ព័ត៌មានទាន់ហេតុការណ៍៖

នគរបាលខណ្ឌឫស្សីកែវឃាត់ខ្លួនជនសង្ស័យម្នាក់ពីបទប្រើដៃវាយជនរងគ្រោះប្លន់យកម៉ូតូ

ចែករំលែក៖

ភ្នំពេញ៖ កម្លាំងនគរបាលខណ្ឌឫស្សីកែវបានធ្វើការឃាត់ខ្លួនជនសង្ស័យម្នាក់និងស្រាវជ្រាវរកបក្ខពួកដែលនៅសេសសល់ពីបទប្រើហិង្សាដោយយកដៃវាយជនរងគ្រោះប្លន់យកម៉ូតូបានសម្រេចនៅថ្ងៃទី២៥ ខែមិថុនា ឆ្នាំ២០២២ វេលាម៉ោង៥និង០០នាទី​ល្ងាច នៅចំណុចផ្លូវជាតិលេខ៥ ក្នុងភូមិ២១ សង្កាត់ស្រះចក ខណ្ឌដូនពេញ ។ 

    ជនរងគ្រោះឈ្មោះពុធ សៅ ភេទប្រុស​ អាយុ៥៥ឆ្នាំ មុខរបរលក់ដូរ ស្នាក់នៅផ្ទះជួល ក្នុងក្រុម៨ ផ្លូវលេខ៩៩ ភូមិទួលសងែ្ក សង្កាត់ទួលសងែ្ក១ ខណ្ឌឫស្សីកែវ  រាជធានីភ្នំពេញ ។ 

    ចំណែកជនសង្ស័យឈ្មោះណាំ ប៊ុនឆេង  ភេទប្រុស អាយុ១៨ឆ្នាំ មុខរបរមិនពិតប្រាកដ​  ស្នាក់នៅបន្ទប់ជួលក្នុងភូមិ២១ ផ្លូវជាតិលេខ៥ សង្កាត់ស្រះចក ខណ្ឌដូនពេញ (មានសារធាតុញៀន) អវិជ្ជមានកូវីដ-១៩ 

     *សម្ភារបាត់បង់រួមមានម៉ូតូ១គ្រឿងម៉ាកហុងដាឌ្រីម C125 ពណ៌ខ្មៅ (ស្លាកលេខជនរងគ្រោះមិនចាំ ព្រោះបាត់កាតគ្រីម៉ូតូ )។                               

     លោកវរសេនីយ៍ឯក ហ៊ាង ថារ៉េត អធិការនគរបាលខណ្ឌឫស្សីកែវបានឱ្យដឹងថា នៅថ្ងៃទី១៨ ខែមិថុនាឆ្នាំ២០២២ វេលាម៉ោង៣:៣០នាទីទៀបភ្លឺនៅចំណុចផ្លូវ៩៩ ភូមិទួលសងែ្ក ជនរងគ្រោះបានជិះមកពីទិញលៀសនៅផ្សារដើមគត្រលប់ទៅផ្ទះវិញ ស្រាប់តែមានជនសង្ស័យចំនួន០៣នាក់ជិះម៉ូតូ០១គ្រឿងម៉ាកអុិចសុីនទរ័ បានមកធ្វើសកម្មភាពធាក់ម៉ូតូបណ្តាលឱ្យដួល រួចវាយដោយដៃទៅលើជនរងគ្រោះប្លន់យកម៉ូតូ០១គ្រឿងបានសំរេច ហើយក៏រត់គេចខ្លួនបាត់ទៅ។បន្ទាប់មកជនរងគ្រោះបានមកដាក់ពាក្យបណ្តឹងនៅប៉ុស្តិ៍ទួលសង្កែទី១។ ក្រោយទទួលបណ្តឹងហើយ កម្លាំងជំនាញខណ្ឌនិងប៉ុស្តិ៍បានចុះធើ្វការស្រាវជ្រាវ និងឃាត់ខ្លួនបានជនសង្ស័យ១នាក់នៅថ្ងៃទី២៥ ខែមិថុនា ឆ្នាំ២០២២ វេលាម៉ោង៥:០០នាទីល្ងាច នៅចំណុចផ្លូវជាតិលេខ៥ ភូមិ២១ សង្កាត់ស្រះចក ខណ្ឌដូនពេញ ។

   នៅចំពោះមុខ កម្លាំងជំនាញអធិការដ្ឋាននគរបាលខណ្ឌឫស្សីកែវបន្តស្រាវជ្រាវរកបក្ខពួកដែលនៅសេសសល់និងម៉ូតូជនរងគ្រោះជាបន្តទៀត។  ចំណែកជនសង្ស៍យដែលឃាត់ខ្លួនបាន សមត្កិច្ចបានកសាងសំណុំរឿងបញ្ជូនទៅតុលាការតាមនីតិវិធីច្បាប់ ៕

ដោយ ៖ ជីណា


ចែករំលែក៖