក្រុមប្រតិបត្តិការរបស់អង្គភាពគណៈកម្មាធិការប្រយុទ្ធប្រឆាំងផលិតផលក្លែងក្លាយ ក្រុមទី៦ ចុះមកបិទសៀល (បិទឃ្លាំង) តាំងពីថ្ងៃទី៤ ខែមេសា ឆ្នាំ២០២២ រង់ចាំការចរចាយកប្រាក់ពីម្ចាស់ទីតាំង រហូតដល់ថ្ងៃទី១៣ ខែមេសា ឆ្នាំ២០២២ ទើបបើកឱ្យវិញ ដែលបានបែកធ្លាយដូចបែកពាងប្រហុកថា ក្រុមហ៊ុននេះត្រូវគេសំណូមពរឱ្យជួយត្រឹម៣មុឺនដុល្លារអាមេរិក ។ ប៉ុន្តែការចរចាបានធ្លាក់ចុះប្រហាក់ប្រហែលជា២មុឺនដុល្លារ ក៏ Okay 🆗 ។ 

    សូមបញ្ជាក់ថា ក្រុមប្រតិបត្តិការទី៦ នៃអង្គភាពគណៈកម្មាធិការប្រយុទ្ធប្រឆាំងផលិតផលក្លែងក្លាយ កាលពីព្រឹកថ្ងៃទី៤ ខែមេសា ឆ្នាំ២០២២ បានចុះមកត្រួតពិនិត្យទីតាំងឃ្លាំងលេខ WH-09 ស្ថិតនៅភូមិត្រពាំងស្វាយ សង្កាត់គោកឃ្លាង ខណ្ឌសែនសុខ រាជធានីភ្នំពេញ  កន្លងទៅ ។ បន្ទាប់មកបានធ្វើកំណត់ហេតុផ្អាកសកម្មភាព បណ្តោះអាសន្ននៅវេលាម៉ោង១និង០៥នាទីថ្ងៃទី២ ខែឧសភា ឆ្នាំ២០២២ ដោយលោកវរសេនីយ៍ឯក កុល ភិរ័ត្ន ឋានៈអនុប្រធានមន្ទីរពិសោធន៍ ជានាយនគរបាលយុត្តិធម៌ និងមានជំនួយការលោកវរសេនីយ៍ត្រី វណ្ណ សីហនាថ នាយរងការិយាល័យ នៃលេខាធិការដ្ឋាន(គ.ប.ផ.ក)  ដឹកនាំសម្របសម្រួលនីតិវិធី ដោយលោក ចែ សុង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ  ក្នុងនោះមានសមាសភាពចូលរួម៖

១-លោកឧត្តមសេនីយ៍ទោ តាន់ គុណតារា ឋានៈអនុប្រធានលេខាធិការដ្ឋាន 

២-លោកវរសេនីយ៍ឯក សំ វាសនា ឋានៈអនុប្រធានមន្ទីរពិសោធន៍

៣-លោកវរសេនីយ៍ទោ ហេង ណារ៉ាក់ ឋានៈអនុប្រធានលេខាធិការ 

៤-លោកវរសេនីយ៍ទោ ម៉ា ចាន់ណារិទ្ធ ឋាន:អនុនាយរងការិយាល័យ

៥-លោកវរសេនីយ៍ទោ តាន់ ប៉ារីស ឋាន:អនុនាយរងការិយាល័យ

៦-លោកវរសេនីយ៍ត្រី នង សីថេង ឋានៈនាយផ្នែកលេខាធិការដ្ឋាន

៧-លោកវរសេនីយ៍ទោ ប៊ិន បូរាវង្ស ឋានៈមន្ត្រីលេខាធិការដ្ឋាន សរុប១២នាក់។ 

   សូមជម្រាបជូនថា ម្ចាស់ទីតាំងមានឈ្មោះ លោក Fin Zhigeling ហើយឃ្លាំងនោះមានប្រភេទទំនិញ មី និងគ្រឿងទេស។ 

   ប្រភពបែកធ្លាយថា ខាងក្រុមប្រតិបត្តិការទី៦ អាចចរចានៅត្រឹមប្រហាក់ប្រហែលជា២មុឺនដុល្លារ ទើបបើកឃ្លាំងវិញ នៅថ្ងៃទី១៣ ខែមេសា ឆ្នាំ២០២២។ 

    ពាក់ព័ន្ធករណីនេះ លោកឧត្តមសេនីយ៍ទោ តាន់ គុណតារា ឋានៈអនុប្រធានលេខាធិការដ្ឋាន  ជាមួយអង្គភាព មជ្ឈមណ្ឌលព័ត៌មាន”នគរវត្ត” នៅរសៀលថ្ងៃទី២ ខែឧសភា ឆ្នាំ២០២២ លោកបានប្រាប់ថា ខ្ញុំបានចុះមើលកិច្ចការនេះ ហើយមិនបានចរចាអ្វីទេ កុំជឿគេ ព្រោះក្រុមការងារធ្វើតាមនីតិវិធី និងឆ្លងយោបល់តំណាងអយ្យការជាប់ជាប្រចាំ។ លោកបន្តថា បើប្អូនមិនជឿសួរទៅអយ្យការដឹងហើយ ។ 

    ដោយឡែកលោកឧត្តមសេនីយ៍ឯក តាន់ សុវិជ្ជា ប្រធានលេខាធិការដ្ឋាន អង្គភាពគណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់ មានហានិភ័យខ្ពស់ដល់សុខភាព និងសុវត្ថិភាពសង្គមបានបញ្ជាក់ថា ចំពោះរឿងនេះ ខ្ញុំមិនបានឮសូរចឹងទេ ប៉ុន្តែអាចសួរទៅលោក កុល ភិរ័ត្ន ផ្ទាល់បាន ព្រោះគាត់ចុះទៅត្រួតពិនិត្យ ។  ចំពោះ លោក កុល ភិរ័ត្ន អង្គភាព មជ្ឈមណ្ឌលព័ត៌មាន”នគរវត្ត” មិនអាចសុំការបំភ្លឺបានទេថា តើពាក់ព័ន្ធនឹងការចរចានោះឬរឿងទារលុយដូចខាងលើ ខណៈគ្មានលេខទូរស័ព្ទទាក់ទង ។ 

   លោកឧត្តមសេនីយ៍ឯក សរ សិទ្ធិ អនុរដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ គណៈកម្មាធិការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់ មានហានិភ័យខ្ពស់ដល់សុខភាពនិងសុវត្ថិភាពសង្គម ជាប្រធានស្តីទី មិនអាចសុំការបកស្រាយបានទេ ដោយទូរស័ព្ទចូលគ្មានអ្នកទទួល។

   ទោះបីយ៉ាងណាក៏ដោយ សូមមេត្តាលោកប្រធានសាមីអង្គភាពធ្វើការស៊ើបអង្កេត ស្រាវជ្រាវរកមុខមន្ត្រីខិលខូច ដែលជាប់ពាក់ព័ន្ធនឹងអំពើពុករលួយ ខណៈដែលអង្គភាពមួយនេះកំពុងធំុក្លិនដូចបែកពាងប្រហុកទៅហើយ ។ ល្បីបំផុត! ខាងចុះឆែកឆេរ ទោះបីជាមានច្បាប់ទម្លាប់ត្រឹមត្រូវក៏ដោយ រួចហៅម្ចាស់ទីតាំងមកធ្វើកំណត់ហេតុ ស្តាប់ចម្លើយ រួចហើយកិកកុករកគ្រប់វិធីសាស្រ្ត តាមជំនាញ ទាញរកផលប្រយោជន៍ ធ្វើឱ្យប៉ះពាល់ដល់កិត្តិយសអង្គភាពធ្ងន់ធ្ងរណាស់។

សូមបញ្ជាក់ថា លោកឧត្តមសេនីយ៍ឯក សរ សិទ្ធិ អនុរដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់ មានហានិភ័យខ្ពស់ដល់សុខភាព និងសុវត្ថិភាពសង្គម ជាប្រធានស្តីទី បានទូរស័ព្ទមកកាន់ទីប្រឹក្សាជាន់ខ្ពស់ មជ្ឈមណ្ឌលព័ត៌មាន”នគរវត្ត” វិញ នៅវេលាម៉ោង២និង១៧នាទីរសៀល ថ្ងៃទី២ខែឧសភា ឆ្នាំ២០២២  ប៉ុន្តែលោកអះអាងថា គាត់សូមទោសដោយមិនបានលើកទូរស័ព្ទ ទោះជាយ៉ាងណាខ្ញុំនឹងឆ្លើយបកស្រាយជូននៅពេលល្ងាច ខណៈពេលដល់ម៉ោងចូលប្រជុំ ចាំល្ងាចមេត្តាទូរស័ព្ទមកចុះ កុំភ្លេច ខ្ញុំរង់ចាំជានិច្ច ៕

ដោយ ៖ មជ្ឈមណ្ឌលសារព័ត៌មាន”នគរវត្ត “