សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ក្រោមការដឹកនាំបញ្ជាផ្ទាល់ពីសំណាក់លោកវរសេនីយ៍ទោ លៀក ចាន់រាបសា អធិការនគរបាលខណ្ឌជ្រោយចង្វា កម្លាំងប៉ុស្តិ៍សហការជាមួយកម្លាំងអធិការដ្ឋានខណ្ឌជ្រោយចង្វា បានធ្វើការឃាត់ខ្លួនជនសង្ស័យម្នាក់ ពាក់ព័ន្ធករណីលួចដោះយក “ស្លាកលេខរថយន្ត” របស់ប្រជាពលរដ្ឋ កាលពីវេលាម៉ោង១ និង៣០នាទីយប់រំលងអធ្រាត្រឈានចូល ថ្ងៃទី២៧ ខែមិថុនា ឆ្នាំ២០២២ នៅចំណុចផ្លូវបេតុង ភូមិខ្ទរ សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ។
ជនសង្ស័យមានឈ្មោះ ជៀប សាវឿន ភេទប្រុស អាយុ ៤០ឆ្នាំ ស្នាក់នៅសង្កាត់ទួលសង្កែ ខណ្ឌជ្រោយចង្វា រាជធានីភ្នំពេញ មុខរបរ មិនពិតប្រាកដ។
សមត្ថកិច្ចបានឱ្យដឹងថា នៅវេលាម៉ោង១ និង៣០នាទីយប់ឈានចូលថ្ងៃទី២៧ ខែមិថុនា ឆ្នាំ២០២២ ជនសង្ស័យម្នាក់ខាងលើនេះ បានធ្វើសកម្មភាពលួចដោះយក “ស្លាកលេខរថយន្ត” របស់ប្រជាពលរដ្ឋ នៅចំណុចផ្លូវបេតុង ភូមិខ្ទរ សង្កាត់ព្រែកលៀប ខណ្ឌជ្រោយចង្វា ត្រូវបានកម្លាំងប៉ុស្តិ៍សហការជាមួយកម្លាំងអធិការដ្ឋាន ធ្វើការឃាត់ខ្លួនបាន និងនាំខ្លួនមកកាន់អធិការដ្ឋានជ្រោយចង្វាតែម្តង។ សម្រាប់សម្ភារដកហូតបាន រួមមាន៖ កូនសោសម្រាប់ធ្វើសកម្មភាពលួចមួយចំនួន ស្លាកលេខរថយន្តចំនួន ០២សន្លឹក ទូរស័ព្ទដៃអិនចុចពិលចំនួន ០១គ្រឿង និងដុំសាក Power bank ចំនួន ០១គ្រឿង។
បច្ចុប្បន្ន ជនសង្ស័យខាងលើនេះ ត្រូវបានឃាត់ខ្លួននៅ ផ្នែកជំនាញ នៃអធិការដ្ឋាននគរបាលខណ្ឌជ្រោយចង្វា ដើម្បីកសាងសំណុំរឿង បញ្ជូនបន្តចាត់ការតាមនីតិវិធី៕
ដោយ ៖ រ៉ារ៉ា
