សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តម៉ាកស្តារិចមួយគ្រឿងត្រូវបានម្ចាស់បេីកបរយ៉ាងលឿនមិនប្រយ័ត្នធ្វើឱ្យជ្រុលទៅបុកគូទរថយន្តម៉ាកម៉ាស្តាពីក្រោយយ៉ាងពេញទំហឹងបណ្តាលឱ្យរងការខូចខាតរថយន្តទាំងសងខាងយ៉ាងដំណំ។
ហេតុការណ៍នេះបានកេីតឡេីងកាលពីវេលាម៉ោង១១និង២០នាទីព្រឹកថ្ងៃទី២៥ ខែកក្កដា ឆ្នាំ២០២២ នៅចំណុចជិតភ្លើងស្តុបច្រកចូលផ្សារព្រៃទា តាមបណ្តោយមហាវិថីសហព័ន្ធរុស្ស៊ី ស្ថិតក្នុងសង្កាត់ចោមចៅទី៣ ខណ្ឌពោធិ៍សែនជ័យ ។
តាមសាក្សីនៅកន្លែងកេីតហេតុបានឱ្យដឹងថា មុនពេលកេីតហេតុគេបានឃេីញរថយន្តម៉ាកម៉ាស្តា ពណ៌ស ពាក់ស្លាកលេខភ្នំពេញ2BD 6432 បើកតាមបណ្តោយមហាវិថីសហព័ន្ធរុស្ស៊ីក្នុងទិសដៅពីត្បូងទៅជេីង ខណៈមកដល់ចំណុចកេីតហេតុស្រាប់តែមានម៉ូតូមួយគ្រឿងជិះខាងមុខបត់ឆ្លងផ្លូវធ្វេីឱ្យរថយន្តនេះបន្ថយល្បឿន ហើយភ្លាមៗនោះស្រាប់តែមានរថយន្តម៉ាកស្តារិច ពណ៌ខ្មៅ ពាក់ស្លាកលេខភ្នំពេញ2AN-3836 បើកយ៉ាងលឿនមកពីក្រោយជាន់ហ្វ្រ័ងមិនទាន់ក៏ជ្រុលទៅបុកពេញទំហឹងបណ្តាលឱ្យរងការខូចខាតយ៉ាងដំណំ តែមិនមានមនុស្សរងរបួសនោះទេ។
ក្រោយកេីតហេតុសមត្ថកិច្ចជំនាញបានចុះទៅដល់ ហើយធ្វើការវាស់វែងដេីម្បីយករថយន្តអែបខាងសិន ទុកឱ្យភាគីទាំងសងខាងសម្របសម្រួលគ្នា៕
ដោយ៖សុខាសែនជ័យ
