សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ បេីយោងតាមប្រភពព័ត៌មានពីរបាយការណ៍របស់ស្នងការដ្ឋាននគរបាលខេត្តបាត់ដំបង នៅរសៀលថ្ងៃសៅរ៍ទី០១ ខែតុលា ឆ្នាំ២០២២នេះថា៖ កម្លាំងជំនាញព្រហ្មទណ្ឌ នៃស្នងការដ្ឋាននគរបាលខេត្តបាត់ដំបង បានធ្វើការស្រាវជ្រាវរហូតឈានដល់ការបង្រ្កាប និងឃាត់ខ្លួនបុរស២នាក់ ពាក់ព័ន្ធករណីហិង្សាដោយចេតនា យកមកសាកសួរបញ្ចប់នីតិវិធីនិងត្រៀមខ្លួនបញ្ជូនទៅតុលាការខេត្តបាត់ដំបង ដេីម្បីចាត់ការតាមច្បាប់។
របាយការណ៍ដដែលបន្តថា កាលពីរសៀលថ្ងៃទី២៩ ខែកញ្ញាឆ្នាំ២០២២ថ្មីៗនេះ នៅចំណុចភូមិកន្ទួត ឃុំសំឡូត ស្រុកសំឡូត ខេត្តបាត់ដំបង មានករណីហិង្សាដោយចេតនាមានស្ថានទម្ងន់ទោស មួយបានកេីតឡេីងដែលករណីនេះបង្កដោយជនសង័្សយចំនួន០២នាក់គឺ៖ ១-ឈ្មោះ កែវ ករណា ភេទប្រុស អាយុ ១៦ ឆ្នាំ រស់នៅភូមិស៊ុង២ ឃុំស៊ុង ស្រុកសំឡូត ខេត្តបាត់ដំបង ។ និង២-ឈ្មោះ ផាន់ សីហា ភេទប្រុសអាយុ១៨ឆ្នាំ រស់នៅភូមិព្រៃរំចេក ឃុំតាសាញ ស្រុកសំឡូត ខេត្តបាត់ដំបង បានប្រើកាំបិតផ្គាក់កាប់ទៅលេីជនរងគ្រោះឈ្មោះម៉ែន សាមុនថៃ ភេទប្រុស អាយុ១៦ឆ្នាំរស់នៅភូមិកណ្តាល ឃុំស៊ុង ស្រុកសំឡូត ខេត្តបាត់ដំបងត្រូវខ្នងបណ្តាលឱ្យរបួសធ្ងន់ ។
ក្រោយកេីតហេតុជនរងគ្រោះត្រូវបានបញ្ជូនទៅកាន់មន្ទីរពេទ្យ ហេីយក្រុមគ្រួសារបានប្តឹងមកសមត្ថកិច្ចនគរបាលស្រុកសំឡូត។
ប្រភពដដែលបន្តថា អុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង រួមនឹងយោបល់លោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទ័ណ្ឌ លោកវរសេនីយ៍ទោ ម៉ែន រីម អធិការនគរបាលស្រុកសំឡូត បានដឹកនាំកម្លាំងជំនាញធ្វេីការស្រាវជ្រាវរហូតឃាត់ខ្លួនជនសង័្សយទាំងពីរនាក់ខាងលេី។
បច្ចុប្បន្នជនសង្ស័យទាំង២នាក់ នៅថ្ងៃសៅរ៍ទី០១ ខែតុលានេះ កំពុងឃាត់ខ្លួនបណ្ដោះអាសន្ននៅស្នងការដ្ឋាននគរបាលខេត្ត និងត្រៀមខ្លួនបញ្ជូនទៅកាន់សាលាដំបូងខេត្ត ដើម្បីចាត់ការតាមច្បាប់៕
ដោយ៖សហការី
