សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ បេីយោងតាមប្រភពព័ត៌មានពីរដ្ឋបាលខេត្តព្រះសីហនុ នៅព្រឹកថ្ងៃអង្គារទី១៨ ខែតុលា ឆ្នាំ២០២២នេះ បានឱ្យដឹងថា លោក គួច ចំរើន អភិបាល នៃគណៈអភិបាលខេត្តព្រះសីហនុ បានអញ្ជើញចុះពិនិត្យការដាក់ពង្រាយធុងសំរាមសម្រាប់ដាក់សំរាមស្ងួតដូចជា (សំបកដប-សំបកកំប៉ុង) ចំនួន ១០ធុង និងដាក់ពង្រាយធុងសំរាម ១០ធុងបន្ថែមទៀតនៅតាមបណ្តោយឆ្នេរអូរឈើទាល២ កាលពីរសៀលថ្ងៃទី១៧ ខែតុលាម្សិលមិញនេះ ស្ថិតនៅសង្កាត់លេខ៤ ក្រុងព្រះសីហនុ។
លោក គួច ចំរើន បានបញ្ជាក់ថា ការដាក់ពង្រាយធុងសំរាមសម្រាប់ដាក់សំបកដប និងសំបកកំប៉ុងនេះ ដើម្បីឱ្យភ្ញៀវទេសចរ ក៏ដូចជាប្រជាពលរដ្ឋដែលពួកគាត់កាន់ដបទឹកដើរកម្សាន្តតាមឆ្នេរ ក៏ដូចជាអ្នកដែលចុះងូតទឹកពិសារទឹកអស់ អាចយកមកដាក់នៅក្នុងធុង ចៀសវាងការបោះចោលលើឆ្នេរបង្កឱ្យបាត់បង់សោភ័ណភាព បរិស្ថានឆ្នេរស្អាតរបស់យើង។
លោកអភិបាលខេត្ត បានសង្កេតឃើញថា ប្រជាពលរដ្ឋមួយចំនួននៅតែខ្វះការយល់ដឹង ទោះបីរដ្ឋបាលក្រុង ខេត្តបានដាក់ស្លាកសញ្ញាណែនាំពីការប្រើប្រាស់ធុងសំរាមសម្រាប់ដាក់តែសំរាមស្ងួត(សំបកដប-សំបកកំប៉ុង) យ៉ាងណាក៏ដោយ ក៏ពួកគាត់នៅតែមិននាំគ្នាចូលរួមសហការ ពួកគាត់នៅតែបោះកាកសំណល់ចំណីអាហារចូលទៅក្នុងធុងសម្រាមស្ងួត (សំបកដប សំបកកំប៉ុង) ដដែល ធ្វើឱ្យហូរទឹកកាកសំណល់បណ្តាលឱ្យខ្សាច់របស់យើងឡើងខ្មៅប៉ះពាល់ដល់បរិស្ថានរបស់យើងថែមទៀតផង។
លោកអភិបាលខេត្ត បានបន្តថា ការដាក់ពង្រាយធុងសំរាមសម្រាប់ដាក់សំរាមស្ងួតដូចជា (សំបកដប-សំបកកំប៉ុង)នេះ ជាការសាកល្បង ប្រសិនបើប្រជាពលរដ្ឋ ក៏ដូចជាភ្ញៀវទេសចរនៅតែមិនចូលរួមសហការទេ គឺត្រូវលើកយកធុងដាក់សំបកដប សំបកកំប៉ុងនេះចេញពីឆ្នេរវិញ។
ក្រៅពីពិនិត្យធុងសំរាម លោកអភិបាលខេត្ត ក៏បានបន្តទៅពិនិត្យសកម្មភាពកាយខ្សាច់សមុទ្រ ដើម្បីចាក់ទប់គល់ស្ងាវនៅតាមបណ្តោយឆ្នេរអូរត្រេះ កុំឱ្យបាក់រលំចូលសមុទ្រដោយសាររលកបោកបក់នាំយកខ្សាច់ហូរចូលទៅសមុទ្រ ធ្វើឱ្យគល់ស្ងាវឬសឡើងលើប្រឈមនឹងខ្យល់បោកបក់រលំចូលទៅសមុទ្រ។
សូមបញ្ជាក់ថា រដ្ឋបាលខេត្តព្រះសីហនុ បានធ្វើការណែនាំឱ្យមន្ទីរកសិកម្ម រុក្ខាប្រមាញ់ និងនេសាទដាំដុះកូនស្ងាវឡើងវិញនៅតាមបណ្តោយឆ្នេរអូរឈើទាលរហូត ដល់ឆ្នេរអូរត្រេះ៕
ដោយ៖ស តារា
