សារព័ត៌មាន នគរវត្ត តែងតែនាំមុខគេជានិច្ច
សាធារណរដ្ឋកូរ៉េ ៖ សូមអបអរសាទ ខណៈនៅថ្ងៃទី១០ ខែឧសភា ឆ្នាំ២០២២ លោកស្រី ជ្រឹង បុទុមរង្សី ឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រកម្ពុជាប្រចាំសាធារណរដ្ឋកូរ៉េ ទទួលបានពានរង្វាន់ឯកអគ្គរាជទូតឆ្នេីមប្រចាំ២០២២ ពីស្ថាប័ន Korea Consumer Global Council ដែលជាស្ថាប័នផ្សាភ្ជាប់ទំនាក់ទំនងរវាងបណ្តាអតិថិជន និងបណ្តាក្រុមហ៊ុន តាមរយៈការប្រឹក្សាយោបល់ ដើម្បីជាការទទួលស្គាល់អំពីការចូលរួមចំណែកយ៉ាងសកម្មរបស់លោកជំទាវលើវិស័យការទូត ដែលផ្តោតលើចំណងមិត្តភាព និងកិច្ចសហប្រតិបត្តិការរវាងកម្ពុជា-កូរ៉េ។
សូមបញ្ជាក់ថា, នៅថ្ងៃទី១២ ខែឧសភា ឆ្នាំ២០២២ លោកស្រី ជ្រឹង បុទុមរង្សី ឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រកម្ពុជាប្រចាំសាធារណរដ្ឋកូរ៉េ បានថ្លែងលើបណ្តាញហ្វេសប៊ុកផ្ទាល់ខ្លួន យ៉ាងដូច្នេះថា, នាងខ្ញុំពិតជាមានកិត្តិយសណាស់ ដែលទទួលបាននូវពានរង្វាន់ ” ឯកអគ្គរាជទូតឆ្នើមប្រចាំឆ្នាំ២០២២” ពីក្រុមប្រឹក្សា Korea Consumer Global។
លោកស្រីបន្តថា, នាងខ្ញុំបានមកបំពេញបេសកកម្មជាឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្រកម្ពុជា ប្រចាំសាធារណរដ្ឋកូរ៉េ នៅថ្ងៃទី១០ ខែកញ្ញា ឆ្នាំ២០២១ ហើយនៅថ្ងៃទី១០ ខែឧសភា ឆ្នាំ២០២២ នេះ នាងខ្ញុំបានទទួលពានរង្វាន់ជាឯកអគ្គរាជទូតឆ្នើមប្រចាំឆ្នាំ២០២២ ពី Korea Consumer Global បន្ទាប់ពីបានបំពេញការងារការទូតរបស់នាងខ្ញុំបានរយៈពេល០៧ខែគត់។ នេះជាការលើកទឹកចិត្តមួយដ៏មានតម្លៃ ដែលសបញ្ជាក់ថាការខិតខំប្រឹងប្រែងរបស់នាងខ្ញុំក្នុងការបំពេញតួនាទី និងភារកិច្ចបម្រើជាតិ មាតុភូមិ និងបម្រើដល់ផលប្រយោជន៍បងប្អូនខ្មែរយើង ពិតជាមានការគាំទ្រពីភាគីកូរ៉េដែលជាម្ចាស់ផ្ទះពិតប្រាកដណាស់។ ជាការពិត នាងខ្ញុំពុំអាចបំពេញកិច្ចការងារទាំងនេះបាននោះទេ ប្រសិនបើពុំមានការចូលរួមគាំទ្រ និងលើកទឹកចិត្តពីមន្រ្តីរាជការ និងបុគ្គលិកនៃស្ថានទូត ព្រមទាំងក្រុមគ្រួសាររបស់នាងខ្ញុំផ្ទាល់ រួមទាំងក្តីអាណិតស្រលាញ់ពីបងប្អូនខ្មែរដែលរស់នៅ និងធ្វើការនៅក្នុងប្រទេសកូរ៉េនេះផងដែរ។
លោកលើកឡើងថា, ជាបឋមទូលព្រះបង្គំនាងខ្ញុំ សូមគោរពថ្លែងអំណរអរព្រះគុណ តបចំពោះព្រះរាជគុណូបការៈ និងព្រះព្រហ្មវិហារធម៌ដ៏ខ្ពង់ខ្ពស់បំផុតរបស់ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដែលបានប្រោសព្រះរាជទាននូវមុខងារដ៏ថ្លៃថ្លាជា ឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្រកម្ពុជា ប្រចាំសាធារណរដ្ឋកូរ៉េ ដល់ទូលបង្គំនាងខ្ញុំ។
នាងខ្ញុំក៏សូមអនុញ្ញាតសម្តែងនូវអំណរគុណប្រកបដោយការដឹងគុណយ៉ាងជ្រាលជ្រៅបំផុត ដល់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលបានផ្តល់នូវសេចក្តីទុកចិត្តដល់នាងខ្ញុំក្នុងការបំពេញកាតព្វកិច្ច និងកិច្ចការងារក្នុងតួនាទីជា ឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្រកម្ពុជា ប្រចាំសាធារណរដ្ឋកូរ៉េ ដើម្បីបម្រើដល់ប្រទេសជាតិ និងជានិច្ចកាលតែងតែផ្តល់នូវដំបូន្មាន និងអនុសាសន៍ណែនាំ ប្រកបដោយគតិបណ្ឌិតដ៏ខ្ពង់ខ្ពស់ ដល់រូបនាងខ្ញុំ។
ឆ្លៀតក្នុងឱកាសនេះដែរ នាងខ្ញុំក៏សូមថ្លែងអំណរគុណដល់ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងលោកជំទាវ ដែលតែងតែជឿជាក់ និង
ផ្តល់ឱកាសអោយនាងខ្ញុំបានរៀនសូត្រ និងពង្រឹងសមត្ថភាពបន្ថែមទៀត។ ជាចុងក្រោយនាងខ្ញុំ ក៏សូមថ្លែងអំណរគុណដល់ ឯកឧត្តម លោកជំទាវ បងៗ ដែលបានផ្តល់ដំបូន្មាន និងការណែនាំល្អៗ និងតែងតែលើកទឹកចិត្តដល់នាងខ្ញុំជានិច្ច។
នាងខ្ញុំនឹងប្តេជ្ញាខិតខំប្រឹងប្រែងឱ្យអស់ពីសមត្ថភាព បន្តអនុវត្តនូវតួនាទី និងភារកិច្ច ក្នុងនាមជា ឯកអគ្គរាជទូតវិសាមញ្ញ និងពេញសមត្ថភាព ដើម្បីសម្រេចអោយបាននូវសមិទ្ធផល និងជោគជ័យថ្មីៗបន្ថែមទៀត ដើម្បីបំរើជាផលប្រយោជន៍ និងបុព្វហេតុ ដល់ប្រទេសជាតិ និងប្រជាជន ឱ្យកាន់តែល្អប្រសើរឡើង សំដៅលើការជំរុញកិច្ចសហប្រតិបត្តិការទ្វេភាគីរវាងប្រទេសកម្ពុជា និងកូរ៉េ លើវិស័យការទូតសេដ្ឋកិច្ច ពាណិជ្ជកម្ម វប្បធម៌ និងឧស្សាហកម្ម ទេសចរណ៍នៅក្នុងប្រទេសកម្ពុជា ក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់បំផុតរបស់ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ៕
ដោយ ៖ សុខ ខេមរា
