សារព័ត៌មាន នគរវត្ត តែងតែនាំមុខគេជានិច្ច
កីឡាករ Joel Matip របស់ក្រុមហង្សក្រហម Liverpool បានតែតបាល់បញ្ចូលទីនៅនាទីទី៨៩ ខណៈដែលក្រុមជើងឯករងមួយនេះកាលពីរដូវកាលមុនបានផ្តួលក្រុម Ajax Amsterdam ក្នុងលទ្ធផល ២-១ ក្នុងការប្រកួតក្របខ័ណ្ឌ Champions League ពូល A នៅកីឡដ្ឋាន Anfieldកាលពីថ្ងៃអង្គារ។ ចំណែកក្រុមមាន់ខ្នាយមាសបានបរាជ័យក្នុងទឹកដី Sporting ក្នុងលទ្ធផល២ទល់០ក្នុងការប្រកួតនៅរាត្រីថ្ងៃអង្គារជាមួយគ្នានេះដែរ។
ក្រុមរបស់លោក Juergen Klopp បានចាញ់ការប្រកួតបើកឆាកក្នុងពូល ៤-១ នៅលើទឹកដីក្រុម Napoli ហើយកំពុងឆ្ពោះទៅរកលទ្ធផលដ៏ខកចិត្តមួយផ្សេងទៀត រហូតដល់ខ្សែការពារកណ្តាល Joel Matip បានរកគ្រាប់បាល់ចុងម៉ោងដើម្បីជួយសង្គ្រោះក្រុមហង្សក្រហមឲ្យទទួលបាន៣ពិន្ទុ។
ការប្រកួតក្នុងតង់ទី១ ខ្សែប្រយុទ្ធ Mohamed Salah បានស៊ុតបញ្ចូលទីក្រុមម្ចាស់ផ្ទះនាំមុខមុននៅនាទីទី១៧បន្ទាប់ពីការបញ្ជូនបាល់ពី Diogo Jota ធ្វើឲ្យកីឡាករអេហ្ស៊ីបស៊ុតផុតដៃអ្នកចាំទី Remko Pasveer របស់ Ajax ដោយគ្រាប់បាល់បញ្ចូលទីនាំមុខ ប៉ុន្តែការនាំមុខនេះមានរយៈពេលត្រឹមតែ១០នាទីប៉ុណ្ណោះមុនពេល Ajax រកបានគ្រាប់បាល់តាមស្មើនៅនាទីទី២៧ដោយកីឡាករ Mohammed Kudus ។
ក្រុមហង្សក្រហម Liverpool បានឆ្លើយតបយ៉ាងល្អក្នុងការប្រកួតនៅតង់ទី២ ហើយទោះបីជា Virgil van Dijk បានព្យាយាមរកគ្រាប់បាល់មិនបានសម្រេចក៏ដោយ ដោយការតែតបាល់ពីជ្រុងពីការបញ្ជូនរបស់ Trent Alexander-Arnold នៅនាទីទី៣៥។ បន្ទាប់មក Alexander-Arnold បានក៏បានស៊ុតបាល់ចំគោលដៅមួយគ្រាប់ទៀត ប៉ុន្តែត្រូវអ្នកចាំទី Ajax សង្គ្រោះបាន។
ក្រុម Liverpool ត្រូវការឈ្នះដើម្បីរកបាន៣ពិន្ទុបន្ថែមនៅតង់ទី២ ដោយក្រុមបានដាក់ Darwin Nunez ហើយនៅនាទីទី៨៣ ប៉ុន្តែខ្សែប្រយុទ្ធអ៊ុយរ៉ាហ្គាយរូបនេះបានស៊ុតចំគោលដៅមួយគ្រាប់ផងដែរ រហូតដល់នាទីទី៨៩ កីឡាករ Kostas Tsimikas បានបញ្ជូនបាល់យ៉ាងល្អ ហើយខ្សែការពារ Matip បានតែតបំប៉ោងសំណាញ់ទីបានសម្រេចដែលជាគ្រាប់ជ័យជម្នះរបស់ Liverpool។
ចំណែកក្រុមមាន់ខ្នាយមាស Tottenham Hotspur បានរងបរាជ័យជាលើកដំបូងរបស់ពួកគេក្នុងរដូវកាលនេះ ខណៈដែលក្រុម Sporting បានដណ្តើមបានជ័យជម្នះ ២-០ ក្នុងទឹកដីលើក្រុមរបស់លោក Antonio Conte ក្នុងក្របខ័ណ្ឌ Champions Leagueជាមួយនឹងគ្រាប់បាល់បញ្ចូលទីក្នុងម៉ោងបន្ថែមពីកីឡាករបម្រុង Paulinho និង Arthur Gomes។ខ្សែប្រយុទ្ធប្រេស៊ីល Gomes ដែលទើបតែចូលទីលានប្រកួតបន្ទាប់ពីរកបានគ្រាប់បាល់នោះ បានធ្វើឱ្យប្រាកដថា ជ័យជំនះជាមួយនឹងការស៊ុតបាល់បញ្ចូលទីយ៉ាងអស្ចារ្យនៅនាទីទី៩០+៣នៃម៉ោងបន្ថែម។
គ្រូបង្វឹកក្រុម Spurs លោក Antonio Conte មិនសប្បាយចិត្តនឹងវិធីដែលក្រុមរបស់គាត់បរាជ័យនៅពេលបញ្ចប់ការជួបដ៏លំបាកមួយនេះទេ។ លោកថា “ប្រាកដណាស់ថាយើងមានការខកចិត្តព្រោះការប្រកួតមានតុល្យភាព ហើយយើងបានព្យាយាមឈ្នះការប្រកួតក្នុងតង់ទីពីរ។ ប៉ុន្តែក្នុងរយៈពេល១០នាទីចុងក្រោយ យើងអាចធ្វើបានល្អជាង។ ពួកគេបានស៊ុតបាល់ជ្រុងមួយ បន្ទាប់មកបានស៊ុតបញ្ចូលទីគ្រាប់ទីពីរបន្ទាប់ពី៩០នាទី។ វាជាការ ប្រកួតដ៏លំបាក”។
មុនការប្រកួតនោះមានភាពស្ងប់ស្ងាត់មួយនាទីដើម្បីរំលឹកដល់ការសោយទិវង្គតរបស់ម្ចាស់ក្សត្រី Elizabeth II ដែលនាំឱ្យការប្រកួតទាំងអស់នៅក្នុងចក្រភពអង់គ្លេសដែលបានគ្រោងទុកសម្រាប់ចុងសប្តាហ៍មុនត្រូវបានពន្យារពេល និងការចាកចេញពីក្រុម Spurs ក្នុងការប្រកួតនៅប្រទេសព័រទុយហ្គាល់។
លទ្ធផលខាងលើរបស់ក្រុមអង់គ្លេសទាំង២បានធ្វើឲ្យមានការប្រែប្រួល ដោយក្រុម Liverpool ទទួលបាន៣ពិន្ទុក្នុងពូល A ស្ថិតនៅលេខ២បណ្តោះអាសន្ន។ ចំណែកក្រុម Tottenham ឈរលេខ២ក្នុងពូល D មាន៣ពិន្ទុបន្ទាប់ពីប្រកួត២លើក ។
ក្រុម Liverpool នឹងត្រូវប៉ះក្រុមភ្ញៀវ Brighton នៅថ្ងៃទី១ ខែតុលាក្នុងក្របខ័ណ្ឌ Premier League ខណៈដែលក្រុម Spurs ធ្វើជាម្ចាស់ផ្ទះជួបក្រុម Leicester City ក្នុងការប្រកួតក្របខ័ណ្ឌ Premier League នៅថ្ងៃទី១៧ ខែកញ្ញាខាងមុខ ៕
ដោយ៖ ភារៈ(រូបភាព ៖ BBC Sport/CNA)
