រយៈពេល៧ខែនេះជនសង្ស័យ១៥នាក់ ត្រូវបានមន្ត្រីជំនាញតំបន់ដែនជម្រកការពារសត្វព្រៃកែវសីមា កសាងសំណុំរឿងបញ្ជូនទៅសាលាដំបូង

ចែករំលែក៖

ខេត្តមណ្ឌលគិរី ៖ ជនសង្ស័យចំនួន១៥នាក់ ត្រូវបានមន្ត្រីជំនាញតំបន់ដែនជម្រកការពារសត្វព្រៃកែវសីមា កសាងសំណុំរឿងក្នុងបទល្មើសធនធានធម្មជាតិ បញ្ជូនទៅកាន់តុលាការ ដោយគិតពីដើមឆ្នាំ២០២២ រហូតដល់ចុងខែកក្កដា កន្លងទៅនេះ។

លោក ហាន សាខន ប្រធានការិយាល័យដែនជម្រក សត្វព្រៃកែវសីមា បានឲ្យដឹងថា កន្លងមកមន្ត្រីឧទ្យានុរក្ស បានដកហូតវត្ថុតាងល្មើសច្បាប់ រួមមានរថយន្តចំនួន១៤គ្រឿង ម៉ូតូចំនួន៧៦គ្រឿង គោយន្តចំនួន៦គ្រឿង រណាយន្ត១៨១គ្រឿង ឈើចំនួន៩៣ម៉ែត្រគីប អន្ទាក់ជាង២៧១ និងកសាងសំណុំរឿងបញ្ជូនទៅកាន់តុលាការចំនួន៤៥ករណី ដោយពិន័យអន្តរការណ៍ ៤ ករណី ដែលនេះ គិតត្រឹមឆមាសទី១ ឆ្នាំ២០២២។ លោកប្រធានការិយាល័យបន្តថា វត្ថុតាងឈើ ដែលបានដោះស្រាយរួច ត្រូវបានការិយាល័យដែនជម្រកសត្វព្រៃកែវសីមា រួមទាំងក្រសួងបរិស្ថាន ធ្វើការដេញថ្លៃ ដើម្បីលក់យកថវិកាចូលរដ្ឋ។

លោកប្រធានការិយាល័យបានប្ដេជ្ញាចិត្តខ្ពស់ក្នុងការការពារធនធានធម្មជាតិនៅតំបន់ដែនជម្រកសត្វព្រៃកែវសីមា។ កម្លាំងឧទ្យានុរក្សបានធ្វើសកម្មភាពល្បាតដោយមិនខ្លាចនឿយហត់នោះឡើយ។ លោកទទួល ស្គាល់ថាមានចំណុចខ្វះខាតខ្លះក៏ពិតមែនប៉ុន្តែវានឹងបំពេញបន្ថែមនៅពេលក្រោយទៀតតាមរយៈបទ ពិសោធន៍នៃការងារដេកព្រៃរបស់ឧទ្យានុរក្ស។

លោក កែវ សុភគ៌ ប្រធានមន្ទីរបរិស្ថាននៅព្រឹកថ្ងៃទី០១ ខែសីហា ឆ្នាំ២០២២ មានប្រសាសន៍ថា បទល្មើសធនធានធម្មជាតិ ពិសេសការកាប់ឈើ និងការដឹកជញ្ជូនលែងមានទ្រង់ទ្រាយធំទៀតហើយ ពោលគឺនៅមានតូចៗដឹកតាមម៉ូតូតែប៉ុណ្ណោះ។ តែយ៉ាងណា មន្ត្រីជំនាញនៅតែបន្តអនុវត្តវិធានការតឹងរឹងចំពោះជនល្មើសលួចកាប់ និងដឹកឈើ ទោះទំហំតូច ឬធំក្តី។ លោកប្រធានមន្ទីរបានបន្ថែមថា កម្លាំងឧទ្យាននុរក្សបានប្ដេជ្ញាដូចខ្ញុំបន្តធ្វើសកម្មភាល្បាតមិនឈប់ឈរនោះឡើយ។

លោកប្រធានមន្ទីរបន្តទៀតថា មកទល់ពេលនេះ ប្រជាពលរដ្ឋដែលធ្លាប់តែអាស្រ័យផលតាមរយៈការកាប់ព្រៃឈើ ចាប់សត្វព្រៃ បានកែប្រែឥរិយាបថបន្តិចម្តងៗ ពីការចូលព្រៃកាប់ឈើ បរបាញ់សត្វ ងាកមកបង្កបង្កើនផលកសិកម្ម និងទទួលផលពីវិស័យទេសចរណ៍។ ការបង្កើតការងារថ្មីដល់ប្រជាពលរដ្ឋ ជំនួសការចូលព្រៃកាប់ឈើ បរបាញ់សត្វ ដាក់អន្ទាក់ មានសារសំខាន់ណាស់ ក្នុងការជំរុញការលើកកម្ពស់ការងារអភិរក្សធនធានធម្មជាតិ។

សូមបញ្ជាក់ថា ដែនជម្រកសត្វព្រៃកែវសីមា មានផ្ទៃដីសរុប ២៩២ ៦៩០ ហិកតា មានព្រំប្រទល់ជាប់នឹងដែនជម្រកសត្វព្រៃភ្នំព្រិច និងប្រទេសវៀតណាម លាតសន្ធឹងលើផ្ទៃដីស្រុកកែវសីមា និងស្រុកអូររាំង ។ ដែនជម្រកសត្វព្រៃកែវសីមា មានសត្វព្រៃច្រើនជាង ១០០០ប្រភេទ ថនិកសត្វ ៩៤ប្រភេទ ក្នុងនោះ២២ ប្រភេទកំពុងរងការគំរាមកំហែង បក្សីចំនួន៣៥៦ ប្រភេទ និងដើមឈើ និងរុក្ខជាតិចំនួន ២៦៧ប្រភេទ៕