ព័ត៌មានទាន់ហេតុការណ៍៖

លោក វង សូត រដ្ឋមន្ត្រីក្រសួងសង្គមកិច្ចពិនិត្យការចាប់ផ៊្តើមកសាងអគារមណ្ឌលសំចតថ្មីជំនួយរដ្ឋាភិបាលថៃ

ចែករំលែក៖

   ខេត្តបន្ទាយមានជ័យ៖ លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជននិងយុវនីតិសម្បទា រួមជាមួយប្រតិភូ និងមានការអញ្ជើញចូលរួមពីលោក ង៉ោ ម៉េងជ្រួន អភិបាលរងខេត្តបន្ទាយមានជ័យ លោកឃុន វុទ្ធី ប្រធានមន្ទីរសង្គមកិច្ច អតីតយុទ្ធជននិងយុវនីតិសម្បទាខេត្ត  លោកគាត ហ៊ុល អភិបាលក្រុងប៉ោយប៉ែត  លោកស្រីឈា ម៉ានីត នាយិកាមណ្ឌលសំចត ព្រមទាំងតំណាងវិស្វករនិងទីប្រឹក្សាបច្ចេសទេសក្រុមហ៊ុនសាងសង់របស់ថៃ បានអញ្ជើញចុះត្រួតពិនិត្យការងារនៅមណ្ឌលសំចតនិងដំណើរការការដ្ឋាន​សាងសង់អគារចំនួន៥ថ្មីនៃមណ្ឌលសំចតក្រោមជំនួយរដ្ឋាភិបាលនៃព្រះរាជាណាចក្រថៃ ដែលមានតម្លៃជិត១,៥លានដុល្លារអាមេរិកស្ថិតនៅភូមិប្រជាធម្មកើត សង្កាត់អូរឫស្សី ក្រុងប៉ោយប៉ែត ។

    លោក វង សូត បានពិនិត្យនិងកោតសរសើរដល់មន្ទីរសង្គមកិច្ច អតីតយុទ្ធជននិងយុវនីតិសម្បទា អាជ្ញាធរដែនដី អង្គការ សមាគមក្រៅរដ្ឋាភិបាលនានា ព្រមទាំងមណ្ឌលសំចតដែលបានខិតខំបំពេញការងារទទួលបានជោគជ័យនិងផ្តល់សេវានានាដល់ពលករខ្មែរដែលវិលត្រឡប់ពីប្រទេសថៃនិងប្រទេសដទៃទៀតទាំងក្នុងកាល:ទេស:ដ៏លំបាកនិងងាយស្រួលកន្លងមករហូតដល់បច្ចុប្បន្ន ។

   លោក ផៃ រ៉ូត  វិស្វករថៃ និងទីប្រឹក្សាបច្ចេកទេសនៃក្រុមហ៊ុនថៃបានរាយការណ៍ជូនលោករដ្ឋមន្ត្រីនូវដំណើរការសាងសង់មណ្ឌលសំចតថ្មីនៅទល់មុខទីតាំងចាស់។ ក្នុងនោះទីតាំងការដ្ឋានបានពង្រាប​ទីលាន ចាក់ដី ធ្វើរបងព័ទ្ធការដ្ឋាន បុកជើងសសរបាន៣០%ហើយ។ ប្រសិនបើគ្មានអ្វីប្រែប្រួលឬឧបសគ្គទេ គម្រោងសាងសង់នឹងហើយរួចរាល់តាមផែនការ (ថ្ងៃទី១៥សីហាឆ្នាំ២០២២-១៥សីហាឆ្នាំ២០២៣)។

    ជាមួយនោះ  លោករដ្ឋមន្ត្រីក្រសួងសង្គមកិច្ចបានថ្លែងអំណរគុណដល់រាជរដ្ឋាភិបាលថៃដែលបានផ្តល់ជំនួយឥតសំណងកសាងមណ្ឌលសំចតថ្មីឱ្យមានលក្ខណ:សមស្រប ទំនើបតាមស្តង់ដារអន្តរជាតិសម្រាប់ទទួលពលករនិសន្តប្រវេសន៍កម្ពុជានេះ និងលោកបានអរគុណលោករដ្ឋមន្ត្រីក្រសួងសុខុ​មាលសង្គមថៃ  លោកពិនយ៉ារ៉ាក់ ពូនសាប់ ឯកអគ្គរាជទូតថៃប្រចាំកម្ពុជាដែលបានខិតខំសម្របសម្រួលនូវការផ្តល់ជំនួយនេះនិងបានចុះអនុស្សរណ:យោគយល់គ្នា កន្លងមកថ្មីៗនេះ ។

   ទន្ទឹមនឹងនោះលោករដ្ឋមន្ត្រី វង សូត ក៏បានថ្លែងអំណរគុណចំពោះលោក អ៊ុំ រាត្រី អភិបាលខេត្តបន្ទាយមានជ័យ ដែលបានដឹកនាំនិងចាត់តាំងឱ្យលោកង៉ោ ម៉េងជ្រួន អភិបាលរងខេត្ត លោកឃុន វុទ្ធី ប្រធានមន្ទីរសង្គមកិច្ច លោក អាង ណារិទ្ធ ប្រធានមន្ទីររៀបចំដែនដី  លោកកើត វណ្ណារ៉េត  ព្រះរាជអាជ្ញាអមសាលាដំបូងខេត្ត លោក គាត ហ៊ុល អភិបាលក្រុងប៉ោយប៉ែត និងអាជ្ញាធរមានសមត្ថកិច្ចពាក់ព័ន្ធដែលបានសម្របសម្រួលឱ្យពលរដ្ឋ២គ្រួសារចុងក្រោយដែលសាងសង់ទីជម្រកនិងរស់នៅលើដីរដ្ឋនៃគម្រោងនេះបានចាកចេញដោយស្ម័គ្រចិត្ត ។

   នាឱកាសនោះដែរ លោកស្រីឈា ម៉ានីត នាយិកាមណ្ឌលសំចតបានឱ្យដឹងថា៖  យោងតាមអនុស្សរណៈយោគយល់គ្នារវាងក្រសួងសង្គមកិច្ច អតីតយុទ្ធជននិងយុវនីតិសម្បទានឹងស្ថានទូតថៃប្រចាំកម្ពុជា ជំនួយសាងសង់មណ្ឌលសំចតថ្មីនេះត្រូវចាប់ផ្តើមពីថ្ងៃទី១៥ខែសីហាឆ្នាំ២០២២ និងគ្រោងបញ្ចប់នៅថ្ងៃទី១៥ ខែសីហា ឆ្នាំ២០២៣ ។

    លោកស្រីបញ្ជាក់ថា៖ គម្រោងសាងសង់មណ្ឌលសំចតថ្មីខេត្តបន្ទាយមានជ័យស្ថិតជិតព្រំដែនក្នុងក្រុងប៉ោយប៉ែតនេះ ត្រូវសង់លើផ្ទៃដីជិត១ហិកតា ដែលមាន៥អគារ ដូចជា៖

១-អគារជនរងគ្រោះ បុរស១ ខ្នង ។ 

២-អគារជនរងគ្រោះស្ត្រី១ខ្នង ។ 

៣- អគាររដ្ឋបាល១ខ្នង។

៤-អគារអាហារដ្ឋាន១ខ្នង ។

៥- អគារបណ្តុះបណ្តាលអាជីពរួម១ខ្នង ហើយគ្រោងចំណាយថវិកាជំនួយឥតសំណងរបស់រាជរដ្ឋាភិបាលថៃចំនួនជាង១,៤លានដុល្លារអាមេរិច ។ នាបច្ចុប្បន្ន ស្ថានភាពពលករនិសន្តរប្រវេសន៍មាតុភូមិនិវត្តន៍មានភាពធូរស្រាលដោយចូលមកក្នុងមណ្ឌលសំចតនេះមានតែប្រមាណ៥នាក់/ថ្ងៃ ។ចំពោះកិច្ចសហការមានជាមួយអាជ្ញាធរមានសមត្ថកិច្ចនិងសហប្រតិបត្តិការជាមួយដៃគូអភិវឌ្ឍន៍ដូចជា អង្គការរតន:អន្តរជាតិនិសន្តប្រវេសន៍អន្តរជាតិ(IOM), យូនីសេហ្វ(UNICEF ), សាម៉ារីតាន់ ភឺស(Samaritan Purse ),3PC  , គ្រួសារថ្មី, តំណក់ទឹក,ភឿនៗអារញ្ញប្រាថេត ។ល។ ចំពោះមុខ មណ្ឌលបាននិងកំពុងផ្តល់សែវាជាអាហារសម្រន់   សុខភាពបឋម បណ្តុះបណ្តាលវិជ្ជាជីវ: ៥ ជំនាញ តែនៅខ្វះខាតខ្លាំងថវិកាសម្រាប់ពលករធ្វើដំណើរវវិលទៅផ្ទះនិងសហគមន៍វិញ ៕

ដោយ ៖ វណ្ណា


ចែករំលែក៖