សារព័ត៌មាន នគរវត្ត តែងតែនាំមុខគេជានិច្ច
រដ្ឋអាឡាស្កា ៖ សម្តេចតេជោ ហ៊ុនសែន នាយករដ្ឋមន្ត្រី នៃកម្ពុជា បានផ្ញើសារពិសេសជូនជនរួមជាតិ ពេលអញ្ជើញទៅដល់រដ្ឋអាឡាស្កា សហរដ្ឋអាមេរិក នឹងបន្តដំណើរឆ្ពោះទៅប្រទេសជប៉ុន ដើម្បីចូលរួមបុណ្យសពលោក អាបេ នៅប្រទេសជប៉ុន។
សម្តេចតេជោ បានមានប្រសាសន៍ថា, បងប្អូនជនរួមជាតិជាទីស្រឡាញ់ ! ឥឡូវនេះខ្ញុំព្រះករុណាខ្ញុំ បានធ្វើដំណើរចេញពីទីក្រុងឡាវ៉ាន មកចុះចតចាក់សាំងនៅឯរដ្ឋអាឡាស្កា សហរដ្ឋអាមេរិក ។
សម្ដេចបានថ្លែងបន្តថា, ការធ្វើដំណើរចេញពីរដ្ឋឡាវ៉ាន មកដល់អាឡាស្កាត្រូវចំណាយពេល ៨ម៉ោងនិង៣០នាទី ។ បន្ទាប់ពីការចាក់សាំងហើយនេះ ត្រូវចាកចេញពីអាឡាស្កាទៅកាន់ទីក្រុងតូក្យូ ប្រទេស ជប៉ុន តាមគំរោង ព្រៀងទុកនៃការហោះហើរ ចំនួន ៧ម៉ោងនិង ៤០នាទី ។ ដូច្នេះរយៈពេលនៃការធ្វើដំណើរ សរុបពី ឡាវ៉ាន ទៅកាន់ទីក្រុងតូក្យូត្រូវប្រើពេលជាង ១៦ម៉ោង។
សម្តេចតេជោ ហ៊ុនសែន បានថ្លែងបន្តថា, ខ្ញុំមានការរីករាយដោយសារនៅក្នុងប្រទេសរបស់យើង ព្រះតេជគុណគ្រប់ព្រះអង្គក៏ដូចជាបងប្អូនជនរួមជាតិ បានប្រារព្ធពិធីភ្ជុំបិណ្ឌ ប្រកបដោយជោគជ័យ ជាមួយនឹងការរក្សាបាន នូវសុវត្ថិភាពគ្រប់ផ្នែក ជាពិសេសគឺការពារបាន ដ៏ល្អប្រសើរ មិនអាចរីករាលដាលបាន ជំងឺ covid-19 ។ សម្ដេចបន្តថា, ក្នុងរយៈពេលចុងក្រោយ និងមកដល់ថ្ងៃនេះ ខ្ញុំបានទទួលព័ត៌មាន ពីលោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល ឯកឧត្តម ម៉ម ប៊ុនហេង ជាបន្តបន្ទាប់ អំពីព័ត៌មានទាក់ទងការឆ្លង គឺក្នុងមួយថ្ងៃស្ថិតក្នុងក្រោមកម្រិត ១០ ករណី ឬលើសបន្តិចបន្តួច ។ ខ្ញុំក៏ទទួលបានព័ត៌មានពីលោកជំទាវ ឱ វណ្ណឌីន ពីអត្រាចាក់វ៉ាក់សាំង ជាប្រចាំផងដែរ។
សម្ដេចបានមានប្រសាសន៍លើកឡើងថា, ខ្ញុំនៅតែបន្តតាមដាន ពីការរាយការណ៍ពីសម្ដេចក្រឡាហោម សខេង ជាបន្តបន្ទាប់ ដូច្នេះជាមួយក្នុងករណីដែលខ្ញុំមិនបានចូលរួម ពិធីបុណ្យភ្ជុំបិណ្ឌនៅឆ្នាំនេះ ក៏ដោយ ក៏ ខ្ញុំសប្បាយរីករាយជាមួយនឹងបងប្អូនប្រជាពលរដ្ឋ របស់យើងដែលបាន ធ្វើបុណ្យយ៉ាងសប្បាយរីករាយ នៅក្នុងឆ្នាំនេះ ខុសប្លែកពីឆ្នាំទៅ ដែលយើងស្ថិតនៅក្នុងស្ថានភាពដ៏អាក្រក់នៃកូវីដ-១៩ ៕
ដោយ ៖ សុខ ខេមរា
