សារព័ត៌មាន នគរវត្ត តែងតែនាំមុខគេជានិច្ច
ខេត្តកំពត៖ បេីយោងតាមប្រភពព័ត៌មានពីរបាយការណ៍របស់ស្នងការដ្ឋាននគរបាលខេត្តកំពត នៅព្រឹកថ្ងៃចន្ទទី១៧ ខែតុលា ឆ្នាំ២០២២នេះ បានឱ្យដឹងថា កម្លាំងការិយាល័យប្រឆាំងគ្រឿងញៀន នៃស្នងការដ្ឋានគរបាលខេត្ត បានបង្រ្កាបករណីជួញដូរ និងប្រើប្រាស់ដោយខុសច្បាប់នូវសារធាតុញៀន ០១ករណី ឃាត់ខ្លួនជនសង្ស័យចំនួន ២នាក់ កាលពីថ្ងៃទី១៦ ខែតុលាម្សិលមិញនេះ ស្ថិតនៅភូមិដុំផ្តៅ ឃុំត្រពាំងភ្លាំង ស្រុកឈូក ខេត្តកំពត ។
មន្រ្តីនគរបាលស្រុកឈូក បានឱ្យដឹងថា៖ ជនសង្ស័យចំនួន ២នាក់ ១-ឈ្មោះ អ៊ុច កំសាន្ត ហៅ ដូង ភេទប្រុស អាយុ ៣៨ឆ្នាំ រស់នៅភូមិត្រពាំងធំ ឃុំត្រពាំងធំ ស្រុកទឹកឈូ ខេត្តកំពត ។ ២-ឈ្មោះ ងឹម ជ្រឿន ភេទប្រុស អាយុ ២៦ឆ្នាំ រស់នៅភូមិស្រែលាវ ឃុំត្រពាំងភ្លាំង ស្រុកឈូក ខេត្តកំពត។
មន្រ្តីដដែលបន្តថា ដោយមានការយកចិត្តទុកដាក់ ចង្អុលបង្ហាញ និងបញ្ជាយ៉ាងម៉ឺងម៉ាត់ពីលោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្ត ក្នុងការបង្រ្កាបនូវរាល់បទល្មើសគ្រឿងញៀនគ្រប់ប្រភេទ នៅទូទាំងខេត្តកំពត ជាក់ស្ដែងកម្លាំងការិយាល័យប្រឆាំងគ្រឿងញៀន ចុះស្រាវជ្រាវរហូតឈានដល់ការបង្រ្កាបឃាត់ខ្លួនជនសង្ស័យចំនួន២នាក់ខាងលេីនេះ រួមនិងវត្ថុតាងដកហូតមានដូចជា៖ ថ្នាំញៀន ០៩កញ្ចប់ ទម្ងន់ ១០៤.២៧ក្រាម (ថ្លឹងទាំងថង់) និងទូរស័ព្ទចំនួន ០៣គ្រឿង ។
បច្ចុប្បន្នជនសង្ស័យ រួមជាមួយវត្ថុតាងត្រូវបានកម្លាំងសមត្ថកិច្ចកំពុងកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់ ៕
ដោយ៖សហការី
