សារព័ត៌មាន នគរវត្ត តែងតែនាំមុខគេជានិច្ច
ការប្រកួតចំនួន២លើកក្នុងការប្រកួតដណ្តើមជើងឯករដូវកាលថ្មី ក្រុមមេឃខៀវ Manchester City បានបង្កើនទម្រង់លេងយ៉ាងល្អដោយបានបំបាក់ក្រុម Bournemouth ៤–០ កាលពីថ្ងៃសៅរ៍ដើម្បីរក្សាការចាប់ផ្តើមដ៏ល្អរបស់ក្រុមនេះ។ ក្រុម Arsenal ក៏បានយកឈ្នះគូប្រកួតដោយរកបាន៦ពិន្ទុក្នុង២ប្រកួតជាប់គ្នា ខណៈដែលអតីតខ្សែប្រយុទ្ធ Gabriel Jesus របស់ Man City រកបាន២គ្រាប់ក្នុងជ័យជម្នះ ៤–២ លើក្រុម Leicester City ។
ក្រុមមេឃខៀវ Man City ដែលបានប្រជែងលើកពាន Premier League ជាលើកទី៥ក្នុងរយៈពេល៦រដូវកាល បានឈានដល់ការទទួលជ័យជម្នះបើកឆាកនៅ West Ham United ហើយនឹងបានឈ្នះ Bournemouth ៤-០។ ៤គ្រាប់របស់ក្រុម Man City រកបានដោយ IlkayGundogan បើកឆាកនៅនាទីទី១៩ពីការបញ្ជូនបាល់របស់ ErlingHaaland។
គ្រាប់ទី២រកបានដោយខ្សែបម្រើ Kevin De Bruyne នៅនាទីទី៣១ ខណៈដែលគ្រាប់បាល់ទី៣រកបានដោយខ្សែប្រយុទ្ធវ័យក្មេង Phil Foden មុនចប់តង់ទី១នាទីទី៣៧ពីការបញ្ជូនបាល់របស់ De Bruyne ។ នៅជិតចប់ការប្រកួតក្រុម Man City ក៏ទទួលបានគ្រាប់បាល់១គ្រាប់ទៀតដែលជាការភ្លាត់ស្នៀតស៊ុតចូលទីខ្លួនឯងពីសំណាក់កីឡាករ Jefferson Lerma នៅនាទីទី៧៩។
ចំណែកក្រុមកាំភ្លើងធំ Arsenal បានបំបាក់ក្រុមភ្ញៀវ Leicester City ៤ទល់២ ដែល២គ្រាប់គឺជាការរកបានដោយខ្សែប្រយុទ្ធ Jesus ដែលបានបង្កើតការភ្ញាក់ផ្អើលយ៉ាងខ្លាំងនៅ Arsenal ហើយកីឡាករប្រេស៊ីលរូបនេះបានបង្ហាញខ្លួនជាលើកដំបូងក្នុងទឹកដីរបស់ខ្លួនជាមួយនឹងការរកគ្រាប់បាល់បានល្អនៅនាទីទី២៣ និងនាទីទី៣៥។
ចូលដល់តង់ទី២ក្រុម Leicester បានវាយបក២គ្រាប់ក្នុងការស៊ុតបញ្ចូលទីរបស់ក្រុមម្ចាស់ផ្ទះដោយសារតែការស៊ុតបញ្ចូលទីរបស់ខ្លួនដោយកីឡាករ William Saliba នៅនាទីទី៥៣ ហើយនៅនាទីទី៥៥ កីឡាករ Granit Xhaka រកបាន១គ្រាប់បន្ថែមសងវិញភ្លាមៗ។ នៅនាទីទី៧៤ កីឡាករJames Maddison របស់ក្រុម Leicester រកបាន១គ្រាប់ឲ្យក្រុមភ្ញៀវ ប៉ុន្តែ១នាទីក្រោយមកកីឡាករ Gabriel Martinelli របស់ Arsenal បានសងវិញ១គ្រាប់ដែលជាការបញ្ជូនបាល់ពី Jesus ធ្វើឲ្យចប់ការប្រកួតក្រុម Arsenal យកឈ្នះ Leicester City ៤ទល់២។
ងាកមកក្រុមដែលធ្លាប់តែល្បីល្បាញនៅ Premier League គឺក្រុមបិសាចក្រហម Manchester United បានបរាជ័យជាលើកទី២ក្រោមការដឹកនាំរបស់អ្នកចាត់ការថ្មីលោក Erik ten Hag ក្នុងការប្រកួតនៅទឹកដីក្រុមBrentford ក្នុងលទ្ធផលមិនគួរឲ្យជឿ៤-០។
ក្រុមបិសាចក្រហម Manchester United បានរបូតគ្រាប់បាល់ចំនួន៤គ្រាប់ក្នុងតង់ទីមួយត្រឹម៣៥នាទីដំបូងក្នុងលទ្ធផលបរាជ័យ ៤–០ នៅលើទឹកដីក្រុមBrentford កាលពីរាត្រីថ្ងៃសៅរ៍ ទី១៣ សីហា ខណៈដែលការចាប់ផ្តើមដ៏អាក្រក់របស់ក្រុមនេះក្នុងរដូវកាល Premier League នៅតែបន្ត។
ការបរាជ័យក្រៅដីជាលើកទី៧ជាប់ៗគ្នារបស់ Man Utd ត្រូវបានធានាជាយូរមកហើយបន្ទាប់ពីចាញ់ក្រុម Brentford សារជាថ្មី។ ការប្រកួតបានចាប់ផ្តើមនៅនាទីទី១០ក្នុងតង់ទី១ នៅពេលដែលអ្នកចាំទី David de Gea របស់ Man United មិនអាចរារាំងការស៊ុតបាល់បញ្ចូលទីដោយកីឡាករ Josh Dasilva។
អ្វីៗកាន់តែអាក្រក់សម្រាប់ Man United ក្នុងតង់ទី១ដោយបានរបូត៣គ្រាប់បន្ថែមទៀត ដោយគ្រាប់បាល់ទី២រកបានដោយកីឡាករ Mathias Jensen នៅនាទីទី១៨ ខណៈគ្រាប់បាល់ទី៣រកបានដោយកីឡាករ Ben Mee នៅនាទីទី៣០ធ្វើឲ្យអ្នកគាំទ្រក្រុម Brentford មានការរំភើបចិត្ត។ គ្រាប់បាល់ទី៤របស់ក្រុម Brentford រកបានដោយកីឡាករ Bryan Mbeumo នៅនាទីទី៣៥។
គ្រូបង្វឹកក្រុម Man Utd លោក Ten Hag បានធ្វើការប្តូរកីឡាករ៣នាក់នៅតង់ទី២ជាមួយ Raphael Varane, Tyrell Malacia និង Scott McTominay ចូលមក ប៉ុន្តែទោះបីជាមានការកែលម្អបន្តិចបន្តួច ក៏ក្រុមនេះមិនអាចធ្វើអ្វីបានទៅលើក្រុមម្ចាស់ផ្ទះបានដែរ។ ក្រុម Man United បានបរាជ័យផ្ទួន ខណៈដែលពួកគេបានធ្លាក់ដល់បាតតារាងដោយបានចាញ់ការប្រកួតបើកឆាកនៅផ្ទះក្រុម Brighton កាលពីសប្តាហ៍មុន។
នេះជាលើកទី១ចាប់តាំងពីឆ្នាំ១៩៦០ ដែល Man Utd បានរបូតគ្រាប់បាល់យ៉ាងហោចណាស់៦គ្រាប់ក្នុងការប្រកួត២លើកដំបូងរបស់ពួកគេនៃរដូវកាលកំពូលមួយ ហើយជាលើកដំបូងដែលពួកគេបានចាញ់ការប្រកួតបើកឆាក២លើកផ្ទួនៗ ចាប់តាំងពីឆ្នាំ១៩៩២ នៅពេលដែលក្រុមនេះបានបន្តឈ្នះជើងឯក ៕
ដោយ៖ ភារៈ(រូបភាព ៖ BBC Spport/Rueters/CNA)
