សារព័ត៌មាន នគរវត្ត តែងតែនាំមុខគេជានិច្ច
ខេត្តមណ្ឌលគិរី៖ អគ្គិភ័យបានលេបត្របាក់ផ្ទះពីរគ្រួសារអស់ពីរខ្នងផ្ទះបង្កឱ្យខូចខាតទ្រព្យសម្បត្តិអស់ទាំងស្រុងដោយសារតែឆ្លងចរន្តអគ្គិសនី។
ហេតុការណ៍ភ្លើងឆេះផ្ទះប្រជាពលរដ្ឋអស់ពីរខ្នងផ្ទះនោះបានកើតឡើងនៅវេលាម៉ោង១៣៖០០នាទីថ្ងៃទី១២ ខែឧសភា ឆ្នាំ២០២២ស្ថិតនៅក្នុងភូមិណងបួរ ឃុំណងឃីលឹក ស្រុកកោះញែក ខេត្តមណ្ឌលគិរី ។
សមត្ថិច្ចបានឱ្យដឹងថា ករណីនេះបង្កឱ្យខូចខាតទ្រព្យសម្បត្តិអស់ទាំងស្រុងទាំងពីរគ្រួសារ។ សមត្ថកិច្ចបានបន្តថា ក្រុមគ្រួសារដែលរងគ្រោះដោយភ្លើងឆេះផ្ទះនោះមាន៖ ទី១-ឈ្មោះ ហុន រស្មី ជាមន្ត្រីនគរបាលប៉ុស្តិ៍រដ្ឋបាលណងឃីលឹក ឆេះផ្ទះឈើមានទទឹងប្រវែង៧ម៉ែត្រ បណ្តោយប្រវែង៩ម៉ែត្រ អស់ទាំងស្រុង។
ទី២-ឈ្មោះ សាំង ណយ មានប្រពន្ធឈ្មោះ ប៊ុ ខុន ឆេះផ្ទះឈើប្រក់ស័ង្កសី មានទទឹងប្រវែង៤ម៉ែត្រ បណ្តោយប្រវែង ៥ម៉ែត្រ ខូចខាតទ្រព្យសម្បត្តិអស់ទាំងស្រុងដូចគ្នា ។
ទោះជាយ៉ាងណាក្តី ក្នុងគ្រោះអគ្គិភ័យនេះមិនបណ្តាលឱ្យមានគ្រោះថ្នាក់ដល់មនុស្សនោះឡើយ។
ក្រោយកើតហេតុអាជ្ញាធរនិងសមត្ថកិច្ចបានចុះទៅធ្វើការត្រួតពិនិត្យស្រង់ស្ថិតិនៃការបាត់បង់ទ្រព្យសម្បត្តិនិងឧបត្ថម្ភគ្រឿងឧបភោគបរិភោគព្រមទាំងជម្រកដើម្បីបន្តជីវភាពបណ្តោះអាសន្នផងដែរ៕
ដោយ ៖ ជីវ័ន្ត
