សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម ៖ មានករណីគ្រោះថ្នាក់ចរាចរណ៍មួយបានកើតឡើងបង្កដោយរថយន្តម៉ាកហ្វដ ពាក់ស្លាកលេខរដ្ធ27:2-6567 បើកបរដោយលោក ស៊ាន សុគុណ ប្រធានមន្ទីរទេសចរណ៍ខេត្តកំពង់ចាម បានបុកយ៉ាងពេញទំហឹងជាមួយម៉ូតូមួយគ្រឿងជិះគ្នា៤នាក់ បណ្ដាលឱ្យរងរបួសបាក់ជើងម្នាក់ និង ៣នាក់ផ្សេងទៀតដាច់ម្រាមជើង ដាច់ស្លឹកត្រចៀក ។
ចំណែក លោក ស៊ាន សុគុណ បានចុះពីលើរថយន្តហើយតេហៅគ្នីគ្នាមកយកទៅបាត់។
ករណីគ្រោះថ្នាក់ចរាចរណ៍នេះបានកើតឡើងនៅវេលាម៉ោង៧និង៥០នាទី ព្រឹកថ្ងៃទី១១ ខែតុលា ឆ្នាំ២០២៣ នៅចំណុចរង្វង់មូល1-79 ទល់មុខបញ្ជាការដ្ឋានកងរាជអាវុធហត្ថខេត្តកំពង់ចាម ក្នុងក្រុង-ខេត្តកំពង់ចាម។
ប្រភពពីអ្នកឃើញហេតុការណ៍បានឱ្យដឹងថា រថយន្តបង្កហេតុបានបុកយ៉ាងពេញទំហឹងអូសម៉ូតូប្រហែល៣០ម៉ែត្រ កិនជាប់ម៉ូតូពីក្រោមរថយន្តបណ្ដាលឱ្យអ្នកជិះម៉ូតូរងរបួសធ្ងន់និងស្រាលទាំង៤ នាក់។
ក្រោយពេលកើតហេតុគេឃើញសមត្តកិច្ចនគរបាលចរាចរណ៍ក្រុងកំពង់ចាមចុះមកធ្វើការវាស់វែង រូចបញ្ជូនអ្នករងរបួសទៅមន្ទីរពេទ្យខេត្ត និងបានយករថយន្តនិងម៉ូតូទៅអធិការដ្ឋានក្រុងដើម្បីអនុវត្តតាមនីតិវិធីច្បាប់៕
ដោយ ៖ វណ្ណៈ
