សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់សង្ស័យងងុយដេកបានបើករថយន្តសណ្តោងទូកុងតឺន័រជ្រុលទៅបុករថយន្តម៉ាកហ៊ីយ៉ាន់ដាយដឹកទំនិញធុនធំ ឈប់នៅចិញ្ចើមផ្លូវចំពីក្រោយ បណ្ដាលឲ្យរថយន្តជ្រុលបុករបងផ្ទះប្រជាពលរដ្ឋបណ្តាឲ្យមានអ្នករងរបួសធ្ងន់ស្រាល៣នាក់ ។
ហេតុការណ៍គ្រោះថ្នាក់ចរាចរណ៍នេះ កើតឡើងកាលពីម៉ោង ៣និង១៥នាទីរំលងអធ្រាត្រឈានចូលថ្ងៃទី ៨ ខែឧសភាឆ្នាំ ២០២២នៅចំណុចផ្លូវបេតុងលូប្រាំ ភូមិដំណាក់ធំ៣ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។
ប្រភពព័ត៌មានពីប្រជាពលរដ្ឋនៅកន្លែងបានឲ្យដឹងថា មុនពេលកើតហេតុគេឃើញបុរសម្នាក់ បានបើករថយន្តម៉ាកហ៊ីយ៉ាន់ដាយ ពណ៌សពាក់ស្លាកលេខកណ្ដាល 3A-1123 បើកបរតាមផ្លូវបេតុងក្នុងទិសដៅពីត្បូងទៅជើង ខណៈមកដល់ចំណុចកើតហេតុ ក៏បានឈប់អែបចិញ្ចើមផ្លូវ ភ្លាមនោះស្រាប់ឃើញបុរសម្នាក់បើករថយន្តសណ្តោងទូកុងតឺន័រ ក្បាលពណ៌ត្រួយចេកពាក់ស្លាកលេខភ្នំពេញ3B-3790 បើកបរដោយបុរសម្នាក់រួមដំណើជាមួយនិងព្រូម្នាក់ទៀត បើកក្នុងល្បឿនលឿនសង្ស័យថា អ្នកបើកបរងងុយដេកបានជ្រុលទៅបុករថយន្តម៉ាកហុីយ៉ាន់ដាយពីក្រោយពេញទំហឹង បណ្តាលរថយន្តខ្ទេចមួយកំណាត់មុខទាំងស្រុង ចំណែកឯរថយន្តហុីយ៉ាន់ដាយជ្រុលទៅបុកផ្លែឈើ និងផ្ទះប្រជាពលរដ្ឋបណ្ដាលឲ្យមនុស្ស៣នាក់រងរបួសធ្ងន់ស្រាល ។
បន្ទាប់ពីកើតហេតុសមត្ថកិច្ចមូលដ្ឋាន បានសហការជាមួយសមត្ថកិច្ចជំនាញចរាចរណ៍ខណ្ឌមានជ័យ ចុះមកដល់ទីតាំងកន្លែងកើតហេតុ និងបានវាស់វែង យករថយន្តទាំង២គ្រឿង ប្រគល់ឲ្យសមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ យកមករក្សាទុករង់ចាំដោះស្រាយគ្នា នៅពេលក្រោយ៕
ដោយ៖ជ្រោយពេជ្រ
