សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីយោងតាមប្រភពព័ត៌មានពីស្នងការដ្ឋាននគរបាលរាជធានីភ្នំពេញ បានឱ្យដឹងថា ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ បន្ទាប់ពីបានឃើញគណនីហ្វេសប៊ុកឈ្មោះ Sing Manee បានបង្ហោះសារមានខ្លឹមសារចោទប្រកាន់លើសមត្ថកិច្ចដែលកំពុងអនុវត្តច្បាប់ចរាចរណ៍ផ្លូវគោក នៅចំណុចស្តុបឈ្នះៗ (ស្តុបលីយ៉ុងផាត់) កាលពីថ្ងៃទី២៥ ខែមិថុនា ឆ្នាំ២០២២ សមត្ថកិច្ចបានធ្វើការស្រាវជ្រាវ និងស្វែងរកអត្តសញ្ញាណបុគ្គលនេះ។
បន្ទាប់ពីឃេីញដូចនេះសមត្ថកិច្ចនៃអធិការដ្ឋាននគរបាលខណ្ឌជ្រោយចង្វា ដឹកនាំដោយលោកវរសេនីយ៍ទោ លៀក ចាន់ រាបសា អធិការនគរបាលខណ្ឌជ្រោយចង្វា កាលពីថ្ងៃទី២៧ ខែមិថុនា ឆ្នាំ២០២២ម្សិលមិញនេះ បានកោះហៅម្ចាស់គណនីហ្វេសប៊ុកឈ្មោះ Sing Manee ឱ្យចូលខ្លួនដើម្បីសួរនាំ ហើយគាត់ក៏បានទទួលកំហុសបានបង្ហោះសារខុសពីការពិត និងធ្វើឲ្យប៉ះពាល់ដល់កិត្តិយសរបស់កងកម្លាំងពិតប្រាកដមែន។
ក្រោយពីសមត្ថកិច្ចបានធ្វើការណែនាំអប់រំ សុំទោសជាសាធារណៈ និងធ្វើកិច្ចសន្យាដោយផ្តិតមេដៃរួចមក សមត្ថកិច្ចក៏អនុញ្ញាតឲ្យគាត់ត្រឡប់ទៅគេហដ្ឋានវិញ ។
ជាមួយគ្នានោះ ស្នងការដ្ឋាននគរបាលរាជធានីភ្នំពេញ ក៏សូមចូលរួមសហការផ្សព្វផ្សាយព័ត៌មានពិត និងលុបបំបាត់ព័ត៌មានមិនពិតផងដែរ៕
ដោយ៖សហការី
