សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យមួយក្រុមបានធ្វើសកម្មភាពលួចកាត់ទ្វារផ្ទះប្រជាពលរដ្ឋមួយកន្លែងលួចយកម៉ូតូពីរគ្រឿងបានសម្រេច រួចគេចខ្លួនបាត់ស្រមោល ដោយបន្សល់ទុកម៉ូតូហុងដាគុបកញ្ចាស់មួយគ្រឿង និងឧបករណ៍សម្រាប់ធ្វើសកម្មភាពមួយសំរាប់។
ហេតុការណ៍នេះកើតឡើងកាលពីវេលាម៉ោង ៣ និង ០៥ នាទីយប់ទៀបភ្លឺឈានចូលថ្ងៃទី១២ ខែឧសភាឆ្នាំ២០២២ នៅចំណុចផ្ទះលេខ 38H ខាងត្បូងប៉ុស្តិ៍នគរបាលរដ្ឋបាលភ្នំពេញថ្មី ប្រមាណជាង១០០ម៉ែត្រ ផ្លូវលេខ១០១៥ កែងនិង ១៩៧២ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
ម៉ូតូដែលជនសង្ស័យលួចយកទៅបាត់ មួយគ្រឿងម៉ាកហុងដា ស្តូពី ស៊េរីឆ្នាំ២០២០ពណ៌ខៀវពាក់ស្លាកលេខ ភ្នំពេញ1IJ-4797 និងមួយម៉ាកហុងដាឌ្រីម សេ១២៥ ស៊េរី២០២២ ពណ៌ខ្មៅពាក់ស្លាកលេខភ្នំពេញ1IY-2869។
តាមការៀបរាប់ពីម្ចាស់ផ្ទះកើតហេតុខាងលើបានប្រាប់ឲ្យដឹងថា មុនកើតហេតុរូបគាត់ទុកម៉ូតូក្នុងផ្ទះដូចសព្វរាល់ដង ដោយបានដាក់គន្លឹះទ្វារ និងចាក់សោរនៅខាងក្នុង រួចនាំគ្នាចូលដេកដូចធម្មតា លុះដល់ម៉ោងកើតហេតុខាងលើរូបគាត់ក៏ឮសូសំឡេងដែរ តែមិងបានចាប់អារម្មណ៍ នោះទេ។ប្រភពដដែលបានបន្តទៀតថា ដោយមានការសង្ស័យរូបគាត់ក៏បាននាំគ្នាបើកភ្លើងមើលស្រាប់តែឃើញបាត់ម៉ូតូចំនួន ពីរ គ្រឿង រួចក៏នាំគ្នាផ្អើលឆោឡោ មើលទៅទ្វារផ្ទះឃើញដាច់ត្រយ៉ូវទ្វារម្ខាង និងរបូតគន្លឹះ ភ្លាមៗនោះក៏នាំគ្នាចេញមកក្រៅដោយពិនិត្យជុំវិញផ្ទះ ក៏ប្រទះឃើញម៉ូតូហុងដាគុបជ្រុងមួយគ្រឿងពណ៌ទឹកបិចពាក់ស្លាកលេខកំពង់ស្ពឺ1B-3726និងឧបករណ៍មួយសម្រាប់ដែលជនសង្ស័យធ្វើសកម្មភាពបានបន្សល់ទុកនៅនឹងកន្លែងកើតហេតុ។
ក្រោយកើតហេតុរងគ្រោះបានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលសង្កាត់ភ្នំពេញថ្មីដើម្បីឲ្យសមត្ថកិច្ចជួយអន្តរាគមន៍ស្វែងរកម៉ូតូមកវិញ។ចំណែកម៉ូតូនិងវត្ថុតាងដែលជនសង្ស័យបន្សល់ទុកនៅកន្លែងកើតហេតុសមត្ថកិច្ចបាននាំយកទៅប៉ុស្តិ៍នគរបាលរដ្ឋបាលភ្នំពេញថ្មីទុកដើម្បីធ្វើការស្រាវជ្រាវបន្ត៕
ដោយ៖សុខាសែនជ័យ
