សៃហ្វុន រំភើបនឹងការគាំទ្រពីពលរដ្ឋខ្មែរ ទោះបីជាមិនបានមកុដ

ភ្នំពេញ៖ បេសកកម្មឡើងឆាកប្រកួតអន្តរជាតិMiss International Queen 2021របស់កញ្ញាឯកភេទទី៣ សៃ ហ្វុន បានបញ្ចប់ហើយជាមួយលទ្ធផលគួរជាទីមោទន បើទោះបីជានាងមិនទទួលបានមកុដនោះក៏ដោយ។ ស្វាមគមន៍វត្តមានមកដល់មាតុប្រទេសវិញនៅព្រឹកថ្ងៃទី២៩ ខែមិថុនា ឆ្នាំ ២០២២មានការសាទរច្រើនពីមិត្តភក្កិសាច់ញាតិ និងអ្នកគាំទ្រយ៉ាងច្រើនកុះករដោយផ្ទាល់នៅព្រលានយន្តហោះអន្តរជាតិភ្នំពេញតែម្តង។ នាងបានថ្លែងពីអារម្មណ៍រំភើបក្រោយពីទទួលបានការលើកទឹកចិត្តការគាំទ្រពីពលរដ្ឋកម្ពុជាជាច្រើនមិននឹកស្មានដល់។ 

  នាងបានលើកឡើងថាជាការពិតអ្វីដែលនាងទទួលបាននៅពេលនេះគឺជាចំណែករបស់អ្នកគាំទ្រដែលអាចឲ្យនាងឡើងដល់វគ្គ១១នាក់ចុងក្រោយ បើទោះបីជាមិនទទួលបានមកុដ ប៉ុន្តែនេះគឺត្រឹមជាឆ្នាំទី២ប៉ុណ្ណោះអាចទទួលបានលទ្ធផលល្អប្រសើរ។ នាងថានៅកម្មវិធីប្រកួតនាងជួបបញ្ហាប្រឈមខ្លះពិសេសគឺការដើរច្រើនថ្ងៃនិងត្រូវពាក់ស្បែកជើងកែងជាច្រើនម៉ោងក្នុងមួយថ្ងៃធ្វើឲ្យជើងនាងឡើងពង ប៉ុន្តែនាងនៅតែខិតខំបំពេញភារកិច្ចដោយរលូន ហើយទទួលបានទាំងពានកិត្តិយសថតរូបស្អាតពីកម្មវិធីប្រកួតខាងលើថែមទៀតផង។ អ្វីដែលធ្វើឲ្យនាងសប្បាយចិត្តនិងនឹកស្មានមិនដល់នោះគឺទំហំនៃការគាំទ្រលើកទឹកចិត្តច្រើនសើសលប់ចំពោះការចូលរួមប្រកួតមួយនេះដែលនាងមិនអាចបំភ្លេចបាន ហើយនាងនឹងយកបទពិសោធន៍នេះមកចែករំលែកដល់បេក្ខភាពបន្តទៀតរបស់កម្ពុជាដើម្បីទទួលបានលទ្ធផលល្អនៅកម្មវិធីប្រកួតវគ្គក្រោយ។ 

  គួរបញ្ជាក់ដែរថា សៃហ្វុន មានឈ្មោះដើម សុខ ប៉ូលីន អាយុ២២ ឆ្នាំ កម្ពស់១,៧៧ម៉ែត្រ មានទឹកកំណើតនៅរាជធានីភ្នំពេញ។ នាងបានគ្រងមកុដកញ្ញាឯកភេទទី៣ពីការរៀបចំកម្មវិធីប្រគួតMiss International Queen  Cambodia 2021 ។ ដោយសារការរីករាលដាលនៃជំងឺកូវីដ-១៩ កម្មវិធីប្រកួតដែលគ្រោងធ្វើឡើងនៅអំឡុងខែកញ្ញា ឆ្នាំ ២០២១ ត្រូវបានលើកពេលមកធ្វើក្នុងអំឡុងខែមិថុនាឆ្នាំ ២០២២។ សៃហ្វុនដែលមានអាជីបជាតារាបង្ហាញម៉ូតនិងជាម្ចាស់ហាងកែសម្ផស្ស នាងអាចនិយាយបានទាំងភាសាអង់គ្លេស និងភាសាថៃ ក្រៅពីភាសាកំណើត។ នាងលេចធ្លោខ្លាំងនៅលើឆាកប្រកួតមួយនេះទាំងវគ្គបង្ហាញខ្លួន វគ្គឈុតហែលទឹក វគ្គឈុតតំណាងជាតិនិងវគ្គផ្តាច់ព្រ័ត្រដែលត្រូវបានធ្វើឡើងនៅថ្ងៃទី២៥ ខែមិថុនាឆ្នាំ២០២២នេះ៕ 

ដោយ ៖ វឌ្ឍនា