កម្លាំងចម្រុះ ចុះបង្ក្រាបការនេសាទដោយឧបករណ៍ខុសច្បាប់ និងលែងកូនត្រីចំរុះទម្ងន់៣០គីឡូក្រាមក្នុងភូមិសាស្ត្រខេត្តពោធិ៍សាត់

ចែករំលែក៖

ខេត្តពោធិ៍សាត់៖ កម្លាំងចម្រុះនៃ អនុគណៈកម្មការ និងក្រុមការងារបង្ក្រាបបទល្មើសជលផលក្នុងដែនភូមិសាស្ត្រខេត្តពោធិ៍សាត់ ដឹកនាំដោយលោក ឡាយ វិសិដ្ឋ ប្រធានមន្ទីរកសិកម្មរុក្ខា ប្រមាញ់ និងនេសាទខេត្តពោធិ៍សាត់ រួមមាននាយខណ្ឌរដ្ឋបាលជលផលពោធិ៍សាត់ នាយផ្នែក នាយ-នាយរងសង្កាត់ បរិស្ថានប្រចាំ ស្រុកកណ្ដៀង កងរាជអាវុធហត្ថស្រុកកណ្ដៀង យោធាខេត្ដ នគរបាលប្រឆាំងបទល្មើសសេដ្ឋកិច្ចខេត្ត និងនគរបាលប៉ុស្ដិ៍រាំងទិល សហការជាមួយក្រុម ការងារថ្នាក់ជាតិបង្ក្រាបបទល្មើសជលផលដឹកនាំដោយ លោកឧត្តមសេនីយ៍ទោ ជា សំណាង នាយសេនាធិការរងកងរាជអាវុធហត្ថលើផ្ទៃប្រទេស និង លោកវរសេនីយ៍ឯក សុខ ជា តំណាងអគ្គស្នងការនគរបាលជាតិ កម្លាំងអធិការដ្ឋានរដ្ឋបាលជលផលខាងត្បូងបឹងទន្លេសាប ដែលមានកម្លាំងសរុបចំនួន ៣៨នាក់ ប្រើប្រាសលមធ្យោបាយកាណូតចំនួន ៨គ្រឿង នៅព្រឹកថ្ងៃសុក្រ ១០រោច ខែជេស្ឋ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃ២៤ ខែមិថុនា ឆ្នាំ ២០២២នេះ បានចុះរុះរើរបាំងសាច់អួនក្រឡាល្អិត ចាប់ពីភូមិព្រែក ឃុំ រាំងទិល ស្រុកកណ្ដៀងរហូតដល់ កោះក្របបាយ ស្រុកបាកាន ខេត្តពោធិ៍សាត់ ។

បើតាមការបញ្ជាក់ពីលោកវរសេនីយ៍ឯក សៀន វីរៈ នាយការិយាល័យនគរបាលប្រឆាំងបទល្មើសសេដ្ឋកិច្ច បានឱ្យដឹងថា ក្នុងកិច្ចសហការប្រតិបត្តិការ ចុះបង្ក្រាបនេះដែរ កម្លាំងសមត្ថកិច្ច បានរុះរើ បំផ្លាញចោលទីតាំងនេសាទខុសច្បាប់មួយកន្លែង រុះរើ របាំងសាច់អួនក្រឡាល្អិតចំនួន២៦ខ្សែ ប្រវែង៤៤០០ម៉ែត្រ លូកងសាច់អួនចំនួន១៣គ្រឿង លូកងស្បៃមុងចំនួន ០៣ មាត់ ក្បាលបរ ចំនួន ០៥គ្រឿង បង្គោល ចំនួន ៧៥០ដើម និងបានចាក់លែងកូនត្រីចំរុះទម្ងន់ ៣០គីឡូក្រាម ចូលក្នុងទន្លេវិញ ។

លោកវរសេនីយ៍ឯក សៀន វីរៈ បន្ថែមថា៖ ដោយអនុវត្តតាមទិសដៅការងាររបស់ក្រុមការងារ ប្រតិបត្តិការនេះ នឹងបន្ដសហការចុះបង្ក្រាបបទល្មើសនេសាទខុសច្បាបលឲ្យដូចភ្លៀងរលឹមនៅរដូវបិទនេសាទនេះ ៕