សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មានករណីគ្រោះថ្នាក់ចរាចរណ៍មួយបានកើតឡើងរវាងរថយន្ដ២គ្រឿងបានបុកគ្នាពេញទំហឹងបណ្ដាលឱ្យរថយន្ដទំនើបម៉ាកFord Ranger ធ្លាក់ផ្លូវចូលទឹក ចំណែករថយន្ដម៉ាកLexus RX300 រងការខូចខាតផ្នែកខាងមុខយ៉ាងដំណំ បង្កការភ្ញាក់ផ្អើលកាលពីវេលាម៉ោង៣និង២០នាទីរសៀល ថ្ងៃទី០៩ ខែកញ្ញា ឆ្នាំ២០២២ ស្ថិតនៅតាមបណ្ដោយផ្លូវ៥០ម៉ែត្រ ក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានពីកន្លែងហេតុបានប្រាប់ឱ្យដឹងថា មុនកើតហេតុគេឃើញបុរសម្នាក់បើករថយន្ដស៊េរីទំនើបមួយគ្រឿងម៉ាកFord Ranger ពណ៌ខ្មៅ ពាក់ស្លាកលេខ កម្ពុជា B.PANHA1 ធ្វើដំណើរតាមបណ្ដោយផ្លូវ៥០ម៉ែត្រពីកើតទីលិចក្នុងល្បឿនលឿន ខណៈដែលមកដល់ចំណុចកើតហេតុក៏មានរថយន្ដម៉ាកLexus RX300 បើកដោយជនជាតិចិនធ្វើដំណើរតាមបណ្ដោយផ្លូវបេតុងក្នុងទិសដៅពីត្បូងទៅជើងក្នុងបំណងបត់ឆ្វេងតាមផ្លូវ៥០ម៉ែត្រ ដោយបើកមិនប្រុងប្រយ័ត្នក៏ត្រូវរថយន្ដFord Ranger បុកចំពីចំហៀងមុខរថយន្ដបណ្ដាលឱ្យរងការខូចខាតយ៉ាងដំណំ ចំណែកឯរថយន្ដFord Ranger បែកកង់មុខខាងឆ្វេងបណ្ដាលឱ្យរេចង្កូតធ្លាក់ផ្លូវចូលទឹក តែសំណាងល្អក្នុងហេតុការណ៍គ្រោះថ្នាក់ខាងលើមិនមានអ្នករងរបួសនោះទេ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ចំណុចកើតហេតុ និងបានរាយការណ៍ទៅសមត្ថិច្ចជំនាញចរាចរណ៍ចុះមកធ្វើការវាស់វែងរថយន្ដទាំង២គ្រឿងយកទៅរក្សាទុកនៅអធិការដ្ឋានខណ្ឌពោធិ៍សែនជ័យដើម្បីដោះស្រាយគ្នានៅពេលក្រោយ៕
ដោយ ៖ ភារ៉ា ដង្កោ
