សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ មនុស្សប្រុសស្រីបីនាក់បានស្លាប់ភ្លាមៗនៅនឹងកន្លែងខណៈជួបគ្រោះថ្នាក់ចរាចរណ៍រវាងរថយន្តនឹងម៉ូតូ។ គ្រោះថ្នាក់ចារចរណ៍នេះបានកើតឡើងកាលពីវេលាម៉ោង៧និង១៥នាទីយប់ថ្ងៃទី២៦ខែមិថុនាឆ្នាំ២០២២ នៅតាមបណ្តោយផ្លូវជាតិលេខ៤៤ត្រង់ចន្លោះគីឡូម៉ែត្រលេ៣៣-៣៤ស្ថិតក្នុងភូមិតាំងរបង ឃុំហោងសំណំ ស្រុកឱរ៉ាល់ ខេត្តកំពង់ស្ពឺ។
នគរបាលស្រុកឱរ៉ាល់បានឱ្យដឹងថាជនរងគ្រោះទាំងបីនាក់មាន១-ឈ្មោះ សៀក ប៊យ ភេទប្រុស អាយុ៥៦ឆ្នាំ, ២-ឈ្មោះ វៀង ឡុង ភេទស្រី អាយុ៤៥ឆ្នាំត្រូវជាប្រពន្ឋ, ៣-ឈ្មោះ ប៊យ វិច្ឆិកា ភេទស្រី អាយុ៤ឆ្នាំ(កូន) អ្នកទាំងបីរស់នៅភូមិជំនាប់ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ ជិះម៉ូតូមួយគ្រឿងម៉ាកHONDA DREAM សេ១២៥ ស៊េរីឆ្នាំ២០១៦ ពណ៌ខ្មៅ ពាក់ស្លាកលេខកំពង់ស្ពឺ 1H -5042 បើកបរដោយឈ្មោះសៀក ប៊យ (ប្តី) ឌុបប្រពន្ឋនិងកូនពីទិសខាងត្បូងទៅទិសខាងជើងបម្រុងបត់ឆ្វេងឆ្លងថ្នល់ទៅទិសខាងលិចត្រូវរថយន្តមួយគ្រឿងមិនស្គាល់ម៉ាកមិនស្គាលអត្តសញ្ញាណអ្នកបើកបរមកបុកនិងកិនពេញទំហឹងបណ្តាលឱ្យស្លាប់ភ្លាមៗនៅនឹងកន្លែងតែម្តង។
ប្រភពបានបន្តទៀតថា ក្រោយកើតហេតុមន្ត្រីជំនាញបានធ្វើការវាស់វែងនិងប្រគល់សពជនរងគ្រោះទាំងបីនាក់ឱ្យក្រុមគ្រួសារយកទៅធ្វើបុណ្យតាមប្រពៃណី និងបន្តស្រាវជាវរថយន្តបង្ក។ ចំណែកវត្ថុតាងម៉ូតូយកទៅរក្សាទុកនៅអធិការដ្ឋាននគរបាលស្រុកឱរ៉ាល់៕
ដោយ៖ចន្ទ លីហ្សា
