សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ការនាំចេញ-ចូលរវាងកម្ពុជា-វៀតណាមកើនឡើង៣,៤%ក្នុងរយៈពេល៧ខែនៃឆ្នាំ២០២២នេះ បើប្រៀបធៀបនឹងឆ្នាំមុន បើទោះជាស្ថិតក្នុងបរិបទជំងឺកូវីដ១៩ក៏ដោយ។ ភាគីទាំងពីរប្តេជ្ញាជម្រុញបន្ថែមទៀតដើម្បីអោយទំហំពាណិជ្ជកម្មកាន់តែកើនឡើងថែមទៀតស្របតាមកំណើនសេដ្ឋកិច្ចនិងតម្រូវការ។
បើតាមរបាយការណ៍របស់អគ្គនាយកដ្ឋានគយនិងរដ្ឋាករ បានអោយដឹងថា ទំហំពាណិជ្ជកម្មទ្វេភាគីរវាងកម្ពុជា និងវៀតណាម សម្រេចបានក្នុងរង្វង់ទឹកប្រាក់ ៣,៧៦ពាន់លានដុល្លារ នៅក្នុងរយៈពេល៧ខែ ឆ្នាំ២០២២នេះ។ ទំហំនេះ បានកើនឡើងរហូតដល់ ២២,២ ភាគរយ បើធៀបនឹងរយៈពេលដូចគ្នាក្នុងឆ្នាំ២០២១។
ចាប់ពីខែមករា ដល់ខែកក្កដា នៃឆ្នាំ២០២២នេះកម្ពុជា នាំចេញទំនិញសរុប ទៅកាន់ប្រទេសវៀតណាម មានទឹកប្រាក់ សរុប ១ ៣២៦ លានដុល្លារ ពោលគឺកើន ឡើង ៣.៤ភាគរយ ធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមស្ថិតិជញ្ជីងពាណិជ្ជកម្មទំនិញរបស់អគ្គនាយកដ្ឋានគយ និងរដ្ឋាករកម្ពុជា។
កម្ពុជា នាំចូលទំនិញពីប្រទេសវៀតណាម មានទឹកប្រាក់សរុប ២ ៤៣៩ លានដុល្លារ មានកំណើន ៣៥ ភាគរយ ធៀបនឹងរយៈ៧ខែឆ្នាំមុន។
ក្នុងជំនួបជាមួយលោក ឡេ ហាយជុង សមាជិកមជ្ឈិមបក្ស និងជាប្រធានគណៈទាក់ទងបរទេសមជ្ឈិមបក្សកុម្មុយនីស្តវៀតណាម នាថ្ងៃទី ២២ សីហា នៅវិមានសន្តិភាព សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានជំរុញឱ្យភាគីវៀតណាម ជំរុញទំនាក់ទំនងសេដ្ឋកិច្ចទ្វេភាគី ឲ្យកាន់តែខ្លាំងថែមទៀត ជាពិសេស បន្តកែប្រែតំបន់អតីតសង្គ្រាមនៅតំបន់ព្រំដែន ឲ្យទៅជាតំបន់សន្តិភាព អភិវឌ្ឍន៍និងកិច្ចសហប្រតិបត្តិការ។
ក្នុងជំនួបនេះ សម្តេចអគ្គមហាសេនាបតីតេជោ ហ៊ុន សែន បានសង្កត់ធ្ងន់ថា ៖«ទំនាក់ទំនងសេដ្ឋកិច្ច គួរគាំទ្រឱ្យទំនាក់ទំនងនយោបាយ»។
គួបញ្ជាក់ថា ទំនិញសំខាន់ៗដែលកម្ពុជា នាំចេញទៅកាន់ប្រទេសវៀតណាម ភាគច្រើនជាផលិតផលកសិកម្ម ស្រូវ ស្វាយចន្ទី ដំឡូងមី កៅស៊ូជាដើម ខណៈនាំចូលពីវៀតណាម ដែកថែប ប្រេងឥន្ធនៈ ផលិតផលវាយនភណ្ឌជាដើម។
កាលពីឆ្នាំ២០២១កន្លងទៅ ទំហំពាណិជ្ជកម្មទ្វេភាគីរវាងកម្ពុជា និងវៀតណាម សម្រេចបាន ៩ប៊ីលានដុល្លារ។ រដ្ឋាភិបាលទាំងពីរ បានឯកភាពគ្នាជំរុញទំហំពាណិជ្ជកម្មឱ្យកើនដល់ ១០ប៊ីលានដុល្លារ ក្នុងឆ្នាំ២០២២នេះ៕
ដោយ៖ សូរិយា
