សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ បុរសម្នាក់ ដែលជាមុខសញ្ញាលួចទ្រព្យសម្បត្តិប្រជាពលរដ្ឋតាមលំនៅដ្ឋានយ៉ាងសកម្ម អស់លក្ខណ៍ត្រូវបានកម្លាំងនគរបាលស្រុកថ្មគោល ចាប់ឃាត់ខ្លួនរួមនិងវត្ថុតាងជាក់ស្ដែង កាលពីវេលាម៉ោង ០៣ និង១៥ទៀបភ្លឺថ្ងៃអង្គារទី១៣ ខែកញ្ញា ឆ្នាំ២០២២ នៅចំណុចក្រុមទី១០ភូមិបឹងព្រីង ឃុំបឹងព្រីង ស្រុកថ្មគោល ខេត្តបាត់ដំបង។
យោងតាមរបាយការណ៍របស់សមត្ថកិច្ចនគរបាលស្រុកថ្មគោល នៅព្រឹកថ្ងៃអង្គារទី១៣ ខែកញ្ញា ឆ្នាំ២០២២នេះ បានឱ្យដឹងថា មានករណីលួច(ដែកគ្រឿងចាក់ច្រវ៉ាក់ម៉ាស៊ីនច្រូតស្រូវ)បង្កឡើងដោយជនសង្ស័យម្នាក់ ឈ្មោះ ហាំ ពិសិទ្ធ ភេទប្រុសអាយុ១៩ឆ្នាំ រស់នៅភូមិបឹងព្រីងឃុំបឹងព្រីង ស្រុកថ្មគោលខេត្តបាត់ដំបង បានធ្វើសកម្មភាពចូលលំនៅដ្ឋានលួចយកដែករបស់ជនរងគ្រោះឈ្មោះ មិន ភាព ភេទប្រុសអាយុ៥៥ឆ្នាំរស់នៅភូមិបឹងព្រីង ឃុំបឹងព្រីង ស្រុកថ្មគោល ខេត្តបាត់ដំបង ដោយបាត់បង់ ដែកគ្រឿងអាត់ច្រវ៉ាក់ម៉ាស៊ីនច្រូតស្រូវចំនួន២០ដុំ គ្រឿងប៊ូឡុងថ្មីចាស់មួយចំនួនធំ។
របាយការណ៍ដដែលបន្តថា ក្រោយពេលកើតហេតុ ជនរងគ្រោះដឹងថា មានសកម្មភាពលួចកើតឡើងក្នុងលំនៅដ្ឋានរបស់ខ្លួន ក៏បានរាយការណ៍ប្តឹងមកសមត្ថកិច្ចនគរបាលស្រុកថ្មគោល ដែលមានលោកវរសេនីយ៍ទោ សេង លុច អធិការនគរបាល ស្រុក បានដឹកនាំធ្វើការស្រាវជ្រាវ និងកំណត់មុខសញ្ញាបានរួចឈានដល់ការឃាត់ខ្លួនឈ្មោះ ហាំ ពិសិទ្ធ នៅភូមិបឹងព្រីងឃុំបឹងព្រីង ស្រុកថ្មគោលខេត្តបាត់ដំបង ហើយធ្វើការដកហូតទ្រព្យសម្បត្តិខាងលើ ប្រគល់ជូនជនរងគ្រោះវិញ ។
បច្ចុប្បន្នជនសង័្សយបានឃាត់ខ្លួនជាបណ្តោះអាសន្ននៅអធិការដ្ឋាននគរបាលស្រុកដើម្បីកសាងសំណុំចាត់ការតាមនីតិវិធី ច្បាប់៕
ដោយ៖សហការី
