សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ត្រូវបានសមត្ថកិច្ចឃាត់ខ្លួនបន្ទាប់ពីធ្វេីសកម្មភាពឆក់យកទូរស័ព្ទដៃពីនារីម្នាក់បានសម្រេចកាលពីវេលាម៉ោង១៧និង០៥នាទីថ្ងៃទី២៤ ខែឧសភា ឆ្នាំ២០២២ ស្ថិតនៅភូមិជម្ពូវ័ន២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យឈ្មោះ ជឿន ចាន់កក្កដា ភេទប្រុស អាយុ៣៨ឆ្នាំ មុខរបរមិនពិតប្រាកដ ស្នាក់នៅភូមិព្រៃព្រីងត្បូង២ សង្កាត់ចោមចៅទី៣ ខណ្ឌពោធិ៍សែនជ័យ។
ចំណែកជនរងគ្រោះឈ្មោះ សឿន ស្រីនុត ភេទស្រី អាយុ២៧ឆ្នាំ មុខរបរកម្មការិនីរោងចក្រ ស្នាក់នៅភូមិព្រៃព្រីងត្បូង២ សង្កាត់ចោមចៅទី៣ ខណ្ឌពោធិ៍សែនជ័យ។
តាមប្រភពព័ត៌មានបានឱ្យដឹងថា មុនពេលកេីតហេតុជនរងគ្រោះជិះម៉ូតូចេញពីបន្ទប់ជួលដេីម្បីទៅរកទិញម្ហូបនៅម្តុំរោងចក្រQMI ដោយទុកទូរស័ព្ទម៉ាកoppo នៅហោប៉ៅខាងក្រោយ។ បន្ទាប់មកស្រាប់តែមានជនសង្ស័យម្នាក់ជិះម៉ូតូម៉ាកហុងដាឌ្រីមមកពីក្រោយធ្វេីសកម្មភាពឆក់យកទូរស័ព្ទបានសម្រេចរួចព្យាយាមជិះម៉ូតូគេចខ្លួន តែភ្លាមៗនោះជនរងគ្រោះក៏ជិះម៉ូតូដេញតាមពីក្រោយស្រែកថាចោរៗបង្កការភ្ញាក់ផ្អេីលដល់អ្នកដំណេីរជួយដេញតាមរហូតទៅដល់មុខហាងនំប៉័ងភ្នំពេញ ផ្លូវជាតិលេខ៤ ទេីបប្រជាពលរដ្ឋជិះម៉ូតូកៀរបណ្តាលឱ្យម៉ូតូជនសង្ស័យទៅបុកនឹងរ៉ឺម៉កកង់បីដួលទៅនឹងថ្នល់ត្រូវប្រជាពលរដ្ឋឃាត់ប្រគល់ជូនសមត្ថកិច្ចតែម្តង។
បច្ចុប្បន្នជនសង្ស័យខាងលើកំពុងឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌពោធិ៍សែនជ័យ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការបន្តតាមនីតិវិធី៕
ដោយ៖សុខាសែនជ័យ
