សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ រដ្ឋបាលក្រុងព្រះសីហនុ ដាក់ឱសានវាទ ឲ្យរុះរើ កន្លែងលក់ដូរ តាមឆ្នេរសមុទ្រ និងផ្លូវសាធារណៈ ត្រឹមថ្ងៃទី៧ កក្កដា ខាងមុខនេះ ។ ឱសានវាទនេះ បានត្រូវប្រកាសផ្សាយ តាមសេចក្តីជូនដំណឹងមួយ របស់សាលា ក្រុងព្រះសីហនុ ដល់អ្នកលក់ដូរ គ្មានសណ្តាប់ធ្នាប់ នៅតាមបណ្តោយឆ្នេរសមុទ្រ កាលពីព្រឹកថ្ងៃទី២៦ ខែមិថុនា ឆ្នាំ២០២២ នេះ។
នៅក្នុងសេចក្ដីជុនដំណឹងនោះ រដ្ឋបាលក្រុងព្រះសីហនុ បានហាមឃាត់ មិនឲ្យ ពលរដ្ឋ អ្នកលក់ដូរ ដាក់តុ កៅអី និងដាក់ចង្ក្រានដាំស្ល ម្ហូបអាហារ លក់ដូរតាម ឆ្នេរសាធារណៈ ឬក៏តាមផ្លូវក្បែរឆ្នេរសមុទ្រ ដើម្បីរក្សាទុកបរិស្ថានអនាម័យ ជូនប្រជាពលរដ្ឋ ភ្ញៀវទេសចរ ដើរលេងកម្សាន្ត ។
បើតាមមន្ត្រីរដ្ឋបាលក្រុងព្រះសីហនុ បានបញ្ជាក់ថា អាជ្ញាធរក្រុងព្រះសីហនុ ទុកពេលឲ្យ បងប្អូនប្រជាពលរដ្ឋ ដែលដាក់តុ ដាក់កៅអី និងដាក់ចង្ក្រានដាំស្ល ម្ហូបអាហារ នៅលើឆ្នេរ សាធារណៈ ឬតាមផ្លូវក្បែរឆ្នេរសមុទ្រ រុះរើសម្អាតឡើងវិញ ក្នុងនោះយ៉ាងយូរ ត្រឹមថ្ងៃទី៧ ខែកក្កដា ឆ្នាំ២០២២ អាជ្ញាធរ នឹងចុះអនុវត្តន៍ វិធានការរដ្ឋបាល ដើម្បីថែរក្សាបរិស្ថាន សណ្ដាប់ធ្នាប់ និងសោភ័ណភាពឆ្នេរ ឡើងវិញហើយ៕
ដោយ៖សហការី
