សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នេះបេីយោងតាមប្រភពព័ត៌មានពីក្រសួងបរិស្ថាន នៅព្រឹកថ្ងៃព្រហស្បតិ៍ទី០៦ ខែតុលា ឆ្នាំ២០២២នេះ បានឱ្យដឹងថា ដោយដកស្រង់ចេញពីសៀវភៅមគ្គទេសក៍គ្រឿងទេសកម្ពុជា ផ្លែក្រូចភ្លា ឬក្រូចល្វីង (Bigarade, bitter orange) ជាប្រភេទបែកមែកសាខា មានកម្ពស់២-១០ម។
ក្រសួងបរិស្ថាន បានឱ្យដឹងទៀតថា នៅលើតួដើម និងមែកមានបន្លាប្រវែង៨.សង់ទីម៉ែត្រ ដុះនៅគល់ទងស្លឹក។ ស្លឹកមូលទ្រវែងរួចតូចនៅគល់ហើយស្រួចចុង គែមស្លឹកមានធ្មេញតូចៗ ។ ផ្កាពណ៌សអោល ឬ២-៣ចាកញ្ចុំ (fascicle) នៅគល់ទងស្លឹក ត្របកផ្កា៥ជាប់គ្នាជាបំពង់ ស្រទាប់ផ្កា៥ពណ៌ស កេសរឈ្មោល២០-២៥ មានទងពណ៌សជាប់គ្នាជាបាច់។
ប្រភពដដែលបន្តថា ផ្លែជាដុំមូល (globose) ហើយច្រើនតែសំប៉ែតខាងលើ (oblate) សាច់ក្នុង (sarcocarp) មាន១០-១៣ក្លែប និងមានគ្រាប់ច្រើន។ បន្តពូជដោយគ្រាប់ ផ្កា ស្លឹក និងសម្បកផ្លែមានក្រពេញប្រេង សំខាន់ៗច្រើនហើយក្រអូប។ផ្លែទុំមានរសជាតិជូរ ឬផ្អែមឡមៗ និងល្វីង គេអាចបរិភោគបាន។ ដុះស្ទើគ្រប់ទីកន្លែងនៅប្រទេសកម្ពុជា នៅតំបន់ក្តៅ មានដីល្បប់ហើយសើម។
សូមបញ្ជាក់ថា ផ្លែក្រូចភ្លា ឬក្រូចល្វីង ការប្រើប្រាស់បាន ជាគ្រឿងទេស ផ្សេងៗ៖ គ្រឿងទេស ធ្វើជាម្ជូរក្នុងភ្លាសាច់គោ ភ្លាសាច់ត្រី ជ្រក់។ល។ និងផ្សេងៗទៀត គេធាចយកមកកក់សក់ បំបាត់ក្លិនក្លៀក និងគ្រឿងផ្សំធ្វើសាប៊ូ៕
ដោយ៖សហការី
