សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មានការភ្ញាក់ផ្អើលដល់សិស្សគ្រប់ៗគ្នាចេញមកមើល បន្ទាប់ពីក្មេងស្រីសិស្សសាលាម្នាក់ស្រែកឱ្យជួយព្រោះបាត់ម៉ូតូក្រោយចុះពីលើថ្នាក់រៀនក្នុងគោលបំណងត្រឡប់ទៅផ្ទះតែមិនឃើញម៉ូតូក៏រាយការណ៍ទៅសមត្ថកិច្ចមូលដ្ឋានមកជួយធ្វើអន្តរាគមន៍។
ហេតុការណ៍នេះបានកើតឡើងកាលពីវេលាម៉ោង៩និង១០នាទីព្រឹកថ្ងៃទី១២ ខែមិថុនា ឆ្នាំ២០២២ នៅចំណុចវិទ្យាល័យស្វាយរៀង អគារ(ញ)ស្ថិតក្នុងភូមិស្រះវង្ស សង្កាត់ស្វាយរៀង ក្រុងស្វាយរៀង ខេត្តស្វាយរៀង។
យោងតាមសមត្ថកិច្ចនគរបាលក្រុងស្វាយរៀងបានឱ្យដឹងថា ម្ចាស់ម៉ូតូមានឈ្មោះ រុន ណារី អាយុ១៦ឆ្នាំ មុខរបរ សិស្ស រស់នៅភូមិតារាងបាល់ សង្កាត់គយត្របែក ក្រុងស្វាយរៀង ខេត្តស្វាយរៀង។
ចំណែកម៉ូតូដែលចោរកាច់កយកទៅបាត់នោះម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០២២ ពាក់ស្លាកលេខ ស្វាយរៀង ១S-៥០៦៤ ។
បើតាមក្មេងស្រីម្ចាស់ម៉ូតូបានឱ្យដឹងថាមុនកើតហេតុនាងបានជិះម៉ូតូម៉ាកហុងដាឌ្រីម សេ១២៥ ពណ៌ខ្មៅស៊េរីឆ្នាំ២០២២ ពាក់ស្លាកលេខ ស្វាយរៀង ១S-៥០៦៤ ចេញពីផ្ទះនៅភូមិតារាងបាល់ សង្កាត់គយត្របែក ក្រុងស្វាយរៀងមកវិទ្យាល័យស្វាយរៀងដើម្បីរៀនគួរ ហើយក៏បានចាក់សោនិងបញ្ឈរទុកនៅខាងក្រោម រួចឡើងទៅរៀននៅជាន់ខាងលើអគារ(ញ)។
ប្រភពបន្តថា ក្រោយពីរៀនគួរចប់នាងនិងមិត្តភក្តិក៏បានចុះពីលើអគារវិញស្រាប់តែមិនឃើញម៉ូតូក៏មានការភ្ញាក់ផ្អើលឆោឡោនិងរាយការណ៍ទៅសមត្ថកិច្ចកងរាជអាវុធហត្ថក្រុងស្វាយរៀងតែម្ដង។
បច្ចុប្បន្នកម្លាំងកងរាជអាវុធហត្ថក្រុងស្វាយរៀងកំពុងធ្វើការស្រាវជ្រាវរកមុខសញ្ញាដើម្បីចាត់ការតាមច្បាប់ឱ្យខាងតែបាន៕
ដោយ៖យឹម សុថាន
