សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ បើយោងតាមប្រភពព័ត៌មានពីរបាយការណ៍របស់ស្នងការដ្ឋាននគរបាលខេត្តសៀមរាប បានឱ្យដឹងនៅព្រឹកសុក្រទី១៩ ខែសីហា ឆ្នាំ២០២២នេះថា៖ កម្លាំងនគរបាលជំនាញខេត្តសៀមរាប បានបញ្ជូនខ្លួនជនសង្ស័យម្នាក់ទៅសាលាដំបូងខេត្តសៀមរាបករណីរក្សាទុក ជួញដូរ និងប្រេីប្រាស់ដោយខុសច្បាប់នូវសារធាតុញៀន ។
របាយការណ៍របស់ស្នងការដ្ឋាននគរបាលខេត្តសៀមរាប បានបញ្ជាក់ថា កម្លាំងការិយាល័យប្រឆាំងគ្រឿងញៀន៖ ជនសង្ស័យឈ្មោះ ចាំង គាងអាង ភេទប្រុស ឆ្នាំកំណើត១៩៩៣ ជនជាតិវៀតណាម មុខរបរគ្មាន មានទីលំនៅ ភូមិ សង្កាត់ ក្រុងមិនចាំ ខេត្តព្រៃនគរ ប្រទេសវៀតណាម (រក្សាទុក និងប្រើប្រាស់ មានសារធាតុញៀននៅក្នុងខ្លួន) ។
ប្រភពដដែលបន្តថា មុនពេលឃាត់ខ្លួនជនសង្ស័យខាងលេីនេះ កម្លាំងនគរបាលជំនាញខេត្តសៀមរាប បានសហការជាមួយកម្លាំងអនុរក្សពន្ធនាគារខេត្ត កាលពីរសៀលថ្ងៃទី១៦ ខែសីហា ឆ្នាំ២០២២ថ្មីៗនេះ បានចុះបង្ក្រាបបទរក្សាទុក និងប្រើប្រាស់ដោយខុសច្បាប់នូវសារធាតុញៀន នៅចំនុចក្នុងបរិវេណពន្ធនាគារខេត្តសៀមរាបស្ថិតនៅភូមិ បុស្សក្រឡាញ់ សង្កាត់ជ្រាវ ក្រុង ខេត្តសៀមរាប បានឃាត់ខ្លួនជនសង្ស័យម្នាក់ ឈ្មោះ ចាំង គាងអាង តែម្តង។
ក្នុងប្រតិបត្តិការនោះដែរ កម្លាំងជំនាញវត្ថុតាងដកហូតបានរួមមាន ៖ ម្សៅកេតាមីនចំនួន ០១កញ្ចប់ ស្មើនឹងទម្ងន់ ៦.៥៧ ក្រាម(ទម្ងន់សុទ្ធ) និងទូរស័ព្ទដៃចំនួន០២គ្រឿង។
បច្ចុប្បន្នជនសង្ស័យ រួមនឹងវត្ថុតាងគ្រឿងញៀន ត្រូវបានបញ្ជូនទៅទៅអយ្យការអមសាលាដំបូងខេត្ត ដេីម្បីចាត់ការតាមច្បាប់៕
ដោយ៖សហការី
