សារព័ត៌មាន នគរវត្ត តែងតែនាំមុខគេជានិច្ច
ខេត្តស្ទឹងត្រែង ៖ នៅរសៀលថ្ងៃទី៣ ខែមិថុនា ២០២២ ភ្លៀងធ្លាក់យ៉ាងខ្លាំង និងមានលាយឡំដោយផ្គររន្ទះផងនោះ បានបាញ់ត្រូវសត្វគោរបស់ប្រជាពលរដ្ឋនៅក្នុងភូមិសាមឃួយ ឃុំសាមឃួយ ស្រុកសេសាន ខេត្តស្ទឹងត្រែង ងាប់៨ក្បាល។
ប្រជាពលរដ្ឋភូមិសាមឃួយជាម្ចាស់គោ បានឲ្យដឹងថា នៅវេលាម៉ោងជិត៤ រសៀលមានធ្លាក់ភ្ញៀងយ៉ាងខ្លាំងដោយលាយឡំជាមួយផ្គរន្ទះផង ក្រោយពីមេឃបានរាំងភ្លៀងពួកគាត់បានចេញទៅមើលគោដែលលែងឱ្យស៊ីស្មៅនៅខាងក្រោយភូមិ ក៏បានឃើញសត្វគោងាប់គរជើង៨ក្បាល។
ប្រជាពលរដ្ឋនៅភូមិខាងលើ បានឲ្យដឹងថា ចំណោមសត្វគោដែលត្រូវរន្ទះបាញ់ងាប់នោះ មានគោលោកមេភូមិចំនួន៧ក្បាល និងគោអ្នកភូមិមួយក្បាល។
អាជ្ញាធរបានអំពាវនាវដល់ប្រជាពលដែលមានសត្វគោ ក្របី គួរត្រូវធ្វើរោង ឬក្រោលសម្រាប់ថែទាំឲ្យបានត្រឹមត្រូវ ដើម្បីកុំឲ្យមានការបាត់បង់ដោយគ្រោះធម្មជាតិបែបនេះទៀត៕
ដោយ៖ សូរិយា
