នាយកប្រតិបត្តិសាខាកាកបាទក្រហមកម្ពុជា​ ទទួលជួបសំណេះសំណាល និងទទួលអំណោយជាកុំព្យូទ័រ​ ចំនួន៦គ្រឿង​ ពីសាខាធនាគារពិភពលោក ប្រចាំទីក្រុងតូក្យូ ប្រទេសជប៉ុន

ភ្នំពេញ៖ លោក ជិន ប៊ុនធឿន នាយកប្រតិបត្តិសាខា នាព្រឹកថ្ងៃទី ២២ ខែសីហា ឆ្នាំ២០២២នេះ បានទទួលជួបសំណេះសំណាល និងទទួលអំណោយជាកុំព្យូទ័រ​ (Laptop) ចំនួន៦គ្រឿង​ ពីសាខាធនាគារពិភពលោក ប្រចាំទីក្រុងតូក្យូ ប្រទេសជប៉ុន តាមរយៈលោកស្រី ណាណាកូ អាគីយ៉ាម៉ា អគ្គនាយិកាក្រមហ៊ុន OBARA KOGYO CO.,LTD.  និងលោកស្រី អាគីកូ ប្រធានអង្គការ Side By Side នៅទីស្នាក់ការសាខាកាកបាទក្រហមកម្ពុជា​ រាជធានីភ្នំពេញ ។ 

នាឱកាសនោះ លោកស្រីទាំងពីរតំណាងឱ្យសប្បុរសជន បានសម្តែងនូវក្តីសោមនស្សរីករាយយ៉ាងក្រៃលែង​ ដែលបានចូលរួមចំណែកជាមួយការងារមនុស្សធម៌របស់សាខាកាកបាទក្រហមកម្ពុជា​ រាជធានីភ្នំពេញ តាមរយៈការនាំយក​កុំព្យូទ័រមកប្រគល់ជូននេះ​ ដេីម្បីសម្រាប់បំពេញការងារឱ្យកាន់តែរហ័ស​ និងមានប្រសិទ្ធភាពថែមទៀត​ ។

ជាការឆ្លើយតប ក្នុងនាម លោក ឃួង ស្រេង សាខាកាកបាទក្រហមកម្ពុជា​ រាជធានីភ្នំពេញ លោក ជិន ប៊ុនធឿន បានពាំនាំនូវសេចក្តីផ្តាំផ្ញេីសាកសួរសុខទុក្ខពីសំណាក់​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា​ ព្រមទាំងសូមថ្លែងអំណរគុណដល់សាខាធនាគារពិភពលោក ប្រចាំទីក្រុងតូក្យូ ប្រទេសជប៉ុន ដែលបានផ្តល់អំណោយជាកុំព្យូទ័រតាមរយៈលោកស្រីទាំងពីរ​ ជូនដល់សាខារាជធានីភ្នំពេញ​ ដែលស្របពេលសាខាកំពុងមានតម្រូវការយ៉ាងចាំបាច់ក្នុងការអនុវត្តសកម្មភាពការងារមនុស្សធម៌ឱ្យកាន់តែមានភាពរហ័ស ងាយស្រួល និងមានប្រសិទ្ធភាពជាមុន ។ 

លោកនាយកប្រតិបត្តិសាខា​ ក៏បានជម្រាបជូនភ្ញៀវពីសកម្មភាពការងាររបស់សាខាដែលបានអនុវត្តទៅតាមវិស័យស្នូលទាំង៤​ ព្រមទាំងបានសន្យានឹង​ ចាត់ចែងបែងចែកប្រេីប្រាស់កុំព្យូទ័រទាំងនេះឱ្យចំគោលដៅ​ ក្នុងការបម្រេីការងារមនុស្សធម៌ឱ្យបានកាន់តែល្អប្រសេីរថែមទៀត​ ៕

ដោយ​៖សហការី​