សារព័ត៌មាន នគរវត្ត តែងតែនាំមុខគេជានិច្ច
គណៈប្រតិភូមកពីប្រទេសរុស្ស៊ី និងបេឡារូសត្រូវបានអនុញ្ញាតឱ្យចូលរួមមហាសន្និបាតសមាគមគណៈកម្មាធិការជាតិអូឡាំពិក (ANOC) ដែលជាក្រុមប្រឹក្សាប្រតិបត្តិរបស់អង្គការបានប្រកាសនៅក្នុងសេចក្តីថ្លែងការណ៍មួយកាលពីថ្ងៃពុធ។
គណៈកម្មាធិការអូឡាំពិកអន្តរជាតិ (IOC) បានចេញការណែនាំដល់ស្ថាប័នគ្រប់គ្រងកីឡាកាលពីខែកុម្ភៈ ដើម្បីដកអត្តពលិករុស្ស៊ី និងបេឡារូសចេញពីការប្រកួតបន្ទាប់ពីការលុកលុយរបស់រុស្ស៊ីលើអ៊ុយក្រែន។ប្រទេសបេឡារូសត្រូវបានគេប្រើជាទីតាំងសម្រាប់ការឈ្លានពានដែលរុស្ស៊ីហៅថាជា “ប្រតិបត្តិការយោធាពិសេស”។
ក្រុមប្រឹក្សាប្រតិបត្តិ ANOC បាននិយាយថា ខ្លួននឹងបន្តអនុវត្តតាមអនុសាសន៍របស់ IOC ដែលទទួលស្គាល់ប្រទេសរុស្ស៊ី និងបេឡារូសក្នុងចំណោមដែលគេហៅថា 204 NOCs របស់ខ្លួន ហើយមិនបានដាក់ទណ្ឌកម្មដល់គណៈកម្មាធិការ ឬមន្ត្រីជាប់ឆ្នោតរបស់ពួកគេឡើយ។
សេចក្តីថ្លែងការណ៍បានឲ្យដឹងថា “NOCs នៃប្រទេសរុស្ស៊ី និងបេឡារូសនៅតែត្រូវបានទទួលស្គាល់ដោយ IOC ហើយដូច្នេះមានសិទ្ធិចូលរួមមហាសន្និបាត ANOC ដូច NOC ផ្សេងទៀតដែលត្រូវបានទទួលស្គាល់។ ANOC ចែករំលែកការព្រួយបារម្ភយ៉ាងខ្លាំងរបស់ NOCs ទាក់ទងនឹងសង្រ្គាមនៅអ៊ុយក្រែន ហើយឈរក្នុងសាមគ្គីភាពជាមួយសហគមន៍អូឡាំពិកនៅអ៊ុយក្រែន”។
ជាមួយគ្នានេះគណៈកម្មាធិការអូឡាំពិកប្រទេសឡាតវី (LOK) បានអះអាងកាលពីថ្ងៃអង្គារថា ខ្លួននឹងមិនចូលរួមក្នុងមហាសន្និបាតដែលប្រព្រឹត្តទៅពីថ្ងៃពុធដល់ថ្ងៃសុក្រក្នុងរដ្ឋធានីសេអ៊ូលរបស់កូរ៉េខាងត្បូង ប្រសិនបើរុស្ស៊ី និងបេឡារូសចូលរួម។
LOK និង NOCs នៃប្រទេសដាណឺម៉ាក អេស្តូនី ហ្វាំងឡង់ អ៊ីស្លង់ ឡាតវី លីទុយអានី ប៉ូឡូញ ន័រវេស និងស៊ុយអែត បានអំពាវនាវនៅក្នុងលិខិតមួយទៅកាន់ប្រធានស្តីទី ANOC លោក Robin Mitchell ដើម្បីពិចារណាឡើងវិញអំពីការចូលរួមរបស់រុស្ស៊ី និងបេឡារូសនៅក្នុងមហាសន្និបាត។
លិខិតនោះបានសរសេរថា “ការឈ្លានពានអ៊ុយក្រែនបង្កើតជាការបំពានច្បាប់អន្តរជាតិ នេះបានបង្កើតស្ថានការណ៍ដ៏គ្រោះថ្នាក់មួយដែលអាចមានឥទ្ធិពលជាសាកល។ នៅក្នុងស្ថានភាពដែលយើងឃើញស្ថានការណ៍យោធាកើនឡើងដ៏គ្រោះថ្នាក់នៅអ៊ុយក្រែន ជាមួយនឹងផលវិបាកមនុស្សធម៌ដ៏ធ្ងន់ធ្ងរ យើងស្នើឱ្យក្រុមប្រឹក្សាប្រតិបត្តិ ANOC ពិចារណាឡើងវិញថា តើមន្ត្រីមកពីគណៈកម្មាធិការអូឡាំពិករុស្ស៊ី និងគណៈកម្មាធិការអូឡាំពិកបេឡារូសអាចចូលរួមក្នុងមហាសន្និបាតនាពេលខាងមុខបានដែរឬទេ នៅទីក្រុងសេអ៊ូល?” ។
គួររំលឹកថា កាលពីខែកញ្ញាកន្លងទៅ ប្រធានគណៈកម្មាធិការអូឡាំពិក និងប៉ារ៉ាឡាំពិកសហរដ្ឋអាមេរិក បានប្រកាសថា IOC កំពុងពិចារណាអនុញ្ញាតឱ្យអត្តពលិករុស្ស៊ី និងបេឡារូសត្រឡប់មកវិញក្នុងការប្រកួតអន្តរជាតិផ្សេងៗ ៕
ដោយ៖ ភារៈ(រូបភាព ៖ Reuters/CNA)
