សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ មានការភ្ញាក់ផ្អើលដល់ប្រជាពលរដ្ឋនិងអ្នកធ្វើដំណើរ ចោមរោម មើលខណៈមានករណីគ្រោះថ្នាក់ចរាចរណ៍រវាងរថយន្ត LEXUS RX330 បុកជាមួយម៉ូតូ ម៉ាកហុងដាសេ១២៥បញ្ច្រាសទិសគ្នា របួសមនុស្ស ២នាក់នៅស្រុកស្វាយទាប។
ហេតុការណ៍នេះបានកើតឡើងកាលពីវេលាម៉ោង១និង២៥នាទីរសៀលថ្ងៃទី ០២ ខែ សីហា ឆ្នាំ ២០២២ លើផ្លូវជាតិលេខ៣១៤D ចន្លោះគីឡូមែត្រ ៧ និង៨ ស្ថិតនៅភូមិអង្គតាមោគ ឃុំប្រសូត្រ ស្រុកស្វាយទាប ខេត្តស្វាយរៀង។
សមត្ថកិច្ចនគរបាលស្រុកបានឱ្យដឹងថាអ្នកជិះម៉ូតូដែលរងរបួសមានឈ្មោះ រស្មី ភេទស្រី អាយុ ៣២ ឆ្នាំ មុខរបរ កសិករ និងអ្នករួមដំណើរ ឈ្មោះ ថោង មឹង ភេទ ស្រី អាយុ ៤២ ឆ្នាំ មុខរបរ កសិកររស់នៅភូមិ ជប់ព្រីងឃុំ ថ្មី ស្រុកកំពង់រោទ៍ ខេត្តស្វាយរៀង បើកបរម៉ូតូម៉ាកហុងដា សេ ១២៥ ស៊េរីឆ្នាំ ២០១៧ ពណ៌ ខ្មៅ ពាក់ស្លាកលេខ ស្វាយរៀង ១J ២៤២៣ខូចខាតទាំងស្រុង។
ចំណែកអ្នកបើករថយន្តមានឈ្មោះ សាន់ សុខា អាយុ៤១ឆ្នាំ មុខរបរ គ្រូបង្រៀន និងអ្នករួមដំណើរឈ្មោះ ផុន រក្សា ភេទ ស្រី អាយុ ២០ ឆ្នាំ មុខរបរ កសិករ រស់នៅភូមិព្រៃវស្លិ៍ ឃុំ ថ្មី ស្រុក កំពង់រោទ៍ ខេត្តស្វាយរៀង ។
បើតាមសាក្សីបានឱ្យដឹងថាមុនកើតហេតុមានស្ត្រី២នាក់បានជិះម៉ូតូមួយគ្រឿងម៉ាកហុងដា សេ ១២៥ ស៊េរីឆ្នាំ ២០១៧ ពណ៌ ខ្មៅ ពាក់ស្លាកលេខ ស្វាយរៀង ១J ២៤២៣ដោយធ្វើដំណើរពីជើងទៅត្បូងមិនប្រកាន់ស្ដាំស្រាប់តែទៅបុកនិងរថយន្ត ម៉ាក LEXUS RX ៣៣០ ពណ៌ ទឹកមាស ពាក់ស្លាកលេខ ស្វាយរៀង ២C ០៥៥៧ក្នុង ទិសដៅពីត្បូងទៅជើងបញ្ច្រាសគ្នាក៏បុកយ៉ាងពេញទំហឹងបង្កការភ្ញាក់ផ្អើលតែម្ដង។
ក្រោយមកអ្នករងរបួសត្រូវបានបញ្ចូនទៅព្យាបាលនៅមន្ទីរពេទ្យបង្អែកស្រុកស្វាយទាបនិងមធ្យោបាយធ្វើដំណើរសមត្ថកិច្ចវាស់វែងនិងអូសយកមករក្សាទុកនៅអធិការដ្ឋាននគរបាលស្រុកស្វាយទាបដើម្បីដោះស្រាយពេលក្រោយតាមច្បាប់ ៕
ដោយ៖យឹម សុថាន
