ប្រជាពលរដ្ឋក្នុងស្រុកកងមាសកាន់តែមានភាពងាយស្រួល បន្ទាប់ពីទទួលបានស្ពាន និងផ្លូវបេតុងថ្មីទើបសម្ពោធដាក់ប្រើប្រាស់

ចែករំលែក៖

ខេត្តកំពង់ចាម ៖ ក្រសួងអប់រំ យុវជន និងកីឡា បានរៀបចំពិធីសម្ពោធដាក់ឱ្យប្រើប្រាស់ជាផ្លូវការស្ពានបេឡេត៍ ប្រវែង ៥៤ម៉ែត្រ និងផ្លូវបេតុងអាម៉េប្រវែង ៤៥៦ម៉ែត្រ ក្នុងភូមិដំណាក់ល្អិត ឃុំរកាគយ ស្រុកកងមាស ខេត្តកំពង់ចាម ក្រោមអធិបតីភាព លោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ព្រមទាំងមានការចូលរួមពីសំណាក់ថ្នាក់ដឹកនាំក្រសួងអប់រំ ថ្នាក់ដឹកនាំខេត្ដកំពង់ចាម អភិបាលស្រុកកងមាស និងប្រជាពលរដ្ឋនៃស្រុកកងមាសសរុបប្រមាណចំនួន ៥១២រូប នៅព្រឹកថ្ងៃទី២២ ខែកក្កដា ឆ្នាំ២០២២ ។

ថ្លែងក្នុងឱកាសនេះ លោករដ្ឋមន្ត្រីបានចូលរួមអបអរសាទរជាមួយបងប្អូនប្រជាពលរដ្ឋនៃឃុំរកាគយ ស្រុកកងមាសទាំងអស់ ក៏ដូចជាប្រជាពលរដ្ឋទូទៅ ដែលទទួលបានស្ពាន និងផ្លូវថ្មីសម្រាប់បម្រើដល់ការធ្វើដំណើរ ការដឹកជញ្ជូនកសិផល និងការកាត់បន្ថយពេលវេលាដែលត្រូវវៀងឆ្ងាយផងដែរ។

ឆ្លៀតក្នុងឱកាសនេះ លោករដ្ឋមន្ត្រី បានកោតសរសើរ និងវាយតម្លៃខ្ពស់ចំពោះ លោកអភិបាល នៃគណៈអភិបាលខេត្តកំពង់ចាម លោកអភិបាលស្រុក និងសហការីក្រុមការងារទាំងអស់ ដែលបានផ្តល់កិច្ចសហការ និងគាំទ្រយ៉ាងសកម្មនៅក្នុងការគ្រប់គ្រងការរីករាលដាលនៃជំងឺកូវីដ-១៩ នៅក្នុងមូលដ្ឋាននៃស្រុកកងមាស ខេត្តកំពង់ចាម បានល្អ ព្រមទាំងការចូលរួមរបស់អាជ្ញាធរដែនដី មាតាបិតា អ្នកអាណាព្យាបាល សប្បុរសជន គណៈគ្រប់គ្រងគ្រឹះស្ថានសិក្សា ជាពិសេសលោកគ្រូ អ្នកគ្រូ ដែលបានពុះពារឧបសគ្គគ្រប់បែបយ៉ាងប្រកបដោយស្មារតីសាមគ្គីភាព ភក្តីភាព និងមោះមុត ក្នុងការឧបត្ថម្ភគាំទ្រ និងធានាផ្ដល់នូវការរៀនសូត្រតាមគ្រប់រូបភាពដល់សិស្សានុសិស្ស ក្នុងអំឡុងពេលនៃការប្រយុទ្ធប្រឆាំងនឹងជំងឺកូវីដ-១៩ អស់រយៈពេល ២ឆ្នាំកន្លងមកនេះ។ លោករដ្ឋមន្ត្រី បានអំពាវនាវដល់ប្រជាពលរដ្ឋរួមទាំងអស់គ្នា ក្នុងការអនុវត្តវិធាន ៣កុំ៣ការពារ ជាបន្តទៀត ព្រមទាំងប្រកាសដាក់ឱ្យប្រើប្រាស់នូវសមិទ្ធផលថ្មី នៅក្នុងភូមិដំណាក់ល្អិត ឃុំរកាគយ ស្រុកកងមាស ខេត្តកំពង់ចាម ចាប់ពីពេលនេះតទៅ៕