សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល៖ យោងតាមសេចក្តីរាយការណ៍ព័ត៌មានបានឱ្យដឹងថា មនុស្ស ១៨នាក់ដែលក្លែងខ្លួនជាសង្ឃហើយដែលតែងតែធ្វើសកម្មភាពដើរបិណ្ឌបាត្រយកប្រាក់ពីប្រជាពលរដ្ឋ ជាពិសេសតាមតំបន់រោងចក្រដែលមានមនុស្សច្រើននោះ ឥឡូវនេះត្រូវបានផ្ដន្ទាទោសឱ្យជាប់ពន្ធនាគាររួចរាល់ហើយ ។
តាមប្រភពបានឱ្យដឹងថា ជនទាំង១៨នាក់ខាងលើនេះត្រូវបានលោក វ៉ាន់ សុបញ្ញា និងលោកថោង ផល្លារង្សី ដែលលោកទាំងពីរជាចៅក្រមស៊ើបសួរ សាលាដំបូងខេត្តកណ្តាល បានសម្រេចចេញដីកាឃុំខ្លួនក្រុមសង្ឃក្លែងក្លាយដាក់ពន្ធនាគារបណ្តោះអាសន្នកាលពីល្ងាច ថ្ងៃទី២៨ ខែមិថុនា ឆ្នាំ២០២២។
សូមបញ្ជាក់ថា ការសម្រេចឃុំខ្លួនក្រុមសង្ឃក្លែងក្លាយទាំងនេះ គឺបន្ទាប់ពីលោក ឯក ស៊ុនរស្មី ព្រះរាជអាជ្ញារងអមសាលាដំបូងខេត្តកណ្តាលសម្រេចចោទប្រកាន់ពីបទ «ឆបោក ស្លៀកពាក់បែបព្រះពុទ្ធសាសនាដោយគ្មានសិទ្ធិប្រើប្រាស់ ឯកសារសាធារណៈក្លែង និងប្រើប្រាស់ដោយខុសច្បាប់នូវសារធាតុញៀន» តាមមាត្រា ៣៧៧ , មាត្រា ៣៧៨ និងមាត្រា៥០៨ នៃក្រមព្រហ្មទណ្ឌ និងមាត្រា៤៥ នៃច្បាប់ស្តីពីការត្រួតពិនិត្យគ្រឿងញៀន ។ បទល្មើសទាំងនេះបានប្រព្រឹត្តជាបន្តបន្ទាប់នៅថ្ងៃទី២៧ ខែមិថុនា ឆ្នាំ២០២២ តាមបណ្ដោយផ្លូវជាតិលេខ៥១ ភូមិអង្គតាសិត ឃុំទួលព្រិច ស្រុកអង្គស្នួល ខេត្តកណ្តាល។
សមត្ថកិច្ចបានឱ្យដឹងថា កម្លាំងប៉ុស្ដិ៍នគរបាលទួលព្រិចទទួលបានព័ត៌មានពីប្រជាពលរដ្ឋថា ឃើញមានរថយន្តម៉ាកតូយ៉ូតា ហាយឡេនឌ័រ ស៊េរីឆ្នាំ២០០៧ ពណ៌ទឹកមាស ពាក់ស្លាកលេខ ខេមរភូមិន្ទមួយគ្រឿងបានដឹកព្រះសង្ឃមួយចំនួនមកចុះបិណ្ឌបាត្រនៅមុខរោងចក្រតាមបណ្ដោយផ្លូវលេខ៥១ ។ បន្ទាប់ពីទទួលបានព័ត៌មាន កម្លាំងប៉ុស្ដិ៍នគរបាលទួលព្រិច សហការជាមួយកម្លាំងអន្តរាគមន៍ស្រុកអង្គស្នួលបាននិមន្តព្រះសង្ឃទាំងនោះទៅវត្តអង្គពពាយ ឃុំក្រាំងម្កាក់ ស្រុកអង្គស្នួលដើម្បីបន្តនីតិវិធី។
ក្រោយពីការសួរនាំរួច ទើបជនសង្ស័យ ឈ្មោះ ទូច វិច្ឆិកា សារភាពថា ខ្លួននិងបក្ខពួកមិនមែនជាព្រះសង្ឃពិតប្រាកដឡើយ ដោយខ្លួននិងបក្ខពួកបានពាក់ស្បង់ចីវរជាព្រះសង្ឃដើម្បីដើរបិណ្ឌបាត្រយកបច្ច័យមកដោះស្រាយជីវភាពក្នុងគ្រួសារប៉ុណ្ណោះ៕
ដោយ៖ អរុណរះ
