សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ព្រះរាជអាជ្ញាអមសាលាដំបូងរាជធានីភ្នំពេញបានចោទប្រកាន់សមាជិកជាន់ខ្ពស់គណបក្សភ្លើងទៀន លោក ស៊ុន ឆ័យ ពីបទបរិហាកេរ្តិ៍ជាសាធារណៈ តាមបណ្ដឹងរបស់គណបក្សប្រជាជនកម្ពុជា។
ក្នុងដីកាបញ្ជូនរឿងទៅជំនុំជម្រះផ្ទាល់ចុះថ្ងៃទី៩ ខែសីហា ព្រះរាជអាជ្ញា ប្លង់ សុផល បានយល់ឃើញថា លោក ស៊ុន ឆ័យ ពិតជាបានទទួលស្គាល់នូវបទសម្ភាសន៍របស់ខ្លួនក្នុងកម្មវិធីអាយឌាថករបស់សារព័ត៌មានខេមបូឌាដេលី ដែលបានបង្ហាញនូវធាតុផ្សំនៃបទល្មើស និងមានភស្ភុតាជាក់លាក់ដាក់បន្ទុក ដែលបង្ហាញថាលោក ស៊ុន ឆ័យ អាយុ ៦៦ឆ្នាំ ពិតជាមានពិរុទ្ធភាពគ្រប់គ្រាន់សម្រាប់ចោទប្រកាន់។
លោក ប្លង់ សុផល បានចោទប្រកាន់លោក ស៊ុន ឆ័យ ពីបទបរិហាកេរ្តិ៍ជាសាធារណៈ ដែលប្រព្រឹត្តទៅនៅរាជធានីភ្នំពេញកាលពីថ្ងៃទី៧ ខែមិថុនា ឆ្នាំ២០២២ តាមបញ្ញាត្តិមាត្រា៣០៥ នៃក្រមព្រហ្មទណ្ឌ និងបានបញ្ជាឱ្យបញ្ជូនទៅលោក និងវត្ថុតាងទៅសាលាដំបូងរាជធានីភ្នំពេញដើម្បីជំនុំជម្រះតាមច្បាប់ផងដែរ។
កាលពីថ្ងៃទី១៤ ខែមិថុនា គណបក្សប្រជាជនកម្ពុជាបានសម្រេចប្ដឹងលោក ស៊ុន ឆ័យ ទារសំណងជំងឺចិត្តចំនួន ៤ពាន់លានរៀល ឬប្រមាណ ១លានដុល្លារអាមេរិក បន្ទាប់ពីលោកបានធ្វើអត្ថាធិប្បាយលើប្រព័ន្ធផ្សព្វផ្សាយបរទេសផ្សាយជាខេមភាសាចោទថា ការបោះឆ្នោតជ្រើសរើសក្រុមប្រឹក្សាឃុំសង្កាត់សង្កាត់កាលពីថ្ងៃ៥មិថុនា មានការលួចបន្លំ បំភ័យ និងទិញសន្លឹកឆ្នោត។
ក្នុងពាក្យបណ្ដឹងចុះថ្ងៃអង្គារ ទី១៤ ខែមិថុនាលោកមេធាវីតំណាងគណបក្សប្រជាជន លោក គី តិច បានភ្ជាប់ជូនទៅកាន់តុលាការនូវ USB អង្គចងចាំដែលផ្ទុកវីដេអូឃ្លីបរយៈពេល២ម៉ោង ១០នាទី និង៥៦វិនាទី នៃបទសម្ភាសន៍រវាងសារព័ត៌មានខេមបូឌាដេលី និងលោក ស៊ុន ឆ័យ ដែលត្រូវបានផ្សព្វផ្សាយតាមគេហទំព័រ បណ្ដាញសង្គមហ្វេសប៊ុក និងយូធូប។ ក្នុងនោះលោក ស៊ុន ឆ័យ បានលើឡើងនូវចំណុចមួយចំនួនដែលធ្វើឱ្យប៉ះពាល់ដល់កិត្តយសបក្សប្រជាជនដែលមានដូចជា «វាគ្រប់គ្រងដោយគណបក្សមួយទាំងស្រុង ពីលើដល់ក្រោម គេចង់ធ្វើអីក៏បានដែរ» «លទ្ធផលហ្នឹងវាមិនឆ្លុះពីឆន្ទះរបស់ពលរដ្ឋទេ វាមានការបំភ័យ វាមានការទិញ វាមានការលួច បានវាសល់ប៉ុណ្ណឹង»។
ជាងនេះទៅទៀតលោកក៏បានប្រៀបធៀបទៀតថា៖ «យើងមិនចង់ប្រៀបធៀបថា ចោរលួចគោទេ ដូចយើង និយាយអីចឹង ចោរលួចគោ បើវាលួចគោ៣ហើយ យើងម៉េចក៏មិនឱ្យវាលួចទាំង៥ទៅ អានេះយើងនិយាយ ភាសាសាមញ្ញទៅចុះ នេះជាឆន្ទៈពលរដ្ឋ ឆន្ទៈមួយចំនួនត្រូវគេបំបាត់ វានៅសល់ឆន្ទៈមួយចំនួនដែលយើង ការពារបាន យើងយកឆន្ទៈហ្នឹងម៉ោ អាហ្នឹងជារបស់យើង យើងតស៊ូ តវ៉ា ពីរឿងអ្វីដែលបាត់ អាហ្នឹងវាជារឿង ធម្មតា វាមិនដែលអ្នកណាទៅឱ្យគេប្រមូលយកទាំងអស់នោះទេ អាហ្នឹងវាមិនអាចទេ»។
មេធាវីតំណាងគណបក្សប្រជាជនបានចាត់ទុកការលើឡើងទាំងនេះគឺជាអំពីទុច្ចរិត បំភ្លៃខុសពីការពិត ជាការផ្ដល់ព័ត៌មានក្លែងក្លាយ ក្នុងចេតនាទម្លាក់កំហុសដោយអសិទ្ធចិត្ត និងមួលបង្កាច់ដែលនាំឱ្យប៉ះពាល់ធ្ងន់ធ្ងរដល់កិត្តិយសរបស់គណបក្សប្រជាជនកម្ពុជាដែលជាគណបក្សឈ្នះឆ្នោត។
ក្រៅពីជាប់បណ្ដឹងរបស់គណបក្សប្រជាជនកម្ពុជា លោក ស៊ុន ឆ័យ ក៏កំពុងជាប់បណ្ដឹងរបស់គណកម្មាធិការជាតិរៀបចំការបោះឆ្នោតក្នុងបទបរិហាកេ្តរិ៍ជាសាធារណៈផងដែរ ៕
ដោយ ៖ រ៉ារ៉ា
