សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនជាតិជប៉ុនម្នាក់បានធ្វើដំណើរកម្សាន្តនៅតាមសួនច្បារមាត់ទន្លេ ត្រូវក្រុមចោរវាយប្លន់យកទ្រព្យសម្បត្តិបានសម្រេចអស់ប្រហែល១០មុឺនដុល្លារ បង្កការភ្ញាក់ផ្អើលនៅវេលាម៉ោង៤និង៣០នាទីទៀបភ្លឺ ថ្ងៃទី២៣ ខែមិថុនា ឆ្នាំ២០២២ នៅចំណុចសួនច្បារមាត់ទន្លេ តាមបណ្ដោយវិថីព្រះស៉ីសុវត្ថិ កែងផ្លូវលេខ១៣៦ សង្កាត់ផ្សារកណ្តាលទី១ ខណ្ឌដូនពេញ រាជធានីភ្នំពេញ។
ជនរងគ្រោះជាបុរសជនជាតិជប៉ុន មិនទាន់ស្គាល់អត្តសញ្ញាណនៅឡើយទេ មានវ័យជាង៣០ឆ្នាំ បានបាត់បង់ទ្រព្យសម្បត្តិរួមមាន៖ ខ្សែកពេជ្រ០១ខ្សែ នាឡិកាមួយ ចិញ្ចៀនពេជ្រ០១វង់ និងលុយមួយចំនួន ។ ជនរងគ្រោះបានប្រាប់ថា ខ្សែកមានតម្លៃជិត៦ម៉ឺនដុល្លារ ឯនាឡិកាមាសដាំពេជ្រ ម៉ាកRolex តម្លៃជាង៤ម៉ឺនដុល្លារ ។
ក្រោយកើតហេតុ សមត្ថកិច្ចមូលដ្ឋានបានឃាត់ខ្លួនស្ត្រីម្នាក់ដែលជាអ្នកល្បួងជនរងគ្រោះទៅអង្គុយកន្លែងស្ងាត់ បន្ទាប់មកក៏មានបុរសមួយក្រុមចូលមកប្លន់ជនរងគ្រោះ ។ បច្ចុប្បន្ន ជនរងគ្រោះបានទៅដាក់ពាក្យបណ្ដឹងនៅប៉ុស្តិ៍នគរបាលផ្សារកណ្តាលទី១ ក្រែងចាប់ពួកនោះបាន ហើយបានទ្រព្យសម្បត្តិមកវិញ ៕
ដោយ ៖ ភារ៉ា ដង្កោ
