សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ ៖ ដេីម្បីជាការដឹងគុណដល់អតីតយុទ្ធជនដែលបានពលីជីវិតដេីម្បីបុព្វហេតុជាតិ និងប្រជាជនកម្ពុជា នៅព្រឹកថ្ងៃសៅរ៍ទី ២៣ ខែកក្កដា ឆ្នាំ២០២២ ឧត្ដមសេនីយ៍ទោសោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ប្រធានសមាគមអតីតយុទ្ធជនកម្ពុជា ខេត្តកំពង់ធំ បានដឹកនាំសហការី រួមជាមួយអាជ្ញាធរដែនដី និងក្រុមគ្រួសារអតីតយុទ្ធជន ដែលកំពុងរស់នៅក្នុងផ្ទះថ្មីលើដីសម្បទានសង្គមកិច្ច ដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោហ៊ុន សែន និងសម្តេចកិត្តិព្រឹទ្ឋបណ្ឌឹតប៊ុន រ៉ានី ហ៊ុនសែន បានប្រារព្ធពិធីបុណ្យរំលឹកគុណ នឹងគោរពដល់វិញ្ញាណក្ខន្ធអតីតយុទ្ធជនដែលបានពលីជីវិតដេីម្បីបុព្វហេតុជាតិ និងប្រជាជនកម្ពុជា ដែលពិធីនេះប្រព្រឹត្តទៅនៅភូមិដងក្តា ឃុំក្រយា ស្រុកសន្ទុក ខេត្តកំពង់ធំ ។
ឧត្ដមសេនីយ៍ទោ សោម ស៊ុន បានមានប្រសាសន៍ថា ក្រោមការដឹកដឹកនាំប្រកបដោយគតិបណ្ឌិតរបស់សម្តេចតេជោហ៊ុន សែន ប្រទេសជាតិយើងមានសុខសន្តិភាព និងការឯកភាពជាតិពេញលេញ ដោយទទួលបានជោគជ័យក្នុងការអនុវត្តន៍នូវនយោបាយឈ្នះ ឈ្នះ ដែលមានការចូលរួមចំណែកលះបង់សាច់ស្រស់ឈាមស្រស់ជាប្រតិបត្តិកររបស់បងប្អូនអតីតយុទ្ឋជនយេីងផងដែរ ដែលក្នុងប្រវត្តិសាស្រ្តជាង៥០០ ឆ្នាំកន្លងមកមិនធ្លាប់មានក្នុងប្រទេសកម្ពុជាដ៏អភ័ព្វរបស់យើង និងបានអំពាវនាវដល់ក្រុមគ្រួសារអតីតយុទ្ធជន និងប្រជាពលរដ្ឋទាំងអស់ សូមបន្តរួមគ្នាថែរក្សាឲ្យបានសុខសន្តិភាពនេះឲ្យនៅគង់វង្សជារៀងរហូត ។
ឧត្ដមសេនីយ៍ទោសោម ស៊ុន និងសហការី ព្រមទាំងក្រុមគ្រួសារអតីតយុទ្ធជនសូមឧទ្ទិសកុសល និងបួងសួងដល់វិញ្ញាណក្ខន្ធរបស់អតីតយុទ្ធជនទាំងអស់ដែលបានពលីជីវិត ដេីម្បីបុព្វហេតុសន្តិ ភាព សូមបានទៅកាន់សុគតិភពកុំបីឃ្លៀងឃ្លាតឡើយ និងសូមគាំទ្រយ៉ាងពេញទំហឹងចំពោះសម្តេចតេជោហ៊ុន សែន ដែលជាមគ្គុទេសឯកដេីម្បីសន្តិភាព និងការបង្រួបបង្រួមជាតិ ឲ្យបន្តដឹកនាំនាវាកម្ពុជាក្នុងសុខសន្តិភាព និងការអភិវឌ្ឍន៍ជារៀងរហូត ។
នៅក្នុងពិធីនេះប្រធានសមាគមអតីតយុទ្ធជនកម្ពុជា ខេត្តកំពង់ធំ និងសហការីបាននាំយកនូវទេយ្យទាន និងបច្ច័យមួយចំនួនដែលជាអំណោយរបស់លោក ហ៊ុន ម៉ាណែត និងលោកស្រី ពេជ ចន្ទមុន្នី ទៅប្រគេនព្រះសង្ឃចំនួនពីរវត្តដែលនិមន្តចូលរួមក្នុងកម្មវិធីនេះផងដែរ ៕
ដោយ៖សហការី(កំពង់ធំ)
