សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មានករណីគ្រោះថ្នាក់ចរាចរណ៍មួយ បណ្ដាលឱ្យបុរសម្នាក់បានស្លាប់ រីឯស្រ្តីជាប្រពន្ធរងរបួសស្រាល ខណៈដែលពួកគេជិះម៉ូតូឌុបគ្នា ក្នុងល្បឿនលឿនហេីយគេចពីរថយន្ត នៅខាងមុខក៏ជ្រុលទៅបុកបង្កាន់ដៃស្ពានកំពង់ទួលទាំងកំរោល។
ហេតុការណ៍ខាងលេីនេះ កាលពីវេលាម៉ោង ៧និង៣០នាទី ព្រឹកថ្ងៃទី៣១ ខែឧសភា ឆ្នាំ២០២២នេះ ស្ថិតនៅតាមបណ្តោយផ្លូវជាតិលេខ៣ ត្រង់ចំណុចស្ពានកំពង់ទួល ភូមិទឹកថ្លា សង្កាត់ក្រាំងពង្រ ខណ្ឌដង្កោ ។
សពជនរងគ្រោះ ខាងលើ មានឈ្មោះ តុម ពុទ្ធិ ភេទប្រុស អាយុ ៣៦ ឆ្នាំ មុខរបរបើកបររថយន្ត ស្នាក់នៅភូមិតាយ៉ៅ ឃុំព្រះនិពាន្វ ស្រុកគងពិសី ខេត្តកំពង់ស្ពឺ មានស្រុកកំណើត នៅភូមិពោធិព្រះសង្ឃ ឃុំតាភេម ស្រុកត្រាំកក់ ខេត្តតាកែវ ។ ចំណែកប្រពន្ធ មានឈ្មោះ គន់ ស៊ីណាត អាយុ ៣២ ឆ្នាំ មុខរបរ កម្មកររោងចក្រ ស្នាក់នៅជាមួយគ្នា។
យោងតាមប្រភពព័ត៌មានពីស្ត្រី ដែលត្រូវជាប្រពន្ធរបស់សពបុរសរងគ្រោះ ខាងលើ បានឲ្យដឹងថាៈ មុនពេលកើតហេតុ ប្តីរបស់គាត់ និងរូបគាត់ បានជិះម៉ូតូម៉ាកហុងដា សេ១២៥ ស៊េរីឆ្នាំ២០២២ ពណ៌ខ្មៅ ពាក់ផ្លាកលេខ កំពង់ចាម 1AB-9507 ឌុបគ្នាធ្វើដំណើរចេញ ពីផ្ទះជួល ដើម្បីឆ្ពោះទៅរោងចក្រ នៅឯតំបន់សេដ្ឋកិច្ចពិសេស ក្រាំងពង្រ ក្នុងទិសដៅពី ខាងត្បូង ទៅខាងជើង ខណ:ពេលដល់ចំណុចស្ពានកំពង់ទួល បានប្តីរបស់គាត់ បានបត់ម៉ូតូ បម្រុងនឹងត្រឡប់ទៅផ្ទះជួលវិញ ដោយភ្លេចមួកសុវត្ថិភាព ខណៈមកដល់ចុងស្ពាន ខាងត្បូង ដោយប្រញាប់ទៅយកមួកសុវត្ថិភាព ដោយបុរសខាងលើ បានបើកម៉ូតូ ក្នុងល្បឿនលឿន ក្នុងទិសដៅពីខាងត្បូង ទៅខាងជើង គេចពីរថយន្តកុងតីន័រ ដែលនៅខាងមុខ បានរេចង្កូត ទៅបុកបង្កាន់ដៃស្ពាន បោកក្បាលស្លាប់ភ្លាមៗ នៅកន្លែងកើតហេតុតែម្តង។ ចំណែកស្ត្រីដែល ជាប្រពន្ធ រួមដំណើរនៅខាងក្រោយប្តីរបស់គាត់ រងរបួសស្រាល។
ក្រោយកើតហេតុ កម្លាំងប៉ុស្តិ៍នគរបាលក្រាំងពង្រ និងកម្លាំងជំនាញចរាចរណ៍ នៃអធិការដ្ឋាននគរបាលខណ្ឌដង្កោ ចុះទៅពិនិត្យនិងវាស់វែង រួចធ្វើកំណត់ហេតុប្រគល់សពឱ្យទៅក្រុមគ្រួសារ យកទៅធ្វើបុណ្យតាមប្រពៃណី នៅឯស្រុកកំណើត៕
ដោយ៖សហការី
