សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ថ្លែងក្នុងពិធីប្រគល់សញ្ញាបត្រជូននិស្សិតសកលវិទ្យាល័យជាតិគ្រប់គ្រង នាព្រឹកថ្ងៃចន្ទទី១៧ ខែតុលា ឆ្នាំ២០២២នេះ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានបង្ហើបថារាជរដ្ឋាភិបាលកម្ពុជា បានត្រៀមគុកជាពិសេសមួយសម្រាប់ សម រង្ស៊ី រួចហើយ ប្រសិនជាទណ្ឌិតរូបនេះបានធ្វើដំណើរមកកាន់ប្រទេសកម្ពុជា។ សម្ដេចក៏ជំរុញឱ្យទណ្ឌិតរូបនេះអញ្ជើញមកកាន់កម្ពុជាបានឆាប់ផងដែរ។
ក្នុងចំណោម និស្សិតជ័យលាភីជាង៦ពាន់នាក់នៅថ្ងៃនេះ និស្សិតជ័យលាភីថ្នាក់បរិញ្ញាបត្រចំនួន ៩៦ ភាគរយ, ថ្នាក់ បរិញ្ញាបត្រជាន់ខ្ពស់ ៩៩.៥ ភាគរយ, និងថ្នាក់បណ្ឌិត ១០០ ភាគរយ កំពុងមាន ការងារធ្វើរៀងៗខ្លួន ដោយឡែកថ្នាក់បរិញ្ញាបត្រចំនួន ៩៦ ភាគរយ មានចំនួន១០.៥ ភាគរយ បាននិងកំពុងធ្វើអាជីវកម្ម ដោយខ្លួនឯង។
សម្ដេចតេជោ ហ៊ុន សែន បានថ្លែងថា សម្ដេចមិនបានហាមឃាត់ សម រង្ស៊ី មិនឱ្យចូលស្រុកនោះទេ ហើយថាយន្តហោះណាក៏ដោយក៏អាចដឹក សម រង្ស៊ី ចូលស្រុកផងដែរ តែអ្វីដែលស្វាគមន៍ សម រង្ស៊ី នៅពេលដែលមកដល់ព្រលានយន្តហោះកម្ពុជានោះគឺមានតែខ្នោះដៃប៉ុណ្ណោះ។
សម្ដេចតេជោ ហ៊ុន សែន បានគូសបញ្ជាក់យ៉ាងដូច្នេះថា៖ «អត់រួចខ្លួនទេអាពៅ! ហើយកុំសង្ឃឹមលើ ហ៊ុន សែន ចុះហត្ថលេខាលើកលែងទោសអោយអ្ហែងឲ្យសោះ! អ្នកណាចង់ដឹកក៏ដឹកមកអត់បញ្ហា។ ប៉ុន្តែគ្រាន់តែបញ្ជាក់ថា ពេលមកដល់ត្រូវតែជាប់ខ្នោះហើយបញ្ចូលគុក ហើយគុកមួយណាខ្ញុំមិនប្រាប់ទេ ព្រោះបានរៀបចំត្រៀមរួចហើយវាអត់មានការចាំបាច់អីពិបាកនោះទេ»។
បច្ចុប្បន្នទណ្ឌិតសមរង្ស៊ីកំពុងរងបណ្ដឹងនៅតុលាការរាប់មិនអស់ដែលមានខ្លះបានចូលជាសាលក្រមរួចទៅហើយ។ កាលពីថ្ងៃទី៩ ខែវិច្ឆិកា ឆ្នាំ២០១៩ សម រង្ស៊ី ក៏បានប្រកាសចូលស្រុកវិញដែរតែមកបានត្រឹមប្រទេសឥណ្ឌូនេស៊ីតែប៉ុណ្ណោះ។
សម្ដេចតេជោ ហ៊ុន សែន ថ្លែងថា តាមការសង្កេតមើលប្រវត្តិសាស្ត្រកម្ពុជា ៥០០ឆ្នាំក្រោយ សម រង្ស៉ី អាចចាត់ជាមនុស្សដែលខូចជាងគេបំផុតបាន ព្រោះមនោគមន៍វិជ្ជានយោបាយរបស់ជននេះនាំតែអ្នកដើរតាមខ្លួនជួបបញ្ហា ហើយនាំជាតិទៅរកគ្រោះថ្នាក់។
⁃ សម្តេចតេចតេជោ បានសម្តែងសមានទុក្ខ និងស្មឹងស្មាត គោរពវិញ្ញាណក្ខន្ធកុមារា កុមារី ដែលទទួលមរណភាពដោយលិចទូក-ដចម្លង កាលពីថ្ងៃទី១៣ ខែតុលា ឆ្នាំ២០២២ នៅឃុំកំពង់ភ្នំ ស្រុកលើកដែក ខេត្តកណ្តាល។
– សម្តេចតេជោ ហ៊ុន សែន បានបញ្ជាក់ថា នៅអាស៊ាន មានសោកនាថកម្មធំៗចំនួន៣រួចមកហើយ នៅឆ្នាំ២០២២នេះ ក្នុងនោះមានការរត់ជាន់គ្នានៅឥណ្ឌូនេស៊ី, ករណីបាញ់ប្រហារនៅប្រទេសថៃ និងករណីលិចទូកដចម្លង នៅប្រទេសកម្ពុជា ដែលទាមទារអោយយើងប្រុងប្រយ័ត្នខ្ពស់លើសុខសុវត្ថិភាពរបស់ប្រជាពលរដ្ឋ។
– សម្តេចតេជោ ហ៊ុន សែន នៅតែបន្តអំពាវនាវដល់ប្រជាពលរដ្ឋប្រុងប្រយ័ត្នខ្ពស់ ចំពោះសុវត្ថិភាពខ្លួនឯង ហើយអាជ្ញាធរក៏ប្រឹងប្រែងដើម្បីប្រជាពលរដ្ឋ ជាពិសេសប្រជាពលរដ្ឋរស់នៅតាមដងទន្លេ ស្ទឹង ដែលត្រូវឆ្លងទឹក ដើម្បីប្រកបរបរចិញ្ចឹមជីវិតប្រចាំថ្ងៃ។
– សម្តេតេជោ ហ៊ុន សែន មានប្រសាសន៍ពីប្រវត្តិ នៃចាប់ផ្តើមវិស័យអប់រំនៅកម្ពុជាឡើងវិញ បន្ទាប់ពីញាំញីដោយសង្គ្រាម និងរបបប្រល័យពូជសាសន៍ខ្មែរក្រហម ដែលកាលនោះ ការស្វែងរកបណ្ឌិត ឬអ្នកចេះមកធ្វើការ មិនមែនជារឿងងាយស្រួលនោះទេ ដោយក្រសួងនីមួយៗប្រឹងប្រែងស្រូបទាញអ្នកចេះដឹងមកធ្វើការ។
– សម្តេចតេជោ ហ៊ុន សែន បានអំពាវនាវដល់ស្ត្រីដែលមានប្តី និងមានកូនហើយ សូមបន្តការសិក្សារបស់ខ្លួន ដើម្បីអោយមានតុល្យភាពរវាងបុរស និងស្ត្រី នាលើការបណ្តុះបណ្តាលកម្រិតឧត្តម អនុបណ្ឌិត និងបណ្ឌិត។
– សម្តេចតេជោ ហ៊ុន សែន ថ្លែងថា កម្ពុជាបានចាប់ផ្តើមវិស័យអប់រំ សិក្សាធិការឡើងវិញពីការរស់រានមានជីវិត ដោយអ្នកចេះច្រើនបង្រៀនអ្នកចេះតិច ហើយអ្នកចេះតិចបង្រៀនអ្នកមិនចេះ។
– សម្តេចតេជោ ហ៊ុន សែន ថ្លែងដល់បុគ្គលជាសង្ឃ ដែលសម្តេចហៅថា «អាខ្មៅ» សូមយកលុយ១០ម៉ឺនដុល្លារសហរដ្ឋអាមេរិក ដែលជាលុយខ្មោចរបស់លោកបណ្ឌិតកែមឡីទៅសងគេវិញ ហើយសម្តេចក៏ប្រកាសដល់ប្រជាពលរដ្ឋឱ្យដឹងពីពុតត្បត់ ខូចខិល បោកលុយកាក់ របស់ខូចតាំងខ្លួនជាសង្ឃនោះ។
– សម្តេចតេជោ ហ៊ុ ន សែន ថ្លែងថា ក្រុមប្រឆាំងក្រៅស្រុកដឹកនាំដោយបុគ្គលទណ្ឌិតរត់ចោលស្រុកឈ្មោះ សម រង្ស៊ី បើចិត្តសឿងសូមតតាំងគ្នានៅអឺរ៉ុប ក្នុងពេលសម្តេចធ្វើដំណើរទៅព្រុចសែល ប្រទេសប៊ែលហ្សិក នាពេលឆាប់ៗខាងមុខនេះ។
– សម្តេចតេជោ ហ៊ុន សែន បានអំពាវនាវដល់ប្រជាពលរដ្ឋគ្រប់អាយុបោះឆ្នោត សូមនាំគ្នាទៅចូលរួមចុះឈ្មោះបោះឆ្នោតនាពេលប៉ុន្មានថ្ងៃខាងមុខនេះ ដែលជាចំណុចចាប់ផ្តើម នៃសិទ្ធិបោះឆ្នោតតាមបែបប្រជាធិបតេយ្យ សេរី ពហុបក្ស ។
– សម្តេចតេជោ ហ៊ុន សែន ថ្លែងថា លោក សុខ លូ អភិបាលខេត្តបាត់ដំបង សូមកាត់ដីក្នុងដែនរដ្ឋបាលរបស់ខ្លួនជាប់នឹងខេត្តប៉ៃលិន(តំបន់សមាហរណកម្ម-អតីតសមរភូមិ)ទៅឱ្យរដ្ឋបាលខេត្តប៉ៃលិនគ្រប់គ្រងវិញដើម្បីមានភាពងាយស្រួល យើងមិនអាចធ្វើឱ្យប្រជាពលរដ្ឋរស់នៅក្នុងភាពមិនច្បាស់លាស់បាននោះទេ។ សម្តេចព្រមានថា «បើចៅហ្វាយខេត្តបាត់ដំបងធ្វើមិនកើត សម្តេចនឹងចុះទៅខ្លួនឯងតែម្តង»។
– សម្តេចតេជោ ហ៊ុន សែន នៅតែអំពាវនាវដល់ប្រជាពលរដ្ឋ សូមរក្សាការពារខ្លួន ពីការឆ្លងរីករាលដាលជាថ្មីជំងឺកូវីដ-១៩ ដោយរស់នៅតាមគន្លងប្រក្រតីភាពថ្មី ព្រមទាំងនាំគ្នាទៅទទួលយកការចាក់វ៉ាក់សាំងកូវីដ-១៩ទាំងដូលមូលដ្ឋាន និងដូសជំរុញនានា តាមការកំណត់របស់ក្រុមគ្រូពេទ្យឱ្យបានគ្រប់ៗគ្នា។
– សម្តេចតេជោ ហ៊ុន សែន ផ្តាំផ្ញើដល់អ្នកនិយមការរិះគន់ទាំងឡាយ សូមមានសុទិដ្ឋិនិយមចំពោះការរីកចម្រើនរបស់កម្ពុជា ដោយមានការប្រៀបធៀបកម្ពុជាពីអតីតកាល និងបច្ចុប្បន្នកាល។
– សម្តេចតេជោ ហ៊ុន សែន ថ្លែងថា កម្ពុជាជាប្រទេសប្រើប្រាស់ប្រេងឥន្ធនៈក្នុងកម្រិតលេខ១០៧ ក្នុងចំណោមជាង ២០០លើពិភពលោក ក្នុងនោះសហរដ្ឋអាមេរិកប្រើប្រាស់ច្រើនជាងគេ ក្នុងរង្វង់ជា១៩លានប៉ារ៉ែលក្នុងមួយថ្ងៃ បន្ទាប់មកមានចិន ,ឥណ្ឌា..។ល។
– សម្តេចតេជោ ហ៊ុន សែន ថ្លែងថា ភាពអត់ចិត្ត អត់ថ្លើម នៃបក្សនយោបាយនានា ដែលមិនបានសម្តែងសមានទុក្ខ ឬសរសេរសាររំលែកមរណទុក្ខដល់ក្រុមគ្រួសារសព ដែលមានកូនៗស្លាប់ ដោយការលិចទូកនៅឃុំកំពង់ភ្នំ ស្រុកលើកដែល ខេត្តកណ្តាល។ សម្តេចបញ្ជាក់ថា «ឪពុកម្តាយក្មេងៗទាំងនោះ ក៏អាចមានអ្នកខ្លះបោះឆ្នោត ឱ្យបក្សនយោបាយទាំងនោះផងដែរ»។
– សម្តេច ហ៊ុន សែន ថ្លែងដល់មន្ត្រី ត្រូវវេចបាយ, វេចអង្ករ ចុះជាប់ជាមួយប្រជាពលរដ្ឋនៅមូលដ្ឋាន ដែលរងផលប៉ះពាល់ដោយទឹកជំនន់ និងអន្តរាគមន៍បន្ទាន់ជួយពួកគាត់ «ដោយមិនត្រូវទុកឱ្យប្រជាពលរដ្ឋណាម្នាក់ រងភាពអត់ឃ្លាន ដោយយើងមិនបានដឹង និងមិនបានដោះស្រាយនោះទេ»។
– សម្តេចតេជោ ហ៊ុន សែន ថ្លែងថា សិទ្ធិស្របតាមច្បាប់ ក្នុងការបញ្ចប់មុខតំណែងមន្ត្រីក្នុងតួនាទី និងដែនសមត្ថកិច្ច ដោយមិនរង់ចាំក្រុមអ្នកវិភាគ ឬក្រុមឧទ្ទាមទាំងឡាយទាំងពួងយល់ព្រម ឯកភាពនោះទេ។
– សម្តេចតេជោ ហ៊ុន សែន ថ្លែងថា មន្ត្រីរាជរដ្ឋាភិបាល ឬគណបក្សប្រជាជនកម្ពុជា ឱ្យចាំទុកក្នុងចិត្ត បើគូបក្ខដិបក្ខយើងជេរមានន័យថា «យើងកំពុងធ្វើរឿងត្រឹមត្រូវ» បើគេសរសើរមានន័យថា «យើងកំពុងដើរលើផ្លូវខុស»។ សម្តេចតេជោ ហ៊ុន សែន បញ្ជាក់ថា «អរ គឺជិតដល់ថ្ងៃងាប់»។
– សម្តេតេជោ ហ៊ុន សែន ថ្លែងថា ទោះមានកាំភ្លើងទំនើប , មានរថក្រោះប៉ុន្មានគ្រឿងក៏ដោយ បើគ្មានការគាំទ្រពីប្រជាពលរដ្ឋទេ នឹងដួលរលំឆាប់ជាមិនខាន ដូចជាសម័យប៉ុលពតខ្មែរក្រហមដូច្នោះដែរ។
– សម្តេចតេជោ ហ៊ុន សែន ថ្លែងថា ទប់ នឹងការប៉ោងចំណាយរបស់រដ្ឋ លើសហួសហេតុ ក្នុងនោះមានការរឹងបន្តឹងការចូលមន្ត្រីរាជការថ្មី ដើម្បីកុំឱ្យមានវាសនាដូចប្រទេសស្ត្រីលង្ការ ដែលកំពុងជួបវិបត្តិធ្ងន់ធ្ងរ។
– សម្តេចតេជោ ហ៊ុន សែន ថ្លែងពីការវាយតម្លៃផលប៉ះពាលវិស័យកសិកម្ម ជាពិសេសដំណាំស្រូវដោយទឹកជំនន់ភ្លាមៗ ដោយគ្មានរារែក និងអន្តរាគមន៍បន្ទាន់ផ្តល់ពូជស្រូវដល់ប្រជាកសិករ ដើម្បីបន្តបង្កបង្កើនផលឱ្យទាន់ពេលវេលា។ សម្តេចបញ្ជាក់ថា «វាយតម្លៃបានប៉ុន្មាន ផ្តល់ពូជស្រូវដល់ប្រជាកសិករប៉ុណ្ណឹង កុំចាំសរុបរបាយការណ៍ទាំងមូល»។
– សម្តេចតេជោ ហ៊ុន សែន បានថ្លែងដល់មន្ត្រីកសិកម្មទាំងអស់ ទាំងថ្នាក់ជាតិ និងមូលដ្ឋាន «សូមកុំនាំគ្នាជិះសេះ មើលផ្កា» ដោយត្រូវតាមដាន និងចុះជាប់ ជាមួយប្រជាកសិករ ពីការអន្តរាគមន៍ និងការផ្តល់ពូជស្រូវ និងពូជដំណាំផ្សេងៗដល់ពួកគាត់។
– សម្តេចតេជោ ហ៊ុន សែន ថ្លែងថា កម្ពុជាមានប្រជាពលរដ្ឋក្នុងរង្វង់១៨ភាគរយរស់នៅក្នុងស្ថានភាពក្រីក្រ ដែលយើងត្រូវអន្តរាគមន៍បន្ទាន់ជួយដល់ពួកគាត់ ជាពិសេសប្រជាពលរដ្ឋក្នុងចំណោមនោះ ដែលរងផលប៉ះពាល់ដោយគ្រោះទឹកជំនន់ តាមរយៈការអន្តរាគមន៍របស់អាជ្ញាធរមូលដ្ឋាន និងថ្នាក់ជាតិ ព្រមទាំងក្រុមការងាររាជរដ្ឋាភិបាលចុះមូលដ្ឋាននីមួយៗ។
– សម្តេចតេជោ ហ៊ុន សែន បានអំពាវដល់ធនាគារ និងគ្រឹះស្ថានមីក្រូហិរញ្ញវត្ថុទាំងអស់ សូមមានការអនុគ្រោះដល់ប្រជាពលរដ្ឋកម្ចីប្រាក់ ដែលរងផលប៉ះពាល់ដោយគ្រោះទឹកជំនន់ តាមរយៈការពន្យារបង់ប្រាក់សង, បន្ធូរបន្ថយអត្រាការប្រាក់ និងរៀបចំឥណទាន់កម្ចីដល់ពួកគាតឡើងវិញ ដើម្បីស្តារលទ្ធកម្ម។
– សម្តេចតេជោ ហ៊ុន សែន បានថ្លែងថា ទោះជាកម្ពុជារងផលប៉ះពាល់ដោយទឹកជំនន់ទឹកភ្លៀងក៏ពិតមែន តែកម្រិតនៃផលប៉ះពាល់របស់កម្ពុជា នៅតិចជាងប្រទេសថៃ ដោយកម្ពុជា មិនរងជំនន់ក្នុងរាជធានីភ្នំពេញដូចនៅបាងកកឡើយ ហើយជំនន់បណ្តាលមកពីស្ទឹងព្រែកត្នោតក៏គ្មានអ្វីត្រូវព្រួយបារម្ភដែរ ទោះទឹកភ្លៀងនៅបន្តធ្លាក់ខ្លះៗក្តី៕
ដោយ៖សហការី
