សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល ៖ ប្រភពចច្បាស់ការណ៍ពី សមត្ថកិច្ចនគរបាលក្រសួងមហាផ្ទៃបានឱ្យដឹងថា អតីតស្នងការរងខេត្តកណ្ដាល លោកឧត្ដមសេនីយ៍ត្រី ស្រេង សុខា ត្រូវបានសមត្ថកិច្ចនគរបាលព្រហ្មទណ្ឌ ក្រសួងមហាផ្ទៃចាប់ខ្លួននៅថ្ងៃទី១២ ខែ មិថុនា ឆ្នាំ២០២២នេះ នៅក្នុងភូមិសាស្ត្រខេត្តកំពង់ស្ពឺ រួចបញ្ជូនទៅកាន់ពន្ធនាគារខេត្តកណ្ដាល យោងតាមដីកាបង្គាប់ឱ្យចាប់ខ្លួនរបស់លោក រស់ ផុនចាន់និមល ចៅក្រមស៊ើបសួរសាលាដំបូងខេត្តកណ្តាល ដែលបានចេញកាលពីថ្ងៃទី២៩ ខែវិច្ឆិកា ឆ្នាំ២០២១ ។
គេនៅចាំបានថា កាលពីថ្ងៃទី២៩ ខែមិថុនា ឆ្នាំ២០១៩ កន្លងទៅ លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងពុករលួយ ហៅកាត់ថា ACU ប្រកាសថា ការសម្ងែងទ្រព្យសម្បត្តិដ៏សន្ធឹកសន្ធាប់របស់លោកឧត្តមសេនីយ៍ត្រី ស្រេង សុខា ស្នងការរងនគរបាលខេត្តកណ្តាល គឺមិនជាប់ពាក់ព័ន្ធនឹងអំពើពុករលួយទេ ។
កាលនោះនៅក្នុងសន្និសីទកាសែតមួយ លោក ឱម យ៉ិនទៀង ថ្លែងថា “គាត់ខុស គឺ ការសម្ញែងទ្រព្យ ។ នៅហុងកុង នៅប្រទេសមួយចំនួនទៀត ច្បាប់ប្រឆាំងអំពើពុករលួយដាក់ទោសមន្ត្រីរាជការ ដែលសម្ញែងទ្រព្យជាប់គុក ។ ប៉ុន្តែស្រុកខ្មែរអត់ជាប់គុកទេ គ្រាន់តែរាជរដ្ឋាភិបាលបណ្ដេញចេញ ។ នៅកម្ពុជាអត់មានច្បាប់ដាក់គុកករណីសម្ញែងទ្រព្យនោះទេ”។
ទោះបីយ៉ាងណា នៅពេលនេះលោក ស្រេង សុខា បានលេចចេញបញ្ហាដ៏ធំមួយទៀតហើយ គឺការរំលោភដីរដ្ឋជាង២០ហិកតាក្នុងចំណោមដីរដ្ឋសរុបជាង៤០ហិកតា នៅក្នុងភូមិកោះគ សង្កាត់រកាខ្ពស់ ក្រុងតាខ្មៅ ខេត្តកណ្តាល ។ ប៉ុន្តែ បញ្ហានេះ លោកស្រេង សុខា បានចេញមុខបដិសេធភ្លាមៗផងដែរ ។
រឿងរ៉ាវនេះ គឺធ្លាយចេញពីមាត់លោកម៉ៅ ភិរុណ កាលជំនាន់នៅជាអភិបាលខេត្តកណ្តាល ដែលបច្ចុប្បន្នជាប្រធានក្រុមប្រឹក្សាខេត្តកណ្តាល បានបញ្ជាឱ្យលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាលធ្វើយ៉ាងណាដកតំណែងលោកឧត្តមសេនីយ៍ត្រី ស្រេង សុខា ស្នងការរងខេត្តកណ្តាលឱ្យទាល់តែបាន ព្រោះថ្លើមធំខ្លាំងណាស់ ហ៊ានយកឈ្មោះរបស់លោកបញ្ជាចៅសង្កាត់រកាខ្ពស់ឱ្យកាត់ដីរដ្ឋជាង២០ហិកតា ក្នុងដីរដ្ឋសរុបជាង៤០ហិកតា។
លោក ម៉ៅ ភិរុណ ក្នុងតំណែងជាអភិបាលខេត្តកណ្តាលនៅឡើយបានបញ្ជាចំពោះមុខលោកឧត្តមសេនីយ៍ទោឈឿន សុចិត្ត និងកណ្តាលចំណោម មនុស្សជាង៧០០នាក់កាលពីថ្ងៃទី២ ខែមីនា ឆ្នាំ២០២០ ក្នុងពិធីសន្និបាតបូកសរុបលទ្ធផលការងារប្រចាំឆ្នាំ២០១៩ និងលើកទិសដៅការងារឆ្នាំ២០២០ របស់រដ្ឋបាលខេត្តកណ្ដាល ។
ជុំវិញបញ្ហានេះ លោកឧត្តមសេនីយ៍ទោឈឿន សុចិត្ត ស្នងការនគរបាលខេត្តកណ្តាល បានថ្លែងប្រាប់អង្គភាព មជ្ឈមណ្ឌលសារព័ត៌មាន”នគរវត្ត” កាលពីរសៀលថ្ងៃទី៥ ខែមីនា កន្លងទៅ ថា លោក ម៉ៅ ភិរុណ ពិតជាបានបញ្ជាលោកបែបនេះមែន ។ លោក ឈឿន សុចិត្ត អះអាងថា ពេលនេះលោកកំពុងចាត់ការករណីនេះហើយ ។
ដោយឡែកមជ្ឈមណ្ឌលសារព័ត៌មាន”នគរវត្ត” នៅពុំទាន់សុំការបញ្ជាក់បន្ថែមទៀតពីលោក ម៉ៅ ភិរុណ អតីតអភិបាលខេត្តកណ្តាល និងលោក ឈឿង ឆូ ចៅសង្កាត់រកាខ្ពស់បាននៅឡើយទេ ដោយសារគ្មានលេខទូរស័ព្ទ។
ប្រភពព័ត៌មានច្បាស់ការណ៍ថ្លែងប្រាប់ ថា លោកឧត្តមសេនីយ៍ត្រី ស្រេង សុខា ស្នងការរងខេត្តកណ្តាល បានយកអំណាចខ្លួននិងយកឈ្មោះលោក ម៉ៅ ភិរុណ កាលនៅជាអភិបាលខេត្តកណ្តាល ទៅគំរាមលោកឈឿង ឆូ ចៅសង្កាត់រកាខ្ពស់ឱ្យសុីញ៉េយកដីសម្បត្តិរដ្ឋ ជាង២០ហិកតា ក្នុងដីរដ្ឋសរុបជាង៤០
ហិកតា នៅភូមិកោះគ សង្កាត់រកាខ្ពស់ ក្រុងតាខ្មៅ ខេត្តកណ្តាល ។
ទោះបីយ៉ាងណា ក្រោយមានការផ្សព្វផ្សាយព័ត៌មានទាំងនេះ លោក ស្រេង សុខា បានចេញមុខបដិសេធភ្លាមៗថា លោកមិនបានរំលោភយកដីរដ្ឋដូចការចោទប្រកាន់ទេ ហើយក៏មិនបានប្រើឈ្មោះលោក ម៉ៅ ភិរុណ ដើម្បីគំរាម លោក ឈឿង ឆូ ចៅសង្កាត់រកាខ្ពស់ឱ្យសុីញ៉េយកដីសម្បត្តិរដ្ឋជាង២០ហិកតាដែរ ។
លោកអះអាងថា ដីទាំងនេះគឺជារបស់លោកដែលបានទិញជាយូរមកហើយ ហើយអ្វីៗធ្វើតាមនីតិវិធី នៃច្បាប់ភូមិបាលទាំងអស់ ។
ទីបំផុត ! អតីតស្នងការរងខេត្តកណ្ដាល លោកឧត្ដមសេនីយ៍ត្រី ស្រេង សុខា ត្រូវបានសមត្ថកិច្ចនគរបាលព្រហ្មទណ្ឌ ក្រសួងមហាផ្ទៃចាប់ខ្លួននៅថ្ងៃទី១២ ខែ មិថុនានេះ អាចបញ្ជូនដាក់ពន្ធនាគារ ខេត្តកណ្តាលតាមអំណាចដីកាចៅក្រមស៊ើបសួរសាលាដំបូងខេត្តកណ្ដាល ។
និយាយរួម បុគ្គលរូបនេះមានរឿងអាស្រូវច្រើនណាស់ ដែលថ្នាក់ដឹកនាំបានចេញលិខិតព្រមានជាញឹកញាប់៕
ដោយ ៖ សិលា
