សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ បេីយោងតាមប្រភពព័ត៌មានពីរបាយការណ៍របស់ស្នងការដ្ឋាននគរបាលខេត្តព្រះសីហនុ បានឱ្យដឹងនៅព្រឹកថ្ងៃសុក្រទី០៥ ខែសីហា ឆ្នាំ២០២២នេះថា៖ កម្លាំងសមត្ថកិច្ចជំនាញ បានបញ្ជូនខ្លួនជនជាតិចិនប្រុសស្រី ៣នាក់ ទៅសាលាដំបូងខេត្តព្រះសីហនុ ដេីម្បីចាត់ការតាមច្បាប់ ក្នុងករណីផ្ទុះអាវុធបណ្តាលឱ្យបុរសជនជាតិចិន០២នាក់ស្លាប់នៅកាស៊ីណូ តុងហ្វាងប៉ាលីរិន ក្នុងក្រុងព្រះសីហនុ។
របាយការណ៍ដដែលបន្តថា យោងតាមដំណើររឿងហេតុ កាលពីយប់ថ្ងៃទី៣០ ខែកក្កដា ឆ្នាំ២០២២កន្លងទៅថ្មីៗនេះ នៅកាស៊ីណូ តុងហ្វាងប៉ាលីរិន ក្នុងសង្កាត់២ ក្រុងព្រះសីហនុ កម្លាំងជំនាញនៃស្នងការដ្ឋាននគរបាលខេត្តព្រះសីហនុ បានទទួលព័ត៌មានថា នៅក្នុងកាស៊ីណូ តុងហ្វាងប៉ាលីរិន មានករណីផ្ទុះអាវុធកើតឡើង បណ្តាលឱ្យបុរសជនជាតិចិន០២នាក់ស្លាប់បាត់បង់ជីវិត បន្ទាប់ពីទទួលបានព័ត៌មាននេះភ្លាម លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានចាត់ឲ្យកម្លាំងជំនាញផែនការងារនគរបាលព្រហ្មទណ្ឌ សហការគ្នាចុះទៅដល់កន្លែងហើយហេតុដើម្បីធ្វើការស្រាវជ្រាវ តែជនសង្ស័យបានគេចខ្លួនបាត់អស់ ។
ក្នុងកិច្ចប្រតិបត្តិការណ៍នេះ កម្លាំងសមត្ថកិច្ចបានស្រាវជ្រាវឃាត់ខ្លួនជនសង្ស័យចំនួន០៣នាក់ ៖
១-ឈ្មោះ Ding PingPing ហៅ Ding QiQi ភេទស្រី អាយុ ៣៥ឆ្នាំ ជនជាតិចិន មុនរបរ អ្នកគ្រប់គ្រងកាស៊ីណូ តុងហ្វាងប៉ាលីរិន លិខិតឆ្លងដែន (មិននៅជាប់ខ្លួន) ស្នាក់នៅ ភូមិ២ សង្កាត់២ ក្រុង-ខេត្តព្រះសីហនុ ។
២-ឈ្មោះ Xu WeiWei ភេទប្រុស អាយុ ៣៥ឆ្នាំ ជនជាតិចិន មុនរបរ គ្រប់គ្រងកាំមេរ៉ាសុវត្តិភាពនៅកាស៊ីណូ តុងហ្វាងប៉ាលីរិន លិខិតឆ្លងដែន (មិននៅជាប់ខ្លួន) ស្នាក់នៅ ភូមិ២ សង្កាត់២ ក្រុង-ខេត្តព្រះសីហនុ ។
៣-ឈ្មោះ Du Jian Bo ភេទប្រុស អាយុ ៤២ឆ្នាំ ជនជាតិចិន មុនរបរ អ្នកគ្រប់គ្រងសន្តិសុខនៅកាស៊ីណូ តុងហ្វាងប៉ាលីរិន លិខិតឆ្លងដែន (មិនជាប់ខ្លួន) ស្នាក់នៅ ភូមិ២ សង្កាត់២ ក្រុង-ខេត្តព្រះសីហនុ ។
ចំណែកដកហូតសម្ភារវត្ថុតាង៖
១-អាវុធខ្លីចំនួន ៥ ដើម (អាវុធខ្លីដែលជនសង្ស័យបាញ់ជនរងគ្រោះចំនួន៤ដើម និងចំនួន១ដើមទៀត ឆែកឆេរបានពីទូរដែកក្នុងអគារកើតហេតុ) ។
២-រថយន្ត ចំនួន ៣គ្រឿង ជាមធ្យោយបាយធ្វើសកម្មភាពនិងរត់គេចខ្លួន ។
៤-សម្ភារៈនិងឯកសារមួយចំនួនទៀត ។
បច្ចុប្បន្នជនសង្ស័យទាំង៣នាក់រួម និងវត្ថុតាងកម្លាំងជំនាញបានបញ្ជូនសំណុំរឿងទៅសាលាដំបូងខេត្តព្រះសីហនុ និងកំពុងបើកការស៊ើបអង្កេតបន្ត ដើម្បីស្វែងរកចាប់ខ្លួនជនសង្ស័យមួយចំនួនទៀតដែលកំពុងរត់គេចខ្លួន យកមកផ្តន្ទាទោសតាមច្បាប់៕
ដោយ៖ស តារា
