សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល៖ បើយោងតាមប្រភពព័ត៌មានពីរបាយការណ៍របស់អគ្គស្នងការនគរបាលជាតិ បានឱ្យដឹងនៅព្រឹកថ្ងៃអង្គារទី២៦ ខែកក្កដា ឆ្នាំ២០២២នេះថា៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល សូមធ្វេីការឆ្លើយតបទៅនឹងគណនីហ្វេសប៊ុកសុំមិនបញ្ចេញឈ្មោះ ដែលបានរាយការណ៍ក្នុងប្រអប់សារផេកហ្វេសប៊ុកស្នងការដ្ឋាននគរបាលខេត្តកណ្ដាល មានខ្លឹមសារថា ៖ ”សូមគោរពជូនលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល ខ្ញុំបាទជាប្រជាពលរដ្ឋស្ថិតនៅឃុំផ្សារដែក ស្រុកពញាឮ ខេត្តកណ្តាល ។ ខ្ញុំបាទសូមរាយការណ៍ ពីករណីមានការជូញដូរគ្រឿងញៀន និងសេពគ្រឿងញៀន គឺបុគ្គលដែលមានឈ្មោះ រ៉េត ប៉ាលី ដែលមានអាណាព្យាបាលម្តាយឈ្មោះ ថារី និងឪពុកឈ្មោះ សឿន ដែលបុគ្គលរូបនេះដើរចែកចាយលក់ដូរគ្រឿងញៀន ជារៀងរាល់ថ្ងៃនៅចំណុចផ្ទះអាណាព្យាបាលខាងលើមិនថាយប់ឬក៏ថ្ងៃ និងចំណុចមាត់បឹងសំរិទ្ធផ្ទះឈ្មោះ ញឹម មិនបានរំខានដល់សមត្ថកិច្ចឡើយ ហើយបានឌឺដងអ្នកភូមិថាមិនមានប៉ូលីសណាហ៊ានចាប់គេឡើយ ដោយសារប៉ូលីសប៉ុស្តិ៍ភ្នំ ប៉ូលីសស្រុកសុទ្ធតែគ្នាគេមិនហ៊ានចាប់វាទេ និងបាននិយាយមានកូនចៅបរិវ៉ាច្រើនណាស់បើក្បាលអាណាហ៊ានខ្លាំង កាប់ក្បាលអានោះចោលតែម្តង ។
សូមមេត្តាពិនិត្យជាពិសេសនៅចំណុចមាត់បឹងសំរិទ្ធផ្ទះឈ្មោះញឹម ស្ថិតនៅភូមិទួលអង្គុញ ដែលជាកន្លែងជូញដូរ និងចែកចាយទាំងយប់ទាំងថ្ងៃ បក្សពួកបងតូចបងធំ កាន់ដាវខ្វែងខ្វាត់ក្នុងភូមិ ខ្ញុំពិតជាមានការព្រួយបារម្ភ និងគិតគូរពីសុវត្ថិភាព បងប្អូនប្រជាពលរដ្ឋ និងបញ្ហាភូមិឃុំសុវត្ថិភាព ជាចុងក្រោយខ្ញុំសូមសំណូមពរឲ្យលោកឧត្តមសេនីយ៍ទោ មេត្តាដោះស្រាយបញ្ហានេះដោយក្តីអនុគ្រោះ និងរក្សាការសម្ងាត់ជូនខ្ញុំផង ព្រោះបារម្ភពីបញ្ហាសុវត្ថិភាព” ។
បន្ទាប់ពីទទួលបានព័ត៌មានខាងលេីភ្លាម លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានបញ្ជាឱ្យលោកអធិការនគរបាលស្រុកពញាឮ ស្រាវជ្រាវបង្រ្កាបមុខសញ្ញាខាងលើ ។
ជាលទ្ធផល ៖ នៅវេលាម៉ោង១១ និង៤០នាទីព្រឹកថ្ងៃទី២៥ ខែកក្កដា ឆ្នាំ២០២២ម្សិលមិញនេះ លោកអធិការបានបញ្ជាកម្លាំងផ្នែកប្រឆាំងគ្រឿងញៀន សហការជាមួយកម្លាំងនគរបាលប៉ុស្ដិ៍រដ្ឋបាលផ្សារដែក និងវិហារលួង ចេញល្បាត និងស្រាវជ្រាវក្នុងភូមិសាស្រ្តឃុំផ្សារដែក ក៏ប្រទះឃើញជនសង្ស័យឈ្មោះ វង ជីវ៉ា កំពុងធ្វើសកម្មភាពនៅចំណុចផ្លូវលំភូមិផ្សារដែកលើ ឃុំផ្សារដែក ស្រុកពញាឮ ខេត្តកណ្តាល ពេលនោះកម្លាំងនគរបាលជំនាញ បានបង្ក្រាបចាប់ឃាត់ខ្លួន និងចាប់យកវត្ថុតាងមួយចំនួន និងបន្តទៅឃាត់ខ្លួនជនសង្ស័យឈ្មោះ ស្តើង សូនិច និងចាប់យកវត្ថុតាងបានមួយចំនួនផងដែរ ។
-ជនសង្ស័យចំនួន ០៣នាក់ (ឃាត់ខ្លួន០២នាក់ គេចខ្លួន០១នាក់) ៖ ១-ឈ្មោះ វង ជីវ៉ា ភេទប្រុស អាយុ២៤ឆ្នាំ ជនជាតិខ្មែរ មុខរបរមិនពិត មានទីលំនៅបច្ចុប្បន្នភូមិផ្សារដែកក្រោម ឃុំផ្សារដែក ស្រុកពញាឮ ខេត្តកណ្តាល(ឃាត់ខ្លួន) ។ ២-ឈ្មោះ ស្តើង សូនិច ភេទប្រុស អាយុ២៤ឆ្នាំ ជនជាតិខ្មែរ មុខរបរមិនពិត មានទីលំនៅភូមិទួលអង្គុញ ឃុំផ្សារដែក ស្រុកពញាឮ ខេត្តកណ្តាល មានសារធាតុញៀនក្នុងទឹកនោម (ឃាត់ខ្លួន) ។ ៣-ឈ្មោះ រ៉េត ប៉ាលី ភេទប្រុស អាយុ២៦ឆ្នាំ ជនជាតិខ្មែរ មុខរបរមិនពិត មានទីលំនៅភូមិបដិមាករ ឃុំផ្សារដែក ស្រុកពញាឮ ខេត្តកណ្តាល មុខសញ្ញាសកម្ម (គេចខ្លួន) ។
-វត្ថុតាងចាប់យក ៖ សារធាតុញៀនមេតំហ្វេតាមីន ចំនួន០៥កញ្ចប់តូច ទម្ងន់ ១,២៥ក្រាម, ទូរស័ព្ទដៃ ចំនួន ០២គ្រឿង ម៉ាកSAMSUNG ០១គ្រឿង និងOPPO ០១គ្រឿង, ម៉ូតូជាមធ្យោបាយជនសង្ស័យ០១គ្រឿង ធន់ HONDA ពណ៌ខ្មៅ ស្លាកលេខ កណ្តាល1AH 9490, ដាវដែក០១ដេីម និងឧបករណ៍ប្រើប្រាស់សារធាតុញៀនមួយចំនួន ។
បច្ចុប្បន្នជនសង្ស័យបានឃាត់ខ្លួន នៅអធិការដ្ឋាននគរបាលស្រុកពញាឮ ដើម្បីបន្តចាត់ការតាមនីតិវិធី ។
ចំណែកមុខសញ្ញារត់គេចខ្លួន កម្លាំងផ្នែកជំនាញប្រឆាំងគ្រឿងញៀន និងកម្លាំងប៉ុស្ដិ៍នគរបាលរដ្ឋបាលផ្សារដែក និងបន្តសហការល្បាត ពួនស្ទាក់ភូមិសាស្រ្តខាងលេី ដេីម្បីឈានទៅដល់ការបង្ក្រាបឃាត់ខ្លួនចាត់ការតាមនីតិវិធី ។ អាស្រ័យហេតុនេះ សូមសាធារណជនមេត្តាជ្រាបជាព័ត៌មាន៕
ដោយ៖សហការី
